ଭଞ୍ଜନଗର,୪।୬(ଡି.ଏନ.ଏ)- ଗଞ୍ଜାମ ଜିଲା ଭଞ୍ଜନଗର ତହସିଲ ଅନ୍ତର୍ଗତ ଟୋକାଗଣ୍ଡାର ମାନସିକ ଅନଗ୍ରସହ ହଜାରୀ ନାୟକ(୧୭)। ୨ ବର୍ଷ ହେଲା ସେ ବେସାହାର ହୋଇପଡ଼ିଛନ୍ତି। ପେଟରେ ଭୋକ ଥାଇ ମଧ୍ୟ ମାନସିକ ଅନଗ୍ରସହ ହଜାରୀ କାହାକୁ କହିପାରୁନାହଁାନ୍ତି। ସମ୍ପର୍କୀୟ ଭାଇ କିମ୍ବା ସାହିପଡିଶା କିଏ ମୁଠେ ଦେଲେ ଖାଆନ୍ତି ନ ହେଲେ ଉପାସରେ ଦିନ କଟେ। ଲକ୍ଡାଉନ୍ ଯୋଗୁ ଅନେକ ସ୍ବେଚ୍ଛାସେବୀ ଅନୁଷ୍ଠାନ ଦୃଷ୍ଟିକୁ ଆସିଥିଲେ ମଧ୍ୟ ସେମାନେ ତାଙ୍କୁ ଥଇଥାନ କରିପାରିନାହାନ୍ତି। ତୁରନ୍ତ ହଜାରୀଙ୍କୁ ଉଦ୍ଧାର କରି କୌଣସି ଅନାଥ ଆଶ୍ରମରେ ଥଇଥାନ କରିବାକୁ ଅଞ୍ଚଳବାସୀ ଦାବି କରିଛନ୍ତି।
ପ୍ରକାଶ ଯେ, ହଜାରୀଙ୍କ ଜନ୍ମ ପରେ ମା’ କସ୍ତୁରି ନାୟକ ମୃତ୍ୟୁବରଣ କରିଥିଲେ। ଏହାର କିଛିମାସ ପରେ ତାଙ୍କ ବାପା ରାମ ମଧ୍ୟ ଜଙ୍ଗଲକୁ ଯାଇଥିବା ବେଳେ ଅଶୁଂଘାତରେ ମୃତ୍ୟୁବରଣ କରିଥିଲେ। ଏଭଳି ପରିସ୍ଥିତିରେ ହଜାରୀଙ୍କୁ ତାଙ୍କ ପିଉସା ନେଇ ରଖିଥିଲେ। ପିଉସା ପିଉଷିଙ୍କର ମଧ୍ୟ ୨ବର୍ଷ ପୂର୍ବେ ୬ମାସ ବ୍ୟବଧାନରେ ମୃତ୍ୟୁ ଘଟିଛି। ଏହାପରେ ତାଙ୍କ ଜୀବନରେ ଆସିଥିଲା ଘୋର ଅନ୍ଧକାର। ସମ୍ପର୍କୀୟ ଭାଇ ଏବଂ ସାହିପଡ଼ୋଶୀଙ୍କ ସାହାଯ୍ୟରେ ହଜାରୀ ଚଳୁଥିଲେ। ୟା ଭିତରେ ଧିରେଧିରେ ମାନସିକ ଭାରସାମ୍ୟ ହରାଇ ବସିଛନ୍ତି। ତେଣୁ ହଜାରୀଙ୍କୁ ପ୍ରଶାସନ କେଉଁଠି ଥଇଥାନ କରିବାକୁ ଅଞ୍ଚଳବାସୀ ଦାବି କରିଛନ୍ତି।
