ଖୋର୍ଦ୍ଧା ଅଫିସ, ୨୬।୫: ଖୋର୍ଦ୍ଧା ଜିଲା ବାଘମାରୀ ଥାନା ଅନ୍ତର୍ଗତ ଭୋଗ ଡାରେ ସୋମବାର ବିଳମ୍ବିତ ରାତିରେ ସିରିଜ୍ ବୋମାମାଡ଼ ଘଟିଛି । ଏଥିରେ ଗୋଟିଏ ପରିବାରର ୩ଜଣ ଗୁରୁତର ହୋଇଛନ୍ତି । ଆହତମାନେ ହେଲେ ସୁକାନ୍ତ ଜୟସିଂ, ସ୍ତ୍ରୀ ଲାବଣ୍ୟ ଓ ପୁଅ ସୌମ୍ୟରଞ୍ଜନ। ଆହତମାନଙ୍କୁ ଚିକିତ୍ସା ପାଇଁ ନିକଟସ୍ଥ ମେଡିକାଲରେ ଭର୍ତ୍ତି କରାଯାଇଛି।
ମିଳିଥିବା ସୂଚନା ଅନୁସାରେ, ବିଳମ୍ବିତ ରାତିରେ ୧୦ରୁ ଊର୍ଦ୍ଧ୍ୱ ଦୁର୍ବୃତ୍ତ ସୁକାନ୍ତଙ୍କ ଘର ପଛପଟକୁ ଶାବଳରେ ତାଡ଼ିଥିଲେ। ଏହା ଜାଣିପାରି ସୁକାନ୍ତ ଓ ସୌମ୍ୟରଞ୍ଜନ ଏହାକୁ ବିରୋଧ କରିବାରୁ ଦୁର୍ବୃତ୍ତମାନେ ବାମାମାଡ଼ କରିଥିଲେ। ପରେ ସେମାନେ ଘରେପଶି ସୁକାନ୍ତ ଓ ସୌମ୍ୟରଞ୍ଜନଙ୍କ ସହ ସୁକାନ୍ତଙ୍କ ସ୍ତ୍ରୀ ଲାବଣ୍ୟଙ୍କୁ ଆକ୍ରମଣ କରିଥିଲେ। ଲାବଶ୍ୟ କୌଣସି ମତେ ସେଠାରୁ ଖସି ପଳାଇ ସ୍ଥାନୀୟ ଲୋକଙ୍କୁ ଖବର ଦେଇଥିଲେ। ଏହି ସମୟରେ ରାତି ପାଟ୍ରୋଲିଂ କରୁଥିବା ପୋଲିସ ଘଟଣାସ୍ଥଳରେ ପହଞ୍ଚିଥିଲା। ପୋଲିସକୁ ଦେଖି ଦୁର୍ବୃତ୍ତମାନେ ପୁଣିଥରେ ସିରିଜ୍ ବୋମା ମାଡ଼କରି ଘଟଣାସ୍ଥଳରୁ ଫେରାର ହୋଇଯାଇଥିଲେ। ଏସ୍ପି ଅଜୟ ପ୍ରତାପ ସ୍ବାଇଁ, ବାଘମାରୀ ଥାନା ଅଧିକାରୀ ନିଲିମା ପଟ୍ଟନାୟକ, ସାଇଣ୍ଟିଫିକ ଟିମ୍ସହ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି। ପୋଲିସ ଘଟଣାସ୍ଥଳରୁ ୨ଟି ମୋବାଇଲ, ରକ୍ତଭିଜା କପଡ଼ା ଜବତ କରିଛି।