ନୂଆଦିଲ୍ଲୀ,୨୩।୪: କରୋନା ଭାଇରସ ସଂକ୍ରମଣକୁ ନେଇ ଦେଶରେ ଚାଲିଥିବା ୪୦ ଦିନିଆ ଲକ୍ଡାଉନ ଅବଧି ମେ’ ୩ରେ ଶେଷ ହେଉଛି। ସାଧାରଣ ଜନତା ଭାବୁଛନ୍ତି ଏହାପରେ ଜୀବନ ଯାତ୍ରା ସ୍ବାଭାବିକ ହୋଇଯିବ। ହେଲେ ବିଶ୍ୱର ତେତେ ଜଣ ହେଲ୍ଥ ଏକ୍ସପର୍ଟଙ୍କ ମତରେ ଭାରତ ଯଦି ଶୀଘ୍ର ଅର୍ଥାତ୍ ୪୦ଦିନ ପରେ ପରେ ଲକ୍ଡାଉନ୍ ଖୋଲି ଦେଉଛି ତେବେ ପରିସ୍ଥିତି ଅସମ୍ଭାଳ ହୋଇପାରେ। ଭାରତରେ କରୋନା ସଂକ୍ରମଣର ସ୍ଥିତିକୁ ଦେଖିଲେ ସେଠାରେ ଅତିକମ୍ରେ ୧୦ ସପ୍ତାହ ଲକ୍ଡାଉନର ଆବଶ୍ୟକତା ରହିଛି ବୋଲି ହେଲ୍ଥ ଏକ୍ସପର୍ଟ ମତ ଦେଇଛନ୍ତି। ବିଶ୍ୱର ପ୍ରତିଷ୍ଠିତ ମେଡିକାଲ ରିସର୍ଚ୍ଚ ଜର୍ନାଲ ଲାନସେଟର ଏଡିଟର ଇନ୍ ଚିଫ୍ ରିଚାର୍ଡ ହର୍ଟନ କହିଛନ୍ତି ଭାରତରେ ଲକ୍ଡାଉନ ଅବଧି ଅତିକମରେ ୧୦ ସପ୍ତାହ ରହିବା ଜରୁରୀ। ନଚେତ୍ ପରିସ୍ଥିତି ଅସମ୍ଭାଳ ହୋଇପଡିବ। ଯଦି ଭାରତ ୭୦ ଦିନିଆ ଲକ୍ଡାଉନ୍ ପାଳନ ନ କରେ ତେବେ ୪୦ ଦିନିଆ ଲକ୍ଡାଉନର ଅର୍ଥ କିଛି ରହିବ ନାହିଁ ବୋଲି ସେ ମତ ଦେଇଛନ୍ତି। ହର୍ଟନଙ୍କ ମତରେ କୌଣସି ମହାମାରୀ ଦୀର୍ଘସ୍ଥାୟୀ ନୁହେଁ। ଏହା ଅପାଣାଛାଏଁ ଠିକ୍ ହୋଇଯିବ। ଭାରତରେ କରୋନା ବିରୋଧରେ ଯେଭଳି ଲକ୍ଡାଉନ ନିୟମ ପାଳନ କରାଯାଇଛି ଆଉ ଯଦି ଏହା ୧୦ ସପ୍ତାହ ପର୍ଯ୍ୟନ୍ତ ପାଳନ କରାଯାଏ ତେବେ ଭାରତରେ କରୋନା ଭାଇରସ ସମ୍ପୂର୍ଣ୍ଣ ଭାବେ ନଷ୍ଟ ହୋଇଯିବ ବୋଲି ସେ କହିଛନ୍ତି।