ଘଣ୍ଟାପଡା, ୬ା୧୨ (ଡି.ଏନ.ଏ.)-
ବୌଦ୍ଧ ଜିଲାପାଳ ଲଲାଟେନ୍ଦୁ ମିଶ୍ର ସୋମବାର କଣ୍ଟାମାଲ ବ୍ଲକ ପରିଦରଶନରେ ଆସି ଆମ୍ବଗଁା ପଁଚେତ୍ ଦେଢ଼େଣମାଲ ଗଁାର ନିହାତି ଗରିବ୍ ଭୂମିହୀନ ପରିବାର ଝାଙ୍କର ମହାନନ୍ଦକଁର ଘରକେ ଯାଇ ସମସିଆ ବାବ୍ଦେ ପଚାରି ବୁଝିଛନ୍। ଇ ପରିବାରର ସମସିଆ ବାବ୍ଦେ ଅକ୍ଟୋବର ୧୩ ତାରିଖ ଧରିତ୍ରୀ ସମ୍ବଲପୁର ସଂସ୍କରଣରେ ‘ଦୁରଦିନ୍ରେ ଗରିବ୍ ପରିବାର, ତାରପୋଲିନ୍ ତଲେ ୬ ପରାନୀ’ ଶୀରଷକ୍ରେ ଖବର ବାହାରିଥିଲା। ଯେନ୍ଥିରଲାଗି ଇ ପରିବାରର ଦୁରଦଶା ଜିଲା ପରଶାସନ ନଜରକେ ଆସିଥିଲା।
ପୂରବର ସୂଚନା ହିସାବେ ଦେଢ଼େଣମାଲର ଝାଙ୍କର ମହାନନ୍ଦ ଝନେ ନିହାତି ଗରିବ୍ ଲୋକ୍। ତାକର ଜମିବାଡ଼ି, ଘରଡ଼ିହ ବଲି କହିଛି ନାଇଁ। ଏନ୍ତା କି ପରିବାରଟା ସରକାରକଁର ଖାଏଦ୍ ସୁରକ୍ଷା ଯୋଜନାରୁ ବି ବଁଚିତ୍ ହେଇ ରହିଛନ୍। ପରିବାରଟା ମୁଡ଼ ଗୁଁଜିଥିବାର ବଖ୍ରେ ଘର ବି ଗଲା ଲଘୁଚାପ ବରଷାରେ ମାଟିରେ ମିଶିଗଲା। ଏହେଦେ ୬ ପରାନୀ କୁଟୁମ ବେସାହାରା ହେଇ ଗୁଟେ ଝୁପ୍ଡ଼ିରେ ଦିନ୍ ବିତଉଛନ୍। ଇ ବାବ୍ଦେ ଗଲା ଅକ୍ଟୋବର ୧୩ ତାରିଖ ଧରିତ୍ରୀ ସମ୍ବଲପୁର ସଂସ୍କରଣରେ ଟିକିନିଖିନୁ ଖବର ବାହାରିଥିଲା। ଖବର ବାହାରଲା ଉତାରୁ ଘଟନାଟା ବୌଦ୍ଧ ଜିଲାପାଳକଁର ନଜରକେ ଆସିଥିଲା। ଜିଲାପାଳ ସୋମବାର କଣ୍ଟାମାଳ ବ୍ଲକ ପରିଦରଶନରେ ଆସିଥିଲାବେଲେ ଝାଙ୍କର ମହାନନ୍ଦକଁର ଘରକେ ଯାଇ ତାକର ହାଲଚାଲ ପଚାରି ବୁଝିଥିଲେ। ପଛେ ଜିଲାପାଳ ଝାଙ୍କର ମହାନନ୍ଦକୁଁ ସରକାରୀ ଯୋଜନାରେ ଘରଡ଼ିହ ଯୁଗେଇ ଦେବାକେ କଣ୍ଟାମାଳ ତହସିଲଦାରକୁଁ ନିରଦେଶ ଦେଇଥିଲେ। ଘରଡ଼ିହ ମିଲ୍ଲା ଉତାରୁ ଆବାସ ଯୋଜନାରେ ସାମିଲ କରାଯିବା ବଲି ଜିଲାପାଳ ମିଶ୍ର ଝାଙ୍କର ମହାନନ୍ଦକୁଁ କଥା ଦେଇଥିବାର ଜନାଯାଇଛେ।