ଭୁବନେଶ୍ୱର,୨୯ା୪(ବ୍ୟୁରୋ): ଭୁବନେଶ୍ୱରରେ ବ୍ୟବସାୟିକ କଟକଣାକୁ କୋହଳ କରାଯାଇଛି। ଏନେଇ ମଙ୍ଗଳବାର ଭୁବନେଶ୍ୱର ମହାନଗର ନିଗମ ପକ୍ଷରୁ ନିର୍ଦ୍ଦେଶନାମା ଜାରି କରାଯାଇଛି। ବୁଧବାରଠାରୁ ବିଏମ୍ସି ଅଞ୍ଚଳରେ ସମସ୍ତ ଅତ୍ୟାବଶ୍ୟକ ସାମଗ୍ରୀ ଦୋକାନ ଖୋଲା ରହିବ। ଗ୍ରସେରି, ଫଳ, ପନିପରିବା, ମାଛ,ମାଂସ, ଓମ୍ଫେଡ ଷ୍ଟଲ ଆଦି ଖୋଲା ରହିବ। ଏଥିସହ ଛୋଟ ଦୋକାନ, ଗ୍ୟାରେଜ୍, ମୋଟର ପାର୍ଟସ, ଲୁବ୍ରିକାଣ୍ଟ ଦୋକାନ ଖୋଲା ରହିବାକୁ ବିଏମ୍ସି ଅନୁମତି ଦେଇଛି। ମାର୍କେଟ କମ୍ପ୍ଲେକ୍ସ, ସପିଂ କମ୍ପ୍ଲେକ୍ସ, ମଲ୍ଟିବ୍ରାଣ୍ଡ ଶୋରୁମ୍ ଓ ମଲ୍ ସହ ସେଲୁନ୍, ଗେମ୍ ପାର୍ଲର, ମସାଜ୍ ସେଣ୍ଟର, ଜିମ୍, ପାନ, ଗୁଟ୍ଖା ଦେକାନ, ଚା’ କଫି ଷ୍ଟଲ, ଫାଷ୍ଟଫୁଡ୍ ଷ୍ଟଲ, ଜଳଖିଆ ଦୋକାନ ଓ ଜୁସ୍ ସେଣ୍ଟର ବନ୍ଦ ରଖାଯିବାକୁ ନିଷ୍ପତ୍ତି ନିଆଯାଇଛି।
ଭୁବନେଶ୍ୱରରେ ରିଲିୟାନ୍ସ, ବିଗ୍ବଜାର, ଫାଲକନ୍ ଫ୍ରେସ୍, ଚିଲିକା ଫ୍ରେସ୍ ପରି ଖାଦ୍ୟ ସାମଗ୍ରୀ ବିକ୍ରି କରୁଥିବା ଦୋକାନଗୁଡ଼ିକ ଖୋଲାଯିବ। ପଶୁଖାଦ୍ୟ, ମଞ୍ଜି, କୀଟନାଶକ ବିକ୍ରି ଦୋକାନ ମଧ୍ୟ ଖୋଲା ରହିବ। ସେହିପରି ଓଡ଼ିଶା ଶପ୍ସ ଓ କମର୍ସିଆଲ ଏଷ୍ଟାବ୍ଲିଶମେଣ୍ଟ ଆକ୍ଟ ୧୯୫୬ରେ ପଞ୍ଜୀକୃତ ହୋଇଥିବା ବ୍ୟବସାୟୀଙ୍କୁ ଦୋକାନ ଖୋଲିବାକୁ ଅନୁମତି ଦିଆଯାଇଛି। ବହି ଦୋକାନ, ହୋମ୍ ଡେଲିଭରି କରୁଥିବା ରେଷ୍ଟୁରାଣ୍ଟ ଖୋଲିବ। ଘରୋଇ ଇଲେକ୍ଟ୍ରିସିଆନ, ପ୍ଲମ୍ବର, କାର୍ପେଣ୍ଟର ମରାମତି