ଭୁବନେଶ୍ୱର,୨ା୧(ବ୍ୟୁରୋ): ଜଳବାୟୁ ପରିବର୍ତ୍ତନ ସମଗ୍ର ବିଶ୍ୱ ପାଇଁ ବଡ଼ ଚ୍ୟାଲେଞ୍ଜ ସୃଷ୍ଟି କରିଛି। ବିଶେଷ କରି ସହରାଞ୍ଚଳ ଜଳବାୟୁ ପରିବର୍ତ୍ତନ ଚିନ୍ତା ବଢାଇଲାଣି। ଜଳବାୟୁ ପରିବର୍ତ୍ତନକୁ ଦୃଷ୍ଟିରେ ରଖି ପ୍ରଥମ ପର୍ଯ୍ୟାୟରେ ଦେଶର ୫ ସହରରେ ଡପ୍ଲାର ରାଡାର ଲଗାଇବାକୁ ଭାରତୀୟ ପାଣିପାଗ ବିଭାଗ(ଆଇଏମ୍ଡି) ନିଷ୍ପତ୍ତି ନେଇଛି। ସେଥିମଧ୍ୟରୁ ଓଡ଼ିଶାର ଭୁବନେଶ୍ୱରରେ ଏକ ଡପ୍ଲାର ରାଡାର ସ୍ଥାପନ କରାଯିବ। ସହରାଞ୍ଚଳ ପାଣିପାଗ ସତର୍କତା ଯୋଜନାରେ ଏହି ଡପ୍ଲାର ରାଡାର ସ୍ଥାପନ କରାଯିବ। ଏହି ରାଡାର ଜରିଆରେ କଟକ, ଭୁବନେଶ୍ୱର, ଖୋର୍ଦ୍ଧା, ପୁରୀ, ନୟାଗଡ ସହରାଞ୍ଚଳକୁ ଜଳବାୟୁ ସମ୍ପର୍କିତ ସତର୍କ ସୂଚନା ଆଗୁଆ ପ୍ରଦାନ କରାଯିବ। ଏହି ରାଡାର ବର୍ଷା, ବଜ୍ରପାତ, ଘୂର୍ଣ୍ଣିଝଡ, ଧୂଳିଝଡ, ବାୟୁମଣ୍ଡଳର ତାପ ଓ ଚାପ, ତାପମାତ୍ରା ଭଳି ବିିଭିନ୍ନ ସତର୍କ ସୂଚନା ପ୍ରଦାନ କରିବ। ଏହାଛଡ଼ା ସହରର କେଉଁ ଅଞ୍ଚଳରେ କେତେ ବର୍ଷା ଓ ତାତି ହେଉଛି ସେ ସମ୍ପର୍କରେ ମଧ୍ୟ ସୂଚନା ମିଳିପାରିବ। ଏହି ସୂଚନା ଆଧାରରେ ରାଜ୍ୟ ସରକାର ଯୋଜନା ପ୍ରସ୍ତୁତ କରିବେ। ଏ ନେଇ ଜାତୀୟ ସ୍ତରର ଏକ କର୍ମଶାଳା ଚଳିତ ମାସ ଶେଷ ସପ୍ତାହ କିମ୍ବା ଫେବୃୟାରୀ ପ୍ରଥମ ସପ୍ତାହରେ ହେବ। ଭାରତୀୟ ପାଣିପାଗ ବିଭାଗ ଏହି ପ୍ରକଳ୍ପର ସମସ୍ତ ଖର୍ଚ୍ଚ ବହନ କରିବ। ଭୁବନେଶ୍ୱରର କେଉଁ ସ୍ଥାନରେ ଏହା ଲାଗିବ ତାହା ସର୍ଭେ କରାଯାଇ ନିଷ୍ପତ୍ତି ନିଆଯିବ ବୋଲି ସ୍ବତନ୍ତ୍ର ରିଲିଫ କମିଶନରଙ୍କ କାର୍ଯ୍ୟାଳୟର ଜଣେ ବରିଷ୍ଠ ଅଧିକାରୀ କହିଛନ୍ତି।
