ଭୋଗରାଇ,୧୩।୮(ଡି.ଏନ.ଏ.)-ବାଲେଶ୍ୱର ଜିଲା ଭୋଗରାଇ ଥାନା ସମ୍ମୁଖରେ ଡିଏସ୍ଓ ପକ୍ଷରୁ ମଙ୍ଗଳବାର ବିକ୍ଷୋଭ ପ୍ରଦର୍ଶନ କରାଯାଇଛି। ନିକଟରେ ତାଳସାରୀ ବେଳାଭୂମିରେ କଲେଜ ଛାତ୍ରୀଙ୍କୁ ନିର୍ଯାତନା ଦେବା ଓ ଅଶ୍ଳୀଳ ଭିଡ଼ିଓ ଭାଇରାଲ କରି ବ୍ଲାକମେଲ କରିବା ଦୁର୍ବୃତ୍ତଙ୍କୁ ଅବିଳମ୍ବେ ଗିରଫ କରି କାର୍ଯ୍ୟାନୁଷ୍ଠାନ ନେବା, ବେଳାଭୂମିରେ ପର୍ଯ୍ୟଟକଙ୍କୁ ସୁରକ୍ଷା ଦେବା, ମଦ ମାଦକ ଦ୍ରବ୍ୟ ପ୍ରସାର ବନ୍ଦ କରିବା, ବେଆଇନ ଭାବେ ବେପରୁଆ ବାଇକ ଚାଳନା ବନ୍ଦ କରିବା ଆଦି ଦାବି ନେଇ ଏହି ବିକ୍ଷୋଭ ପ୍ରଦର୍ଶନ କରାଯାଇଛି। ଡିଏସ୍ଓ ଛାତ୍ରନେତା ଅମର ବୋର, ସଞ୍ଜୟ ପରିଡ଼ା, ସ୍ବାଗତ କୁମାର ପଣ୍ଡା, ପୂର୍ଣ୍ଣଚନ୍ଦ୍ର ଦେ, ପବିତ୍ର ପ୍ରଦାନ, ଗଣେଶ ପରମାଣିକ, ସୁମନ ପରିଡ଼ା, ହରେକୃଷ୍ଣ ଦାସ, ଆସମାନ ରାଜ ପ୍ରମୁଖ ନେତୃତ୍ୱରେ ବହୁ ଛାତ୍ରୀଛାତ୍ର ଆର୍ଆଇଏଚ୍ଏସ୍ ଗ୍ରାମ୍ୟ ଉଚ୍ଚଶିକ୍ଷା ପ୍ରତିଷ୍ଠାନରୁ ଏକ ଶୋଭାଯାତ୍ରାରେ ବାହାରି ବିଭିନ୍ନ ସ୍ଲୋଗାନ ଦେଇ ଥାନାଛକ ପରିକ୍ରମା କରିଥିଲେ। ସେଠାରୁ ଛାତ୍ର ବିକ୍ଷୋଭକାରୀ ଭୋଗରାଇ ଥାନାରେ ପହଞ୍ଚତ୍ ଦୀର୍ଘସମୟ ବିକ୍ଷୋଭ ପ୍ରଦର୍ଶନ କରିବା ପରେ ଏକ ପ୍ରତିନିଧି ଦଳ ଭୋଗରାଇ ଥାନା ଅଧିକାରୀଙ୍କୁ ଛାତ୍ରୀ ପ୍ରତି ହୋଇଥିବା ନିର୍ଯାତନା ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଏସ୍ପିଙ୍କୁ ଏକ ଦାବିପତ୍ର ପ୍ରଦାନ କରିଥିଲେ।