ଭୁବନେଶ୍ୱର,୮।୪(ବ୍ୟୁରୋ): କରୋନା ବିଶ୍ୱ ମହାମାରୀ ରୂପ ନେଇସାରିଲାଣି। ରାଜ୍ୟ, ଦେଶ ତଥା ସମଗ୍ର ମାନବ ସମାଜ ଏହାର ମୁକାବିଲା କରିବା ପାଇଁ ଉଦ୍ୟମ ଅବ୍ୟାହତ ରଖିଛି। ପଞ୍ଚାୟତସ୍ତରରୁ ଆରମ୍ଭକରି ରାଜ୍ୟ ଏବଂ ରାଜ୍ୟରୁ ଜାତୀୟସ୍ତର ପର୍ଯ୍ୟନ୍ତ କରୋନା ଭୂତାଣୁ ସମ୍ପର୍କିତ ପରୀକ୍ଷାକୁ ଅଧିକ ଗୁରୁତ୍ୱ ଦିଆଯାଉଛି। ସ୍ବଳ୍ପ ଦିନରୁ ନମୁନା ପରୀକ୍ଷା କରି ସଂକ୍ରମିତ ସଂଖ୍ୟା ଜାଣିବା ହିଁ ଆରୋଗ୍ୟର ପ୍ରଥମ ସୋପାନ। ଏହାକୁ ଦୃଷ୍ଟିରେ ରଖି ରାଜ୍ୟରେ ଦିନକୁ ୧୦୦୦ ତଥା ତଦୂର୍ଦ୍ଧ୍ୱ ନମୁନା ପରୀକ୍ଷା ପାଇଁ ଚେଷ୍ଟା କରାଯାଉଛି। ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଧ୍ୟ ଏ ନେଇ ସମସ୍ତ ଅଧିକାରୀ ଏବଂ ସ୍ବାସ୍ଥ୍ୟ ବିଭାଗକୁ ସୋମବାର ନିର୍ଦ୍ଦେଶ ଦେଇଛନ୍ତି।
ଏହି କ୍ରମରେ କେନ୍ଦ୍ର ମଧ୍ୟ ରାଜ୍ୟଗୁଡ଼ିକୁ ଯଥାସମ୍ଭବ ସହଯୋଗର ହାତ ବଢ଼ାଇଛି। ଭାରତୀୟ ବାୟୁସେନାର ୨ଟି ଏଏନ୍-୩୨ ଏୟାରକ୍ରାଫ୍ଟ ୧୯ ଅଧିକାରୀ ଏବଂ ୩୫୦୦ କିଲୋ ଗ୍ରାମର ମେଡିକାଲ ସାମଗ୍ରୀ ନେଇ ଭୁବନେଶ୍ୱରରେ ପହଞ୍ଚିଛି। ଏହି ବିମାନ ଦ୍ୱୟ ତମବରମସ୍ଥିତ ଆଇସିଏମ୍ଆର୍ରୁ ଏହି ସାମଗ୍ରୀ ଆଣିଛି। ଏ ସମ୍ପର୍କରେ ବାୟୁସେନା ପକ୍ଷରୁ ଟୁଇଟରରେ ସୂଚନା ଦିଆଯାଇଛି। ଏହି ଟୁଇଟରଟିକୁ ଓଡ଼ିଶା ସରକାରଙ୍କ ସ୍ବାସ୍ଥ୍ୟ ଓ ପରିବାର କଲ୍ୟାଣ ବିଭାଗ ପକ୍ଷରୁ ମଧ୍ୟ ରିଟୁଇଟ୍ କରାଯାଇଛି। ଆସିଥିବା ସାମଗ୍ରୀ ଓଡ଼ିଶାରେ କରୋନା ସମ୍ପର୍କିତ ନମୁନା ପରୀକ୍ଷା ଭିତ୍ତିଭୂମିକୁ ସୁଦୃଢ଼ କରିବ ବୋଲି ଜଣାଯାଇଛି। ବାୟୁସେନା ପକ୍ଷରୁ ସହାୟତା କରାଯାଇଥିବାରୁ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏବଂ ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ(ସିଏମ୍ଓ) ପକ୍ଷରୁ ଧନ୍ୟବାଦ ଦିଆଯାଇଛି।