ନୂଆଦିଲ୍ଲୀ,୧୩-୧୦: ଭୂଷଣ ପାଓ୍ବାର ଆଣ୍ଡ ଷ୍ଟିଲ ଲିମିଟେଡ(ବିପିଏସ୍ଏଲ୍)ର ୪ ହଜାର କୋଟି ଟଙ୍କାର ସମ୍ପତ୍ତିକୁ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ଜବତ କରିଛି। କମ୍ପାନୀ ବିରୋଧରେ ଋଣ ଠକେଇ ଅଭିଯୋଗ ଆସିଥିବା ବେଳେ ବେଆଇନ ଅର୍ଥକାରବାର ତଦନ୍ତ ଆଧାରରେ ଇଡି ପକ୍ଷରୁ ଏଭଳି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। କମ୍ପାନୀର ଓଡ଼ିଶାରେ ଥିବା ଜମି, ବିଲ୍ଡିଂ, ପ୍ଲାଣ୍ଟ ଏବଂ ମେଶିନେରିକୁ ଇଡି ବେଆଇନ ଅର୍ଥ କାରବାର ନିରୋଧ ଆଇନ(ପିଏମ୍ଏଲ୍ଏ)ମୁତାବକ ଜବତ କରିଥିବା କହିଛି। ଜବତ ହୋଇଥିବା ମୋଟ ସମ୍ପତ୍ତିର ମୂଲ୍ୟ ୪,୦୨୫.୨୩ କୋଟି ଟଙ୍କା ହେବ ବୋଲି ଆକଳନ କରାଯାଇଛି। ବିଭିନ୍ନ ବ୍ୟାଙ୍କରୁ କମ୍ପାନୀ ଋଣ ନେଇ ଏହି ଅର୍ଥକୁ ଅନ୍ୟ ଆଡେ ପଠାଇ ଦେଇଥିବା ଜଣା ପଡିଛି।
ଋଣ ଭାବେ ଲାଭ କରିଥିବା ୬୯୫.୧୪ କୋଟି ଟଙ୍କାର ପୁଞ୍ଜିକୁ ସିଏମ୍ଡି ଭାବେ ଅବସ୍ଥାପିତ ଥିବା ସଞ୍ଜୟ ସିଂଘଲ ଏବଂ ତାଙ୍କ ପରିବାର ଲଙ୍ଗଟର୍ମ କ୍ୟାପିଟାଲ ଗେନ୍ (ଏଲ୍ଟିସିଜି) ଭାବେ ଦର୍ଶାଇଛନ୍ତି। ସେହି ସମୟରେ ଆୟକରରୁ ଏଲ୍ଟିସିଜିକୁ ଛାଡ଼ କରାଯାଇଛି। ଭୂଷଣ କମ୍ପାନୀ, ସିଂଘଲ ଏବଂ ଅନ୍ୟ ମାନଙ୍କ ବିରୋଧରେ କେନ୍ଦ୍ରୀୟ ତଦନ୍ତ ବ୍ୟୁରୋ(ସିବିଆଇ) ଦୁର୍ନୀତି ଅଭିଯୋଗରେ ମାମଲା ରୁଜୁ କରିଥିଲା। ଉକ୍ତ ମାମଲାକୁ ଅଧ୍ୟୟନ କରିବା ପରେ ଇଡି ପକ୍ଷରୁ ସାନି ବେଆଇନ ଅର୍ଥ କାରବାର ମାମଲା ରୁଜୁ କରାଯାଇଥିବା ସୂଚନା ରହିଛି। ଇଡି ଅଭିଯୋଗରେ କହିଛି ଯେ, ବିପିଏସ୍ଏଲ ନ୍ୟସ୍ତସ୍ବାର୍ଥ ରଖି ଅନେକ ସଂସ୍ଥାଙ୍କୁ କ୍ୟାପିଟାଲ ଗୁଡ୍ସ ଭାବେ ଆର୍ଟିଜିଏସ୍ ପେମେଣ୍ଟ କରିଛି। ଏଭଳି ଭାବେ ପେମେଣ୍ଟ ଲାଭ କରିଥିବା କମ୍ପାନୀ ଭୂଷଣକୁ କ୍ୟାଶ ଟ୍ରାନ୍ସଫର କରିଛନ୍ତି। ଯାହାକୁ ଏଲ୍ଟିସିିଜି ଭାବେ କମ୍ପାନୀ ଦର୍ଶାଇଛି। କମ୍ପାନୀ ବିଭିନ୍ନ ବେଆଇନ କାର୍ଯ୍ୟ ଦ୍ୱାରା ଏହା ଦର୍ଶାଇଥିବା ଇଡି କହିଛି। ସେହିଭଳି ପ୍ରମୋଟର କମ୍ପାନୀ ଦ୍ୱାରା ଆଉ ୩,୩୩୦ କୋଟି ଟଙ୍କାକୁ ଇକ୍ୱିଟି(ଶେୟାର କ୍ୟାପିଟାଲ ଏବଂ ପ୍ରିମିୟମ) ଭାବେ ନିବେଶ କରାଯାଇଛି। ଭୂଷଣର ଋଣ ଅର୍ଥକୁ ବ୍ୟବହାର କରାଯିବା ସହ ଭୂତ କମ୍ପାନୀଗୁଡ଼ିକୁ ଆଡଭାନ୍ସ ଭାବେ ଅର୍ଥ ପ୍ରଦାନ କରାଯାଇଛି ବୋଲି ଇଡି ପକ୍ଷରୁ କୁହାଯାଇଛି।