ମୁମ୍ବାଇ: ପରିବେଶ ପ୍ରେମୀ କଳାକାରଙ୍କ ଭିତରେ ଜଣେ ହେଉଛନ୍ତି ବଲିଉଡ୍ ନାୟିକା ଜୁହି ଚାଓ୍ବଲା। ଏବେ କରୋନା ଭାଇରସ ପାଇଁ ସାରା ଦେଶରେ ଲକ୍ଡାଉନ ଚାଲିଥିବା ବେଳେ ଭୂମିହୀନ କୃଷକଙ୍କୁ ସାହାଯ୍ୟ କରିବାକୁ ଚିନ୍ତା କରିଛନ୍ତି ଏହି ନାୟିକା। ସୂଚନା ମୁତାବକ, ମୁମ୍ବାଇଠାରୁ କିଛି ଦୂରରେ ଜୁହିଙ୍କର ଏକ ଫାର୍ମ ହାଉସ ବା ଚାଷ କରିବାକୁ କିଛି କ୍ଷେତ ରହିଛି। ଯେଉଁଠାରେ ବିଶେଷଜ୍ଞଙ୍କ ଦ୍ୱାରା ଜୈବିକ ଚାଷର ଅଭ୍ୟାସ କରାଯାଉଛି। ଏବେ ଏହି ସମୟରେ ସେଠାରେ ଧାନ ଚାଷ କରିବାକୁ ଭୂମିହୀନ କୃଷକମାନଙ୍କୁ ଏକ ସୁଯୋଗ ଦେଇଛନ୍ତି ଜୁହି। ନିକଟରେ ଏକ ଓ୍ବେବସାଇଟରେ ଦେଇଥିବା ସାକ୍ଷାତ୍କାରରେ ଜୁହି ଏହା କହିଛନ୍ତି। ସେ କହିଛନ୍ତି ଏହି ସମୟରେ ଭୂମିହୀନ କୃଷକମାନେ ତାଙ୍କ କ୍ଷେତରେ ଧାନ ଚାଷ କରିବା ସହ ଏହାର କିଛି ଅଂଶ ସେମାନେ ସେମାନଙ୍କ ପାଇଁ ରଖିପାରିବେ। ତେବେ ଏହା କୌଣସି ନୂଆ କଥା ନୁହେଁ ପୂର୍ବକାଳରେ ମଧ୍ୟ ଏପରି କରାଯାଉଥିଲା ବୋଲି ଜୁହି ମତ ଦେଇଛନ୍ତି। ତେବେ ଜୁହିଙ୍କ ଚାଷ ଚମିରେ ଚାଷ କରିବା ସମୟରେ କେବଳ ଜୈବିକ ପଦାର୍ଥରେ ଚାଷ କରାଯିବ ଯେମିତି କୌଣସି ରାସାୟନିକ ଜମି ମଧ୍ୟକୁ ପ୍ରବେଶ ନ କରେ ସେଥିପ୍ରତି ଧ୍ୟାନ ଦେବାକୁ କହିଛନ୍ତି ନାୟିକା ଜୁହି ଚାଓ୍ବଲା। ଏବେ ଲକ୍ଡାଉନ ଯୋଗୁ ସମସ୍ତେ ଏକ ପ୍ରକାର ଘରେ ବନ୍ଦ ଥିବା ବେଳେ ଜୁହିଙ୍କ ଏଭଳି ଚିନ୍ତାଧାରାକୁ ଅନେକେ ପ୍ରଶଂସା କରିଛନ୍ତି।