ପାଇକମାଳ, ୨୨।୧୨ (ଡି.ଏନ୍.ଏ.)- ବରଗଡ଼ ଜିଲା ପାଇକମାଳ ବ୍ଲକ ମାଣ୍ଡିଆଢ଼ିପା ପଁଚେତ୍ କେନାବୁଦା ଗଁାର ଅଜୟ ସାହୁକଁର ଝି’ ସୌଦାମିନୀ ସାହୁ(୮)। ସେ ୧୦୦ ପରତିଶତ ଭିନ୍ନକ୍ଷମ ଆଏ। ମେରୁହାଡ଼ରେ ଅସ୍ବିଧା ଲାଗି ସେ ମୁଡ଼ ସଲଖେଇ ରଖି ନାଇଁପାରବାର, ସବୁବେଲେ ଖଟେ ପଡ଼ି ରହିଛନ୍। ଡାକ୍ତରମାନକର କହେବାର ହିସାବେ ଉଚ ଚିକିଛା କଲେ ସୌଦାମିନୀ ଭଲ ହେଇଯିବେ। ହେଲେ ଅଜୟ ଝନେ ନିହାତି ଗରିବ୍ ଲୋକ୍ ହେଇଥିଲାବେଲେ ଅଭାବ ଅନାଟନରୁ ଝି’ର ଚିକିଛା କରେଇ ନାଇଁପାରବାର। ଇଆଡ଼େ ଅଜୟ ପାଇକମାଳ ବ୍ଲକରେ ଝି’ର ଭିନ୍ନକ୍ଷମ ଭତାର ଲାଗି ଅନେକ ଥର ଆବେଦନ କରି ନିରାଶ ହେଇଥିବାର କହିଛନ୍। ଜିଲା ପରଶାସନ ଇ ଦୁଖି ପରିବାର ଉପରେ ଦୁରୁଷ୍ଟି ଦେଇ ସୌଦାମିନୀକୁଁ ସରକାରୀ ଚିକିଛା ସାହାଯ୍, ଭିନ୍ନକ୍ଷମ ଭତା ଯୁଗେଇ ଦେବାକେ ଭିନେ ଭିନେ ମହଲରୁ ଦାବି ହେଉଛେ।