ଚମ୍ପୁଆ,୨୨ା୨(ଡି.ଏନ.ଏ.): କେନ୍ଦୁଝର ଜିଲା ଚମ୍ପୁଆ ବିଦ୍ୟୁତ ବିଭାଗ ଅଧୀନ ମନ୍ଦିରସାହି ନିବାସୀ ଓମକାର ସାହୁଙ୍କ ପାଖକୁ ୪ଲକ୍ଷରୁ ଊର୍ଦ୍ଧ୍ୱ ଟଙ୍କାର ଏକ ବିଦ୍ୟୁତ ବିଲ୍ ଆସଛି। ଏହି ବିଲ୍ ଦେଖିବା ପରେ ତାଙ୍କର ଚିନ୍ତା ବଢ଼ିଯାଇଛି। ଘଟଣାରୁ ପ୍ରକାଶ ଯେ, ଓମ୍କାରଙ୍କ ବିଦ୍ୟୁତ୍ ବିଲ୍ ୧୫୦ ଟଙ୍କା ମଧ୍ୟରେ ସୀମିତ ରହିଥାଏ। ତେବେ ନିକଟରେ ଆସିଥିବା ଗତମାସର ବିଲ୍ ୪ ଲକ୍ଷ ଟଙ୍କାରୁ ଊର୍ଦ୍ଧ୍ୱ ସେ ଜାଣିବାକୁ ପାଇଥିଲେ। ମାସକ ମଧ୍ୟରେ ଏତେ ଟଙ୍କାର ବିଲ କିପରି ହେଲା ତାହା ତାଙ୍କୁ ଆଶ୍ଚର୍ଯ୍ୟ କରିଛି। ତେବେ ଏହାର ସମାଧାନ ପାଇଁ ସେ ବିଦ୍ୟୁତ୍ ବିଭାଗର ଦୃଷ୍ଟି ଆକର୍ଷଣ କରିଛନ୍ତି। ସୂଚନା ଅନୁସାରେ ୨ ବର୍ଷ ତଳେ ବିଦ୍ୟୁତ ସଂଯୋଗ ନେଇଥିବା ଓମକାର ସାହୁ ପ୍ରତି ମାସ ଆବଶ୍ୟକ ବ୍ୟବହାର ଅନୁଯାୟୀ ୧୪୦ରୁ ୧୫୦ ଟଙ୍କା ବିଲ୍ ପଇଠ କରି ଆସୁଥିଲେ। ଏପରିକି ମିଟର ରିଡିଂ ଅନୁଯାୟୀ ପ୍ରତ୍ୟେକ ମାସ ସମାନ ଭାବେ ଏହି ବିଲ୍ ଆସୁଥିଲା। ଏଥର ଆସିଥିବା ଦେୟ ସଂଶୋଧନ କରାଯିବ ବୋଲି ବିଭାଗ ପକ୍ଷରୁ ପ୍ରତିଶ୍ରୁତି ଦିଆଯାଇଥିବା ଓମକାର ପ୍ରକାଶ କରିଛନ୍ତି। କେଉଁ କାରଣ ପାଇଁ ଏଭଳି ଭୁଲ ବିଦ୍ୟୁତ୍ ଦେୟ ଆସୁଛି ସେଥିପ୍ରତି ବିଭାଗ ଦୃଷ୍ଟି ଦେବାକୁ ସାଧାରଣରେ ଦାବି କରାଯାଇଛି।