ପରିବର୍ତ୍ତିତ ଜଳବାୟୁ କାରଣରୁ ବିଭିନ୍ନ ସମୟରେ ଘଟୁଥିବା ଆକସ୍ମିକ ପ୍ରାକୃତିକ ବିପର୍ଯ୍ୟୟ ଯୋଗୁ ବହୁ ମାତ୍ରାରେ ଧନଜୀବନ ନଷ୍ଟ ହେଉଛି। ଏସବୁର ପୂର୍ବ ସୂଚନା ମିଳିପାରୁ ନ ଥିବାରୁ କ୍ଷୟକ୍ଷତିର ମାତ୍ରା ବହୁ ପରିମାଣରେ ବଢ଼ିଯାଉଛି। ଗତ ମୌସୁମୀ ବର୍ଷା ସମୟରେ ଦେଶର ବିଭିନ୍ନ ସହରରେ ଭିନ୍ନ ଭିନ୍ନ ଚିତ୍ର ଦେଖିବାକୁ ମିଳିଥିଲା। କେଉଁଠି ଜଳାର୍ଣ୍ଣବ ତ କେଉଁଠି ପାଣି ଟିକେ ପାଇଁ ହାହାକାର। ଜୁଲାଇ ଓ ଅଗଷ୍ଟ ମାସ ବର୍ଷାରେ ଦେଶର ୧୦ଟି ସ୍ଥାନରେ ଅଲଗା ଅଲଗା ଚିତ୍ର ଦେଖିବାକୁ ମିଳିଥିଲା। ଆସାମ, ପାଟନା, ମୁମ୍ବାଇ, ପ୍ରୟାଗରାଜରେ ପ୍ରବଳ ବର୍ଷା ଯୋଗୁ ଜଳମଗ୍ନ ହୋଇ ଯାଇଥିଲା। ଗୋଟିଏ ପଟେ ପ୍ରବଳ ବର୍ଷା ହେଉଥିବା ବେଳେ ସେହି ଏକା ସମୟରେ ନାଗପୁର, ଚେନ୍ନାଇ, ହାଇଦ୍ରାବାଦ, ବେଙ୍ଗାଲୁରୁ ଭଳି ସହରରେ ଜଳ ସଙ୍କଟ ଦେଇଦେଇଥିଲା। ରାଜଧାନୀ ନୂଆଦିଲ୍ଲୀରେ ଧୂଳିଝଡ ପରିବେଶକୁ ପ୍ରଦୂଷିତ କରି ଦେଇଥିଲା। ଗୋଟିଏ ସମୟରେ ଦେଶର ସହରଗୁଡିକରେ ଭିନ୍ନ ଭିନ୍ନ ଜଳବାୟୁ ଚିନ୍ତା ବଢାଇଲାଣି। ଏପରି କି ଗୋଟିଏ ସହରରେ ମଧ୍ୟ ଜଳବାୟୁରେ ଅନେକାଂଶରେ ପାର୍ଥକ୍ୟ ଦେଖା ଦେଉଛି। ଏହାକୁ ଦୃଷ୍ଟିରେ ରଖି ସହରାଞ୍ଚଳର ଜଳବାୟୁକୁ ଅନୁଧ୍ୟାନ କରିବାକୁ ଆଇଏମ୍ଡି ପକ୍ଷରୁ ଦେଶର ବିଭିନ୍ନ ସହରରେ ଡପ୍ଲାର ରାଡାର ସ୍ଥାପନ କରିବାକୁ ଯୋଜନା ରହିଛି ବୋଲି ଆଞ୍ଚଳିକ ପାଣିପାଗ ନିର୍ଦ୍ଦେଶକ ଏଚ.ଆର. ବିଶ୍ୱାସ କହିଛନ୍ତି।