ଭୁବନେଶ୍ୱର, ୨୭ା୧୧(ବ୍ୟୁରୋ): ବିଶାଖାପାଟଣା ପରେ ଏବେ ଭୁବନେଶ୍ୱର ରେଳ ଷ୍ଟେଶନକୁ ମିଳିବାକୁ ଯାଉଛି ଇଣ୍ଟରନ୍ୟାଶନାଲ ଅର୍ଗାନାଇଜେଶନ ଫର୍ ଷ୍ଟାଣ୍ଡାର୍ଡାଇଜେଶନ(ଆଇଏସ୍ଓ) ସାର୍ଟିଫିକେଟ୍। ସେହିଭଳି କଟକ ଷ୍ଟେଶନ ମଧ୍ୟ ଏହି ଦୌଡ଼ରେ ରହିଛି। ଏଥିପାଇଁ ମଙ୍ଗଳବାର ଭୁବନେଶ୍ୱର ଓ କଟକ ରେଳ ଷ୍ଟେଶନରେ ଆଇଏସ୍ଓ ପକ୍ଷରୁ ସର୍ଭେ ହୋଇଛି। ପ୍ରଥମ ପର୍ଯ୍ୟାୟ ସର୍ଭେରେ ଦୁଇ ରେଳ ଷ୍ଟେଶନର ଭିିତ୍ତିଭୂମି, ମୌଳିକ ସୁବିଧା, ବିଭିନ୍ନ ସେବା ଓ ଆବଶ୍ୟକତା ଯାଞ୍ଚ କରାଯାଇଛି। ବିଶେଷକରି ସର୍ଭେରେ ସ୍ବଚ୍ଛତାକୁ ମୂଳ ଆଧାର କରାଯାଇଛି। ଷ୍ଟେଶନ ପରିସର, ଟ୍ରାକ୍ର ସ୍ବଚ୍ଛତା ସହ ସେଠାରେ ମିଳୁଥିବା ଖାଦ୍ୟ ପଦାର୍ଥର ମାନ ଆଦି ଯାଞ୍ଚ କରାଯାଉଛି। ସଫେଇ, ଶୁଖିଲା ଏବଂ ଓଦା ଡଷ୍ଟବିନ୍ର ସଠିକ୍ ବ୍ୟବହାର, ଟ୍ୟାପ୍ରେ ପାଣି ଆସୁଛି କି ନାହିଁ, ପାଣି ଓ ବିଦ୍ୟୁତ୍ ସଞ୍ଚୟ, ଖୋଲା ଖାଦ୍ୟ ପଦାର୍ଥକୁ କେମିତି ପରଷାଯାଉଛି, ପ୍ଲାଟଫର୍ମର ଦୋକାନୀମାନେ ଗ୍ଲୋବ୍ସ ବ୍ୟବହାର କରୁଛନ୍ତି କି ନାହିଁ, ଅଗ୍ନି ନିର୍ବାପକ ଯନ୍ତ୍ର କାମ କରୁଛି କି ନାହିଁ, ଶୌଚାଳୟରେ ହ୍ୟାଣ୍ଡଓ୍ବାଶ ତଥା ସାବୁନ୍ ଆଦି ରହିଛି କି ନାହିଁ, ସଫେଇ କର୍ମଚାରୀଙ୍କ ପୋଷାକ ପରିଧାନ ଉପରେ ମଧ୍ୟ ଟିକିନିଖି ତଥ୍ୟ ସଂଗ୍ରହ କରାଯାଉଛି।
ଏହି ଦୁଇ ଷ୍ଟେଶନର ପ୍ରଥମ ପର୍ଯ୍ୟାୟ ସର୍ଭେ ଶେଷ ହୋଇଛି। ଯାହା ଅଭାବ ରହିଛି ସେସବୁ ପୂରଣ କରିବାକୁ ୩ ମାସ ସମୟ ଦିଆଯିବ। ଅବଧି ସରିବା ପରେ ପୁନର୍ବାର ସର୍ଭେ କରାଯିବ। ମାନଦଣ୍ଡ ପୂରଣ କରୁଥିବା ରେଳ ଷ୍ଟେଶନକୁ ଆଇଏସଓ ମାନ୍ୟତା ମିଳିବ। ସେହିଭଳି ଏହି ଦୁଇ ଷ୍ଟେଶନକୁ ସବୁଜ ସାର୍ଟିଫିକେଟ ମିଳିବା ପାଇଁ ପ୍ରକ୍ରିୟା ଆରମ୍ଭ ହୋଇଛି। ସୋଲାର ପାଓ୍ବାର ବ୍ୟବସ୍ଥା ସହ ବିଦ୍ୟୁତ୍ ସଞ୍ଚୟ ଓ ଷ୍ଟେଶନ ପରିବେଶରେ ସବୁଜ ବଳୟ ତିଆରି କରାଯିବ ବୋଲି ଜଣାପଡ଼ିଛି। ସୂଚନାଯୋଗ୍ୟ, ଆଇଏସ୍ଓ ପକ୍ଷରୁ ‘କ୍ୱାଲିଟି ସର୍ଭିସ ସିଷ୍ଟମ’ ଏହି ସର୍ଭେ କରୁଛି। ଆଇଏସ୍ଓ ସାର୍ଟିଫିକେଟ ଓ ସବୁଜ ସାର୍ଟିଫିକେଟ୍ ନ ଥିବାରୁ ସ୍ବଚ୍ଛତା ସର୍ଭେରେ ଭୁବନେଶ୍ୱର ଷ୍ଟେଶନର ଫଳାଫଳ କମ୍ ରହିଥିବା ଜଣାପଡିଛି।