ଅନୁଗୋଳ ଅଫିସ, ୮।୫ – ବୃଦ୍ଧି ପାଉଥିବା କରୋନା ସଂକ୍ରମଣକୁ ଦୃଷ୍ଟିରେ ରଖି ରାଜ୍ୟ ଜେଲ ବିଭାଗ ନିର୍ଦ୍ଦେଶକଙ୍କ ପକ୍ଷରୁ ଜାରି କରାଯାଇଥିବା କଟକଣାକୁ ଅନୁଗୋଳ ଜେଲରେ କଡ଼ାକଡ଼ି ପାଳନ କରାଯାଉ ନ ଥିବା ଅଭିଯୋଗ ହେଉଛି। ସ୍ଥାନୀୟ କର୍ତ୍ତୃପକ୍ଷଙ୍କ ଉଦାସୀନତାର ସୁଯୋଗ ନେଇ କିଛିଦିନ ହେଲା ହଠାତ୍ ଜେଲ୍ ପରିସରରେ ସମସ୍ତ ନୀତି ନିୟମ ଯେପରି କୋହଳ ହୋଇଯାଇଥିବା ଚର୍ଚ୍ଚା ହେଉଛି। ଫଳରେ ଅନୁଗୋଳ କାରାଗାର ସମ୍ମୁଖରେ ଗହଳି ବଢ଼ୁଥିବା ବେଳେ ବାହାର ଖାଦ୍ୟ ମଧ୍ୟ ଭିତରକୁ ଯାଉଥିବା ଦେଖାଯାଉଛି। ଅନୁଗୋଳର ଜଣେ ମଦ ବ୍ୟବସାୟୀଙ୍କୁ ପୋଲିସ ଗିରଫ କରି ଜେଲ୍ ପଠାଇବା ପରେ କଟକଣା ଏପରି ଢିଲା ପଡ଼ିଯାଇଥିବା କୁହାଯାଉଛି।
ରାଜ୍ୟ ଜେଲ୍ ବିଭାଗ ନିର୍ଦ୍ଦେଶକ ଲଗାଇଥିବା କଟକଣା ଅନୁଯାୟୀ, ଜେଲ ପରିସରକୁ ବାହାର ଖାଦ୍ୟ ଓ ବାହାର ଲୋକଙ୍କ ଯିବାକୁ ବାରଣ କରାଯାଇଛି। ଏପରିକି କଏଦୀଙ୍କ ସହ ସିଧାସଳଖ କାହାର ସାକ୍ଷାତକୁ ମଧ୍ୟ ଅନୁମତି ନ ଦେବାକୁ କୁହାଯାଇଛି। ଆବଶ୍ୟକ ପଡ଼ିଲେ କେବଳ ଭିଡିଓ କନଫରେନ୍ସିଂ ଜରିଆରେ ପରିବାର ଲୋକଙ୍କୁ କଥା ହେବାର ସୁଯୋଗ ଦେବାକୁ ନିର୍ଦ୍ଦେଶ ରହିଛି। କିନ୍ତୁ ଅନୁଗୋଳ ଜେଲ କର୍ତ୍ତୃପକ୍ଷ ଉକ୍ତ ନିର୍ଦ୍ଦେଶନାମାକୁ ଠିକ୍ ଭାବେ ପାଳନ କରୁ ନ ଥିବା ବାରମ୍ବାର ଅଭିଯୋଗ ହେଉଛି। ସମ୍ପୃକ୍ତ ମଦ ବ୍ୟବସାୟୀ ଜେଲ୍ରେ ରହିବା ପରଠାରୁ ଅନେକ ସମୟରେ ପରିସର ମଧ୍ୟରେ ଗହଳି ହେଉଛି। ଏହାର ସୁଯୋଗ ନେଇ ଅନ୍ୟ କଏଦୀଙ୍କ ସମ୍ପର୍କୀୟମାନେ ଦୂର ଦୂରାନ୍ତାରୁ ଆସି ଜମା ହେଉଛନ୍ତି। ସେମାନେ ଆଣୁଥିବା ଖାଦ୍ୟକୁ ଜେଲ କର୍ମଚାରୀମାନେ ମଧ୍ୟ ଭିତରକୁ ବୋହି ନେଉଛନ୍ତି। ଏହା ନିତିଦିନିଆ ଘଟଣାରେ ପରିଣତ ହୋଇଯାଇଥିଲେ ବି ଜେଲ କର୍ତ୍ତୃପକ୍ଷଙ୍କୁ କୌଣସି ଫରକ ପଡ଼ୁ ନ ଥିବା ଆଲୋଚନା ହେଉଛି। ଏ ନେଇ ଜେଲ ସୁପରିଣ୍ଟେଣ୍ଡେଣ୍ଟ ସୁଚିତ୍ରା ଦାସଙ୍କ ମୋବାଇଲ ନଂ. ୯୪୩୯୨୨୧୪୮୧କୁ ବାରମ୍ବାର ଯୋଗାଯୋଗ କରାଯାଇଥିଲେ ମଧ୍ୟ ତାଙ୍କ ସହ ସମ୍ପର୍କ ହୋଇପାରି ନ ଥିବାରୁ ପ୍ରତିକ୍ରିୟା ମିଳିପାରି ନାହିଁ। ତେବେ ଅନୁଗୋଳ ଜିଲାପାଳ ମନୋଜ କୁମାର ମହାନ୍ତି କହିଛନ୍ତି, ହେଉଥିବା ଅଭିଯୋଗର ଅନୁଧ୍ୟାନ କରାଯିବ।
(ଅମିତ କୁମାର ସାମଲ)