ଭୁବନେଶ୍ୱର,୧୮ା୯(ବ୍ୟୁରୋ) : ଭୁବନେଶ୍ୱର ବିଜୁ ପଟ୍ଟନାୟକ ଅନ୍ତର୍ଜାତୀୟ ବିମାନ ବନ୍ଦରରେ କେତେକ ମରାମତି କାର୍ଯ୍ୟ କରାଯିବ। ନଭେମ୍ବର ୧ରୁ ଆସନ୍ତାବର୍ଷ ଜୁନ୍ ୩୦ ପର୍ଯ୍ୟନ୍ତ ରନ୍ଓ୍ବେର ରିକାର୍ପେଟିଂ ହେବ। ଏଥିପାଇଁ ଏହି ୮ ମାସ ଧରି ପର୍ଯ୍ୟାୟକ୍ରମେ ରନ୍ଓ୍ବେକୁ ବନ୍ଦ ରଖାଯିବ। ତେବେ ଏହି ସମୟରେ ବିମାନ ଚଳାଚଳ କରିବ। ଏଥିସହ ୩ ଟ୍ୟାକ୍ସି ଟ୍ରାକ୍ ନିର୍ମାଣ ହେବ ବୋଲି ବିମାନବନ୍ଦର ନିର୍ଦ୍ଦେଶକ ସୁରେଶ ଚନ୍ଦ୍ର ହୋତା କହିଛନ୍ତି। ତାଙ୍କ ସୂଚନାନୁସାରେ, ଏହି ମରାମତି କାର୍ଯ୍ୟକୁ ଦୁଇ ଭାଗରେ ବିଭକ୍ତ କରାଯାଇଛି। ନଭେମ୍ବରରୁ ଆରମ୍ଭ ହେବାକୁ ଥିବା ରିକାର୍ପେଟିଂ କାମ ୩୧ ମାର୍ଚ୍ଚ ପର୍ଯ୍ୟନ୍ତ ରାତି ୧୦ଟାରୁ ଭୋର୍ ୫ଟା ୩୦ ପର୍ଯ୍ୟନ୍ତ ଚାଲିବ। ୧ ଏପ୍ରିଲରୁ ଆରମ୍ଭ ହେବାକୁ ଥିବା ମରାମତି କାମ ଦିନବେଳା ଅର୍ଥାତ୍ ପୂର୍ବାହ୍ନ ୧୦ଟାରୁ ସନ୍ଧ୍ୟା ୬ଟା ପର୍ଯ୍ୟନ୍ତ ଚାଲିବ। ତେବେ ଏହି ସମୟ ଭିତରେ ବିମାନ ଚଳାଚଳ ବାଧାପ୍ରାପ୍ତ ନ ହେବା ପାଇଁ ବିମାନର ସମୟ ସାରଣୀ ପରିବର୍ତ୍ତନ ହେବ। ଅନ୍ତର୍ଜାତୀୟ ବିମାନକୁ ମିଶାଇ ମୋଟ ୪ ବିମାନର ସମୟ ପୁନଃ ଧାର୍ଯ୍ୟ କରାଯିବ। ଏ ସମ୍ପର୍କରେ ବିମାନ ଚଳାଚଳ ସଂସ୍ଥାଗୁଡିକ ସହିତ ଆଲୋଚନା କରାଯାଇଛି। ଏନେଇ ଭାରତୀୟ ବିମାନ ବନ୍ଦର ପ୍ରାଧିକରଣ ମଧ୍ୟ ସେମାନଙ୍କ ସହ ଆଲୋଚନା କରିଛନ୍ତି। ୨୮ ଅକ୍ଟୋବରରୁ ବିମାନଗୁଡିକର ଚଳାଚଳ ସମୟ ପୁନଃ ଧାର୍ଯ୍ୟ କରିବାକୁ ଉଡାଣ ସଂସ୍ଥାଗୁଡିକୁ କୁହାଯାଇଛି ବୋଲି ନିର୍ଦ୍ଦେଶକ ହୋତା ଜଣାଇଛନ୍ତି। ୨୦୦୭ରେ ଶେଷଥର ପାଇଁ ଭୁବନେଶ୍ୱର ବିମାନ ବନ୍ଦରରେ ରନ୍ଓ୍ବେ ମରାମତି କାର୍ଯ୍ୟ ହୋଇଥିଲା। ବିମାନବନ୍ଦର ପ୍ରାଧିକରଣର ଗାଇଡ୍ଲାଇନ୍ ଅନୁସାରେ ପ୍ରାୟତଃ ପ୍ରତି ୧୦ ବର୍ଷରେ ଏହି ରିକାର୍ପେଟିଂ କରାଯାଇଥାଏ। କିନ୍ତୁ ଏହା ରନ୍ଓ୍ବେର ବ୍ୟବହାର ଉପରେ ନିର୍ଭର କରୁଛି। ଯଦି କୌଣସି ରନ୍ଓ୍ବେର ବ୍ୟବହାର କମ୍ ହେଉଛି, ତାହାର ରିକାର୍ପେଟିଂ ସମୟ ବ୍ୟବଧାନ ଅଧିକ ହୋଇପାରେ। ଏଥିଲାଗି ସମୁଦାୟ ୨୮ କୋଟି ଟଙ୍କା ଖର୍ଚ୍ଚ ହେବ। ଭାରତୀୟ ବିମାନବନ୍ଦର ପ୍ରାଧିକରଣଙ୍କଠାରୁ ଏନେଇ ସହମତି ମିଳିସାରିଥିବା ବେଳେ ଡିଜିସିଏର ଅନୁମତିକୁ ଅପେକ୍ଷା କରାଯାଇଛି।