ଢେଙ୍କାନାଳ ଅଫିସ,୯।୬: ଢେଙ୍କାନାଳ ସହର ଅଳସୁଆ ହାଟ ନିକଟରେ ଥିବା ପରିତ୍ୟକ୍ତ ରାଇସ୍ ମିଲ୍ ପାଚେରୀ ଭୁଶୁଡ଼ି ପଡ଼ିବାରୁ ରବିବାର ୪ଜଣଙ୍କ ମୃତ୍ୟୁ ଘଟିଛି। ଏଥିସହ ୨ଜଣ ଗୁରୁତର ଆହତ ହୋଇଛନ୍ତି। ମୃତକମାନେ ହେଲେ ସଂଗ୍ରାମ ସାହୁ, ଅଭିରାମ ବିଶ୍ୱାଳ, ରବି ଚନ୍ଦ୍ର ପାତ୍ର ଓ ମାୟାଧର ନାୟକ। ଆହତମାନଙ୍କୁ ଚିକିତ୍ସା ଲାଗି ଜିଲା ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି। ଏସ୍ପି ଅନୁପମା ଜେମ୍ସ ଘଟଣାସ୍ଥଳରେ ଉପସ୍ଥିତ ଥିବା ଜଣାପଡ଼ିଛି।
ସୂଚନାନୁଯାୟୀ, ଉକ୍ତ ପାଚେରୀ କଡ଼ରେ କିଛି ପରିବା ଦୋକାନୀ ନିୟମିତ ପରିବା ବିକ୍ରି କରିଥାନ୍ତି। ଅନୁରୂପ ଭାବେ ରବିବାର ସେମାନେ ପରିବା ବିକ୍ରି କରୁଥିବା ବେଳେ ହଠାତ୍ ପାଚେରୀଟି ଭୁଶୁଡ଼ି ପଡ଼ିଥିଲା। ଖବରପାଇ ଅଗ୍ନିଶମ ବିଭାଗ ଓ ପୋଲିସ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ତେବେ କାନ୍ଥ ତଳେ ଚାପି ହୋଇଯିବା ଯୋଗୁ ୪ଜଣଙ୍କ ମୃତ୍ୟୁ ଘଟିଛି। ଖବର ଲେଖାଯିବା ପର୍ଯ୍ୟନ୍ତ ଉଦ୍ଧାର କାର୍ଯ୍ୟ ଜାରି ରହିଛି।