ଭୁବନେଶ୍ୱର,୧୭ା୧(ବ୍ୟୁରୋ): ସହରାଞ୍ଚଳ ବିକାଶକୁ ନେଇ ଗଢାଯାଇଥିବା ସଂସଦୀୟ ଷ୍ଟାଣ୍ଡିଂ କମିଟିର ୨୦ ଜଣ ସଦସ୍ୟା, ସଦସ୍ୟ ଏବଂ ୫ ଜଣ ସଂସଦୀୟ ବ୍ୟାପାର ଅଧିକାରୀ ଓଡ଼ିଶା ପରିଦର୍ଶନରେ ଆସୁଛନ୍ତି। ଏହି କମିଟି ସିଧାସଳଖ କ୍ଷେତ୍ର ପରିଦର୍ଶନ କରି ୨୦୧୯-୨୦ ମସିହାରେ ଚିହ୍ନିଟ ହୋଇଥିବା ବିଷୟଗୁଡ଼ିକୁ ଅନୁଧ୍ୟାନ କରିବେ। ସହରାଞ୍ଚଳ ବିକାଶ ନିମନ୍ତେ ଗଠିତ ସଂସଦୀୟ ଷ୍ଟାଣ୍ଡିଂ କମିଟି ଜାନୁୟାରୀ ୧୫ ରୁ ୨୦ତାରିଖ ମଧ୍ୟରେ ଇନ୍ଦୋର, ମୁମ୍ବାଇ, ଭୁବନେଶ୍ୱର ଏବଂ କୋଲକାତା ଆଦି ସହର ପରିଦର୍ଶନ କରିବାକୁ ଥିବା ବେଳେ ଶୁକ୍ରବାର ସେମାନେ ଭୁବନେଶ୍ୱର ପରିଦର୍ଶନ କରିବାକୁ ଆସୁଛନ୍ତି। ଷ୍ଟାଣ୍ଡିଂ କମିଟି ନଗର ଉନ୍ନୟନ ବିଭାଗର କେତେକ ପ୍ରକଳ୍ପ, ଯଥା-ସ୍ମାର୍ଟ ସିଟି ପ୍ରକଳ୍ପ, ଅମୃତ ପ୍ରକଳ୍ପ (ଅଟଳ ମିଶନ ଫର୍ ରିଜୁଭେନେଶନ ଆଣ୍ଡ ଅର୍ବାନ ଟ୍ରାନ୍ସଫର୍ମେଶନ୍), କଠିନ ବର୍ଜ୍ୟବସ୍ତୁ ପରିଚାଳନା, ସହରୀ ବନ୍ୟାର ପରିଚାଳନା, ପାନୀୟ ଜଳଯୋଗାଣ, ଜାତୀୟ ସହରାଞ୍ଚଳ ବିକାଶ ଯୋଜନା ଏବଂ ସହରାଞ୍ଚଳ ଜୀବିକା ମିଶନ ଇତ୍ୟାଦିର ସମୀକ୍ଷା କରିବେ। ଶନିବାର ଏହି କମିଟି ପୁରୀ ଯାଇ ଜାତୀୟ ଐତିହ୍ୟ ବିକାଶ ଏବଂ ସହରାଞ୍ଚଳ ବିକାଶ ଯୋଜନା, କଠିନ ଏବଂ ତରଳ ବର୍ଜ୍ୟ ପରିଚାଳନା ତଥା ଅମୃତ୍ ଯୋଜନାର ସମୀକ୍ଷା କରିବେ। ଏହା ସହ ଜଗନ୍ନାଥ ମନ୍ଦିର ଦର୍ଶନ କରିବାର କାର୍ଯ୍ୟକ୍ରମ ରହିଛି। ରବିବାର କୋଣାର୍କ ମନ୍ଦିରର ଭାସ୍କର୍ଯ୍ୟ ଏବଂ ମନ୍ଦିର ଶୈଳୀ ଦେଖିବାର କାର୍ଯ୍ୟକ୍ରମ ରହିଛି। ସୂଚନାଯୋଗ୍ୟ, ଉକ୍ତ ସଂସଦୀୟ କମିଟିର ପରିଦର୍ଶନ ନିମନ୍ତେ ନଗର ଉନ୍ନୟନ ବିଭାଗର ପଦାଧିକାରୀ, ଭୁବନେଶ୍ୱର ସ୍ମାର୍ଟ ସିଟି ଲିମିଟେଡର ପଦାଧିକାରୀ ଏବଂ ଭୁବନେଶ୍ୱର ମହାନଗର ନିଗମର ପଦାଧିକାରୀମାନେ ଉପସ୍ଥିତ ରହି କାର୍ଯ୍ୟକ୍ରମ ସଂଯୋଜନା କରିବା ପାଇଁ ଧାର୍ଯ୍ୟ ହୋଇଛି।