ଭୁବନେଶ୍ୱରରେ ଖୁନ୍ଦି ହୋଇଗଲେଣି ପଶ୍ଚିମବଙ୍ଗ ଶ୍ରମିକ: ସୀମାରେ ନାହିଁ ଯାଞ୍ଚ, ଜଟିଳ କରିବ କରୋନା ସ୍ଥିତି
06 ଭୁବନେଶ୍ୱର,୨୧।୬(ବ୍ୟୁରୋ): ଲକ୍ଡାଉନ୍ ହଟିବା ପରେ ଭୁବନେଶ୍ୱରକୁ ସମସ୍ତଙ୍କର ଅବାଧ ପ୍ରବେଶ ଚାଲିଛି। ବିଶେଷକରି ପଶ୍ଚିମବଙ୍ଗ ଶ୍ରମିକଙ୍କ ଧାଡ଼ି ଛୁଟୁଛି। ଏବେ ସହରରେ ନିର୍ମାଣ ଓ ଅନ୍ୟ କାମଧନ୍ଦା ଆରମ୍ଭ ହୋଇଥିବାରୁ କଣ୍ଟ୍ରାକ୍ଟରମାନେ ପଶ୍ଚିମବଙ୍ଗରୁ ଶ୍ରମିକଙ୍କୁ ଆଣି କାମରେ ଲଗାଉଛନ୍ତି। ଫଳରେ ସବୁଆଡେ ପଶ୍ଚିମବଙ୍ଗ ଶ୍ରମିକ ଖୁନ୍ଦି ହୋଇଗଲେଣି। ପଶ୍ଚିମବଙ୍ଗରେ କରୋନା ହୁହୁ ହୋଇ ମାଡ଼ି ଚାଲିଥିବାରୁ ଏହି ଶ୍ରମିକଙ୍କ ମଧ୍ୟରେ କିଏ ସଂକ୍ରମିତ ତାହା ଜାଣିବା ମୁସ୍କିଲ୍। ଗୋଟିଏ ପକ୍ଷରେ ଏମାନଙ୍କ ପାଇଁ ଭୁବନେଶ୍ୱରରେ ସଂକ୍ରମଣ ବୃଦ୍ଧି ପାଇବା ଆଶଙ୍କା ରହୁଥିବାବେଳେ ଅନ୍ୟପକ୍ଷରେ ସ୍ଥାନୀୟ ଶ୍ରମିକ କାମଧନ୍ଦା ନ ପାଇ ଦୁର୍ବିଷହ ଜୀବନ ବିତାଉଛନ୍ତି।
ଶୁକ୍ରବାର ବିଳମ୍ବିତ ରାତିରେ ପଶ୍ଚିମବଙ୍ଗ ମେଦିନପୁରର ୧୬ଜଣ ଶ୍ରମିକ ବାଲେଶ୍ୱର ଦେଇ ଭୁବନେଶ୍ୱରରେ ପହଞ୍ଚତ୍ଛନ୍ତି। ଜଣେ ନିର୍ମାଣ କଣ୍ଟ୍ରାକ୍ଟର ସେମାନଙ୍କୁ ଆସିବାକୁ ବାଧ୍ୟ କରିଥିବା ଓ ସୀମାରେ କିଛି ବି ଯାଞ୍ଚ କରାଯାଇ ନ ଥିବା ସେମାନେ କହିଛନ୍ତି। ତେବେ ଶ୍ରମିକମାନେ ଶୁକ୍ରବାର ରାତିରେ ଶହୀଦନଗରରେ ପହଞ୍ଚତ୍ଥିବା ଜାଣିବା ପରେ ସ୍ଥାନୀୟ ଲୋକେ ବିଏମ୍ସିକୁ ଅଭିଯୋଗ କରିଥିଲେ। ଶହୀଦ ନଗରର ରିଙ୍କୁ ସାହୁ କହିଛନ୍ତି, ବମିଖାଲ ଓଭରବ୍ରିଜ୍ ପାର୍ଶ୍ୱରେ ଏକ ନୂଆ ବିଲ୍ଡିଂର ନିର୍ମାଣ କାମ ବନ୍ଦ ରହିଥିଲା। ଶୁକ୍ରବାର ରାତିରେ ହଠାତ୍ ସେଠାରେ କୋଳାହଳ ଶୁଭିଲା। କେତେଜଣ ଶ୍ରମିକ ରାସ୍ତା ଉପରେ ବୁଲାବୁଲି କରୁଥିବା ଦେଖି ପଚାରିବାରୁ ସେମାନେ ପଶ୍ଚିମବଙ୍ଗରୁ ଆସି ପହଞ୍ଚତ୍ଥିବା କହିଥିଲେ। ଖବର ପାଇବା ପରେ ବିଏମ୍ସି ଜୋନାଲ କାର୍ଯ୍ୟାଳୟର ଜଣେ କର୍ମଚାରୀ ଶନିବାର ସକାଳେ ସେଠାକୁ ଆସି ଘଟଣା ବିଷୟରେ ପଚାରି ବୁଝିବା ସହ ନିର୍ମାଣ କାର୍ଯ୍ୟ ବନ୍ଦ କରିଛନ୍ତି। ଶଟ୍ ଡାଉନ୍ ପାଇଁ କେହି ବି ସେମାନଙ୍କ ସଂସ୍ପର୍ଶରେ ଆସି ନାହାନ୍ତି। ବର୍ତ୍ତମାନ ସମସ୍ତ ଜୋନ୍ରେ ଜାରି ରହିଥିବା ନିର୍ମାଣ କାର୍ଯ୍ୟ ଉପରେ ବିଏମ୍ସି ନଜର ରଖିଥିବା ଅଧିକାରୀ ଜଣକ କହିଛନ୍ତି।
ଉଲ୍ଲେଖଯୋଗ୍ୟ, ଏଣିକି ବିଏମ୍ସି ଅଞ୍ଚଳରେ ନିର୍ମାଣ କାର୍ଯ୍ୟରେ କେବଳ ସ୍ଥାନୀୟ ଶ୍ରମିକଙ୍କୁ ନିୟୋଜିତ କରିବାକୁ ନିର୍ଦ୍ଦେଶ ଦିଆଯାଇଛି। ହେଲେ କେତେକ କଣ୍ଟ୍ରାକ୍ଟର ଉକ୍ତ ନିୟମକୁ ବେଖାତିର କରି ପଶ୍ଚିମବଙ୍ଗ, ଛତିଶଗଡ଼ ସମେତ ଅନ୍ୟ ରାଜ୍ୟରୁ ଶ୍ରମିକଙ୍କୁ ଆଣୁଛନ୍ତି। ଏନେଇ ବିଏମ୍ସି କମିଶନର ପ୍ରେମ୍ଚନ୍ଦ୍ର ଚୌଧାରୀଙ୍କ କୌଣସି ପ୍ରତିକ୍ରିୟା ମିଳିପାରି ନ ଥିବାବେଳେ ଏହି ଘଟଣାକୁ ନେଇ ବରିଷ୍ଠ ଅଧିକାରୀଙ୍କ ମଧ୍ୟରେ ଶନିବାର ଆଲୋଚନା ହୋଇଥିବା ସୂଚନା ମିଳିଛି। ଖୁବ୍ଶୀଘ୍ର ଉକ୍ତ କଣ୍ଟ୍ରାକ୍ଟରମାନଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ନିଷ୍ପତ୍ତି ହୋଇଥିବା ଜଣାପଡିଛି।