ହରିଶବୁର୍ଗ,୧୦।୯: ଯଦି ଆପଣଙ୍କ ବ୍ୟାଙ୍କ ଆକାଉଣ୍ଟକୁ ଲକ୍ଷାଧିକ ଟଙ୍କା ଟ୍ରାନ୍ସଫର ହୋଇଯାଏ ତେବେ କ’ଣ କରିବେ ଭାବିଲେ। ଟଙ୍କା ନେଇ ବ୍ୟାଙ୍କକୁ ଦେଇ ଦେବେ ନା ଲୋଭରେ ଆସି ଖର୍ଚ୍ଚ କରିଦେବେ। କିଛି ଏଭଳି ଘଟଣା ଦେଖିବାକୁ ମିଳିଛି ପେନସିଲ୍ଭାନିଆର ମଣ୍ଟୋସର୍ଭିଲ ସହରରେ। ମଣ୍ଟୋସର୍ଭିଲ ସହରରେ ରହୁଥିବା ଜଣେ ଦମ୍ପତ୍ତି ରବର୍ଟ ଓ ଟିଫିନୀ ଓ୍ବିଲସିୟମ୍ଙ୍କ ବ୍ୟାଙ୍କ ଆକାଉଣ୍ଟରେ ମେ ୩୧କୁ ଜର୍ଜିଆର ଜଣେ ଗ୍ରାହକ ବିବି ଆଣ୍ଡ ଟି ବ୍ୟାଙ୍କରେ ଭୁଲ ଆକାଉର୍ଟ ନମ୍ବର ଦେଇ ୧୨୦,୦୦୦ଡଲାର(ପ୍ରାୟ ୮୬ ଲକ୍ଷ ଟଙ୍କା) ଜମା କରିଦେଇଥିଲେ। ପରେ ଆକାଉଣ୍ଟରେ ଜମା ହୋଇଥିବା ଟଙ୍କା ନ ଆସିବାରୁ ଯୁବକ ଜଣଙ୍କ ବ୍ୟାଙ୍କ ସହ ସମ୍ପର୍କ କରିଥିଲେ। ଯାଞ୍ଚ ପରେ ଜଣାପଡିଥିଲା ଯେ, ଉକ୍ତ ଟଙ୍କା ରର୍ବଟଙ୍କ ଆକାଉଣ୍ଟକୁ ଟ୍ରାନ୍ସଫର ହୋଇଯାଇଛି। ହେଲେ ସେତେବେଳକୁ ରବର୍ଟ ଓ ତାଙ୍କ ସ୍ତ୍ରୀ ବ୍ୟାଙ୍କକୁ ଏନେଇ ସୂଚନା ଦେବା ପରିବର୍ତ୍ତେ ସେହି ଟଙ୍କାକୁ ଖର୍ଚ୍ଚ କରିଦେଇଥିଲେ। ଏନେଇ ସ୍ଥାନୀୟ ଥାନାରେ ଯୁବକ ଜଣକ ଅଭିଯୋଗ କରିଥିଲେ। ଦମ୍ପତ୍ତିଙ୍କୁ ପୋଲିସ ଗିରଫ କରି କୋର୍ଟ ଚାଲାଣ କରିଥିଲା। ସୋମବାର ଜିଲା କୋର୍ଟରେ ଏହି ମାମଲାରେ ଶୁଣାଣି ହୋଇଛି। ୨୫,୦୦୦ଡଲାର ଜମା କରିବା ପରେ କୋର୍ଟ ସେମାନଙ୍କୁ ଜାମିନ ପ୍ରଦାନ କରିଛନ୍ତି।