ପରଜଙ୍ଗ, ୨୪।୪(ଡି.ଏନ୍.ଏ.)- ସକାଳ ୭ଟାରୁ ଅପେକ୍ଷା କରିଥିଲେ ଭୋଟ ଦେବାକୁ। ଦୀର୍ଘ ୪ ଘଣ୍ଟା ପରେ ବୁଥ୍ ଭିତରକୁ ଯିବାକୁ ମିଳିଲା ସୁଯୋଗ। ତଥାପି ମନରେ ନ ଥିଲା ସାମାନ୍ୟ ଅନୁଶୋଚନା କି କ୍ଷୋଭ। ହେଲେ ଭୋଟର ଲିଷ୍ଟ ଉପରେ ବାଜିଥିବା ଡିଲିଟ୍ ଷ୍ଟାମ୍ପ ସବୁ ବିଗାଡ଼ିଦେଲା। ହସହସ ମୁହଁରେ ଭୋଟ ଦେବାକୁ ସିନା ଯାଇଥିଲେ, ହେଲେ ବୁଥ୍ରୁ ବାହାରିବାବେଳକୁ ଜକେଇ ଆସିଥିଲା ଆଖି। ମୁହଁରୁ ସ୍ପଷ୍ଟ ବାରି ହୋଇପଡୁଥିଲା ଭୋଟ ନ ଦେଇପାରିବାର ଦୁଃଖ। ଏପରି ତ୍ରୁଟି ପାଇଁ ୮୫ ବର୍ଷ ବୟସ୍କା ସୁକୁମାରୀ ମଲ୍ଲିକ ଦାୟୀ କରିଛନ୍ତି ପ୍ରଶାସନିକ ଅବହେଳାକୁ। ଜାଣିଶୁଣି ତାଙ୍କ ନାମକୁ କାଟିଦିଆଯାଇଥିବା ସେ ଅଭିଯୋଗ କରିଛନ୍ତି।
ସୂଚନାଯୋଗ୍ୟ, ପରଜଙ୍ଗ ନିର୍ବାଚନମଣ୍ଡଳୀର ୧୧୧ନଂ. ବୁଥ୍କୁ ଭୋଟ ଦେବାକୁ ଆସିଥିଲେ ପରଜଙ୍ଗ ଗ୍ରାମର ବୃଦ୍ଧା ସୁକୁମାରୀ ମଲ୍ଲିକ। ତାଙ୍କ ହାତରେ ଥିଲା ଭୋଟର ପରିଚୟ ପତ୍ର। ହେଲେ ନିର୍ବାଚନ ଅଧିକାରୀ ଯାଞ୍ଚ କରିବା ସମୟରେ କ୍ରମିକ ସଂଖ୍ୟା ଥିବା ଭୋଟର ଲିଷ୍ଟରେ ଡିଲିଟ୍ ଲେଖାଥିବା ମୋହର ବାଜିଥିଲା। ତେଣୁ ନିୟମ ଅନୁଯାୟୀ ପ୍ରିଜାଇଡିଂ ଅଫିସର ତାଙ୍କୁ ମତସାବ୍ୟସ୍ତ କରିବାକୁ ସୁଯୋଗ ଦେଇ ନ ଥିଲେ। ଫଳରେ ସୁକୁମାରୀ ନିରାଶରେ ଘରକୁ ଫେରିଆସିଥିଲେ।
