ଭୁବନେଶ୍ୱର, ୨୭।୧୨(ବ୍ୟୁରୋ): ଶହୀଦନଗର ଇମ୍ପା ପାର୍କ ନିକଟରେ ତାମିଲନାଡୁର କଳା ତାଲିକାଭୁକ୍ତ ବସ୍ ଜଳିବା ଘଟଣାରେ ରହସ୍ୟ ବଢିବାରେ ଲାଗିଛି। ପୋଲିସ ବସ୍ ମାଲିକଙ୍କ ପତ୍ତା ପାଉ ନ ଥିବାବେଳେ ଏନେଇ ଥାନାରେ କୌଣସି ଅଭିଯୋଗ ହୋଇନାହିଁ। ବସ୍ରେ କିଏ ଓ କାହିଁକି ନିଆଁ ଲଗାଇଲା ଏବେବି ରହସ୍ୟ ଘେରରେ ରହିଛି। ଶୁକ୍ରବାର ଶହୀଦନଗର ଥାନା ପୋଲିସ ବସ୍ ମାଲିକଙ୍କ ପରିଚୟ ଓ ସମ୍ପୂର୍ଣ୍ଣ ଠିକଣା ଜାଣିବା ପାଇଁ ଭୁବନେଶ୍ୱର ଆରଟିଓକୁ ଚିଠି କରିବା ସହ ତଥ୍ୟ ହାସଲ କରିବ। ମାଲିକଙ୍କର ସମ୍ପୂର୍ଣ୍ଣ ପରିଚୟ ମିଳିବା ପରେ ହିଁ ବସ୍ଟି କର୍ନାଟକରୁ ଭୁବନେଶ୍ୱର ଆସିବାର ପ୍ରକୃତ ଉଦେଶ୍ୟ ଓ ସମସ୍ତ ରହସ୍ୟ ସ୍ପଷ୍ଟ ହେବ ବୋଲି ପୋଲିସ ଆଶା ରଖିଛି।
ସୂଚନା ମୁତାବକ, ଶହୀଦନଗର ପ୍ଲଟ୍ ନଂ.୩୧୬ ସମ୍ମୁଖ ରାସ୍ତା ପାର୍ଶ୍ୱରେ ଉକ୍ତ ବସ୍(କେଏ ୦୧ଡି ୫୧୮୦) ଦୀର୍ଘବର୍ଷ ଧରି ରହିଥିଲା। ଅସାମାଜିକମାନେ ବସ୍ ଭିତରେ ଆଡ୍ଡା ଜମାଇବା ସହ ନିଶା ସେବନ କରୁଥିଲେ। ବୁଧବାର ଅପରାହ୍ନ ପ୍ରାୟ ଗୋଟେ ୫୦ମିନିଟରେ ବସ୍ ଭିତରୁ ଧୂଆଁ ବାହାରୁଥିବା ସ୍ଥାନୀୟ ଲୋକେ ଦେଖିଥିଲେ। ଧୀରେ ଧୀରେ ଲୋକଙ୍କ ଭିଡ଼ ଜମିବା ସହ ଦମକଳ କେନ୍ଦ୍ର, ବିଦ୍ୟୁତ୍ ବିଭାଗ ଓ ଥାନାକୁ ଖବର ଦିଆଯାଇଥିଲା। ଅପରାହ୍ନ ପ୍ରାୟ ୨ଟା ୧୦ମିନିଟରେ ଅଗ୍ନିଶମ ବାହିନୀ ପହଞ୍ଚତ୍ବା ବେଳକୁ ନିଆଁ ଉଗ୍ରରୂପ ନେଇସାରିଥିଲା। ନିଆଁ ଲିଭାଇବାକୁ ପ୍ରାୟ ୨୦ ମିନିଟ୍ ସମୟ ଲାଗିଥିଲା। ବସ୍ର ସିଟ୍, ଡୋର ଓ ଅନ୍ୟାନ୍ୟ ଅଂଶ ପୂରା ପୋଡ଼ିଯାଇଥିଲା। ବସ୍ ଉପର ଦେଇ ଯାଇଥିବା କିଛି ବିଦ୍ୟୁତ୍ ତାର ମଧ୍ୟ ଜଳିଯାଇଥିଲା। ଅନ୍ୟପକ୍ଷରେ ଉକ୍ତ ବସ୍ଟିକୁ କର୍ନାଟକ ପରିବହନ ବିଭାଗ କଳା ତାଲିକାଭୁକ୍ତ କରିଥିବା ଜଣାପଡ଼ିଥିଲା।