ବଅଁରପାଳ, ୨୦ା୨(ଡି.ଏନ.ଏ.) – ଆଉ ଦିନକ ପରେ ପାଳନ ହେବ ମହାଶିବରାତ୍ରି। ଏହାକୁ ନେଇ ଚଳଚଞ୍ଚଳ ହୋଇଉଠିଛି ଅନୁଗୋଳ ଜିଲା ବଅଁରପାଳ ବ୍ଲକ କୁଲାଡ ଗ୍ରାମର କପିଳେଶ୍ୱର ଶୈବପୀଠ। ପୂଜାକୁ ଧୁମ୍ଧାମରେ ପାଳନ କରିବାକୁ ଚାଲିଛି ବ୍ୟାପକ ପ୍ରସ୍ତୁତି। ଯଥାନୀତି ପୂଜା ବିଧି ସହ ଭଜନ ସନ୍ଧ୍ୟା, ନାମ ସଂକୀର୍ତ୍ତନ, ମହିଳା ପାଲା ପ୍ରତିଯୋଗିତା ସହ ସାଂସ୍କୃତିକ କାର୍ଯ୍ୟକ୍ରମ ଆୟୋଜନ କରାଯିବ ବୋଲି ସ୍ଥିର ହୋଇଛି। ସେହିପରି ଶନିବାର ଭୋର ୪ଟା ୧୦ରେ ପ୍ରଭୁଙ୍କର ମହାଦୀପ ମନ୍ଦିର ଉପରକୁ ଉଠିବ ବୋଲି ସମୟ ନିର୍ଘଣ୍ଟ କରାଯାଇଛି।
୫୫ ନମ୍ବର ଜାତୀୟ ରାଜପଥର କୁଲାଡଠାରୁ ୫ଶହ ମିଟର ଦୂରରେ ଏହି ଶୈବପୀଠ ପଡେ। ଜିଲାର ପ୍ରାଚୀନ ଶୈବପୀଠଗୁଡିକ ମଧ୍ୟରୁ ଏହା ଅନ୍ୟତମ। ସୁନ୍ଦର ପ୍ରାକୃତିକ ପରିବେଶରେ ଥିବା ଏହି ପୀଠ ସମ୍ପର୍କରେ ରହିଛି ରୋଚକ ଲୋକକଥା। ସ୍ଥାନୀୟ ବାସିନ୍ଦାଙ୍କ କହିବା ମୁତାବକ, ବହୁ ବର୍ଷ ତଳେ ମନ୍ଦିର ଅଞ୍ଚଳ ଘଞ୍ଚ ଜଙ୍ଗଲରେ ପରିପୂର୍ଣ୍ଣ ଥିଲା। ଦିନେ ସେହି ରାସ୍ତା ଦେଇ ଜଣେ ସାଧୁ ଆଶ୍ରମକୁ ଫେରୁଥିବାବେଳେ ଏକ ଗଛମୂଳେ ଶିବ ଲିଙ୍ଗ ଆକୃତିର ଏକ କଳା ପଥର ପଡିଥିବା ଦେଖିବାକୁ ପାଇଥିଲେ। ଏ ବିଷୟରେ ଗ୍ରାମବାସୀ ଜାଣିବା ପରେ ସେଠାରେ ସେହିଦିନଠାରୁ ମନ୍ଦିର କରାଯାଇ ପୂଜାପାଠ କରାଯାଇଆସୁଛି। ଏ ସମ୍ପର୍କରେ ମନ୍ଦିର ପୂଜକ ଇନ୍ଦ୍ରମଣି ମହାପାତ୍ର(୮୦) କୁହନ୍ତି, କାହିଁ କେଉଁ କାଳରୁ ପ୍ରଭୁ କପିଳେଶ୍ୱର ଏଠାରେ ପୂଜା ପାଇଆସୁଛନ୍ତି। ଲିଙ୍ଗ କପି ଅର୍ଥାତ ହନୁମାନଙ୍କ ପରି ହୋଇଥିବାରୁ କପିଳେଶ୍ୱର ନାମରେ ସେ ପ୍ରତିଷ୍ଠିତ। ମନ୍ଦିର କମିଟି ସଭାପତି ପ୍ରତାପ ଜେନା କୁହନ୍ତି, ଚଳିତ ବର୍ଷ ଜାଗର ଯାତ୍ରା ଧୁମ୍ଧାମରେ ପାଳନ କରାଯିବାର ଯୋଜନା ରହିଛି। ରଙ୍ଗିନ ଆଲୋକମାଳାରେ ପୀଠ ସାଜସଜ୍ଜା କରାଯାଇଛି। ସାଂସ୍କୃତିକ କାର୍ଯ୍ୟକ୍ରମର ଆୟୋଜନ କରାଯାଇଛି। ଗ୍ରାମ ସଭାପତି ଭାଗୀରଥି ଜେନା, ପଞ୍ଚୁ ଦଳବେହେରା, ହରିହର ଦେହୁରୀ ପ୍ରମୁଖ କୁହନ୍ତି, ଚଳିତ ବର୍ଷ ୧୫ ହଜାର ଶ୍ରଦ୍ଧାଳୁଙ୍କ ପାଇଁ ପ୍ରସାଦ ସେବନର ବ୍ୟବସ୍ଥା କରାଯାଇଛି। ଧୁମ୍ଧାମରେ ପୂଜା ପାଳନ କରାଯିବାକୁ ସମସ୍ତ ପ୍ରସ୍ତୁତି ହୋଇଛି।