ଦୋକାନ ଆଦି ଖୋଲାରହିବ। ବ୍ୟାଙ୍କ ଏଟିମ୍ ସହ ଅନ୍ୟ ବ୍ୟାଙ୍କିଂ କାର୍ଯ୍ୟାଳୟରେ ୩୦ ପ୍ରତିଶତ କର୍ମଚାରୀଙ୍କୁ ନେଇ କାର୍ଯ୍ୟ କରିବ। ବନ୍ଦଥିବା ପେଟ୍ରୋଲ ପମ୍ପ, ହୋଟେଲ, ଲଜ୍ଗୁଡ଼ିକୁ ଖୋଲାଯିବାକୁ ବିଏମ୍ସି ନିର୍ଦ୍ଦେଶ ଦେଇଥିବା ଜଣାପଡ଼ିଛି। ସେହିପରି ନିର୍ମାଣ କାର୍ଯ୍ୟ ଜାରି ରହିବ। ନିର୍ମାଣ ସ୍ଥଳକୁ ଆଇରନ ରଡ, ସିମେଣ୍ଟ, ଚିପ୍ସ ଆଦି ପରିବହନ କରାଯାଇପାରିବ। ଶିଳ୍ପ ଓ ବଡ଼ ବଡ଼ ବ୍ୟବସାୟିକ ପ୍ରତିଷ୍ଠାନରେ ୨୫% କର୍ମଚାରୀ କାମ କରିବେ।
ବ୍ୟବସାୟ ପ୍ରତିଷ୍ଠାନ ଖୋଲିବା ପାଇଁ ବିଏମ୍ସି ପକ୍ଷରୁ କିଛି ଗାଇଡ୍ଲାଇନ୍ ମଧ୍ୟ ଜାରି କରାଯାଇଛି। ଖୋଲାଯିବାକୁ ଥିବା ଦୋକାନରେ ଏକ ସମୟରେ ସର୍ବାଧିକ ୫ଜଣ ଲୋକ ରହିପାରିବେ, ସାମାଜିକ ଦୂରତ୍ୱ, ମାସ୍କ ପିନ୍ଧିବା ସହ ହ୍ୟାଣ୍ଡୱାଶ୍, ସାନିଟାଇଜର ରଖିବାକୁ ବାଧ୍ୟତାମୂଳକ କରାଯାଇଛି। ସେହିପରି ଥଣ୍ଡା, କଫ, କାଶ କିମ୍ବା ଜ୍ୱର ହୋଇଥିବା କର୍ମଚାରୀଙ୍କୁ ଦୋକାନକୁ ଆସିବାକୁ ବାରଣ କରିବା ପାଇଁ କୁହାଯାଇଛି। ବର୍ତ୍ତମାନ ପରିବା ବ୍ୟବସାୟୀମାନେ ଯେଉଁଠି ବ୍ୟବସାୟ କରୁଛନ୍ତି ସେହିପରି କରିବେ। ମୁଖ୍ୟ ମାର୍କେଟକୁ ଆସିବେ ନାହିଁ। ମେଡିସିନ ଷ୍ଟୋର ଓ ଅତ୍ୟାବଶ୍ୟକ ସାମଗ୍ରୀକୁ ଛାଡ଼ି ଅନ୍ୟସମସ୍ତ ଦୋକାନ ସକାଳ ୮ଟାରୁ ସନ୍ଧ୍ୟା ୬ଟା ଯାଏ ଖୋଲା ରହିବ ଓ ଟ୍ରେଡ୍ ଲାଇସେନ୍ସ ପ୍ରମାଣପତ୍ରର ଏକ ଅବିକଳ ନକଲ ଦୋକାନରେ ରଖିବାକୁ ବିଏମ୍ସି ପରାମର୍ଶ ଦେଇଥିବା ଜଣାପଡ଼ିଛି।