ବେଙ୍ଗାଲୁରୁ, ୩୧ା୭(ପି.ଟି.): କର୍ନାଟକର ପରବର୍ତ୍ତୀ ବାଚସ୍ପତି ହେବେ ଭାଜପା ବିଧାୟକ ବିଶ୍ୱେଶ୍ୱର ହେଗ୍ଡ଼େ କାଗେରି। ଏହି ପଦ ଲାଗି ସେ ଏକମାତ୍ର ପ୍ରାର୍ଥୀଭାବେ ନାମାଙ୍କନପତ୍ର ଦାଖଲ କରିଥିବାରୁ ବାଚସ୍ପତି ହେବା ନିଶ୍ଚିତ। ମଙ୍ଗଳବାର ଏଥିଲାଗି ନାମାଙ୍କନପତ୍ର ଦାଖଲ କରିବାର ଶେଷ ସମୟ ଥିଲା। ସମୟ ଅତିକ୍ରାନ୍ତ କରିଯିବା ପରେ କାଗେରି ପରବର୍ତ୍ତୀ ବାଚସ୍ପତି ହେବା ନିଶ୍ଚିତ ହୋଇଛି। କେ.ଆର୍. ରମେଶ ସୋମବାର ନିଜ ପଦରୁ ଇସ୍ତଫା ଦେବା ପରେ ଏହି ପଦ ଖାଲି ପଡ଼ିଥିଲା।
ସଚିବ ଏମ୍. କେ. ବିଶାଲାଖିଙ୍କ ନିକଟରେ ୬ ଥରର ବିଧାୟକ କାଗେରି ନାମାଙ୍କନପତ୍ର ଦାଖଲ କରିବାବେଳେ ମୁଖ୍ୟମନ୍ତ୍ରୀ ୟେଦୁରପ୍ପାଙ୍କ ସମେତ ଦଳର ବରିଷ୍ଠ ନେତା ଗୋବିନ୍ଦ କର୍ଜୋଲ, ଆର୍. ଅଶୋକ, ଜଗଦୀଶ ସେତ୍ତାର, କେ.ଏସ୍. ଇଶ୍ୱରପ୍ପା, ଏସ୍. ସୁରେଶ କୁମାର ପ୍ରମୁଖ ଉପସ୍ଥିତ ଥିଲେ। ସଂଘ ପରିବାରର ଛାତ୍ର ଶାଖା ଏବିଭିପି ସଦସ୍ୟ ହେବା ପରେ କାଗେରି ରାଜନୀତି ଚିଡ଼ି ଚଢିଥିଲେ ଓ ଏଥିରେ ସଫଳ ମଧ୍ୟ ହୋଇଥିଲେ। ୧୯୯୪ରୁ କର୍ନାଟକର ଆଙ୍କୋଲା ଆସନରୁ ସେ ବିଜୟୀ ହୋଇଆସୁଥିଲେ। ଭାଜପା ପାଖରେ ସଂଖ୍ୟାଗରିଷ୍ଠତା ଥିବାରୁ କଂଗ୍ରେସ ଓ ଜେଡିଏସ୍ ଏଥିଲାଗି ପ୍ରାର୍ଥୀ ଦେଇ ନ ଥିବା ପ୍ରକାଶ କରିଛନ୍ତି। ବୁଧବାର ବିଧାନସଭା ଅଧିବେଶନ ଆରମ୍ଭ ହେବା ପରେ କାଗେରି ବାଚସ୍ପତି ହେବା ସମ୍ପର୍କରେ ଘୋଷଣା କରାଯିବ ବୋଲି ଜଣାପଡ଼ିଛି।