ଟୋକିଓ, ୨୯ା୪ (ଏପି): ଫଳପ୍ରଦ କରୋନା ଭାଇରସ ଭ୍ୟାକ୍ସିନ ନ ବାହାରିବା ପର୍ଯ୍ୟନ୍ତ ଟୋକିଓ ଅଲିମ୍ପିକ୍ସ ଆୟୋଜନ ଚିନ୍ତା କରିବା ଅବାସ୍ତବ। ଜାପାନ ମେଡିକାଲ ଆସୋସିଏଶନ ସଭାପତି ୟୋଶିତାକେ ୟୋକୋକୁରା ମଙ୍ଗଳବାର କହିଛନ୍ତି। ତେବେ ଖୁବ୍ ଶୀଘ୍ର କରୋନାଭାଇରସ ପାଇଁ ଭ୍ୟାକ୍ସିନ ଓ ଔଷଧ ଉଦ୍ଭାବନ ହୋଇଯିବ ବୋଲି ସେ ଆଶା ପ୍ରକାଶ କରିଛନ୍ତି। କରୋନାଭାଇରସ୍ ମହାମାରୀ ଯୋଗୁ ଜାପାନ ଓ ଅନ୍ତର୍ଜାତୀୟ ଅଲିମ୍ପିକ କମିଟିର ସହମତିରେ ଟୋକିଓ ୨୦୨୦ ଗ୍ରୀଷ୍ମ କ୍ରୀଡ଼ାକୁ ଆସନ୍ତା ବର୍ଷ ଜୁଲାଇ ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଛି। ଜାପାନରେ କରୋନା ଭାଇରସ୍ ସଂକ୍ରମଣ ଦ୍ରୁତ ଭାବେ ବ୍ୟାପିବାରେ ଲାଗିଛି। ହସ୍ପିଟାଲଗୁଡ଼ିକରେ ରୋଗୀଙ୍କ ଭିଡ଼ ଲାଗିଛି। ଦେଶ ମାସେ ହେଲା ଜରୁରିକାଳୀନ ପରିସ୍ଥିତିରେ ଚାଲିଛି। ବିନା ଭ୍ୟାକ୍ସିନରେ ଅଲିମ୍ପିକ୍ସ ଆୟୋଜନକୁ ସେ ବିରୋଧ କରନ୍ତି କି ନା ସେ ସମ୍ପର୍କରେ ୟୋକୋକୁରା କିଛି କହି ନାହାନ୍ତି। ସେ କିନ୍ତୁ ଯୁକ୍ତି ଦର୍ଶାଇଛନ୍ତି କେବଳ ଜାପାନରେ କରୋନା ସଂକ୍ରମଣ ନିୟନ୍ତ୍ରଣକୁ ଆସି ଗଲେ ବିଶ୍ୱର ଅନ୍ୟାନ୍ୟ ଅଞ୍ଚଳରୁ ଏହି ମହାମାରୀର ବିନାଶ ଘଟିବା ଜରୁରୀ। ତା ନ ହେଲେ ଅଲିମ୍ପିକ୍ସ ବେଳେ ସଂକ୍ରମଣର ଆଶଙ୍କା ରହିଛି। ବିଶେଷଜ୍ଞମାନେ କହିଛନ୍ତି କରୋନା ଭାଇରସ୍ ପାଇଁ ଭ୍ୟାକ୍ସିନ ବାହରିବା ଲାଗି ୧୨ରୁ ୧୮ ମାସ ସମୟ ଲାଗିଯାଇପାରେ। ଏକ ରିପୋର୍ଟ ଅନୁସାରେ ଜାପାନରେ କୋଭିଡ୍-୧୯ ସଂକ୍ରମିତ ଙ୍କ ସଂଖ୍ୟା ୧୩,୫୭୬ ରହିଛି। ପୁନଶ୍ଚ ଟୋକିଓ ନିକଟରେ ଏକ ପାଣି ଜାହାଜରେ ୭୧୨ ପଜିଟିଭ ରହିଛନ୍ତି। ଦେଶରେ ଇତିମଧ୍ୟରେ କରୋନା ଭାଇରସ୍ରେ ମୃତ୍ୟୁ ସଂଖ୍ୟା ୩୮୯ରେ ପହଞ୍ଚତ୍ଛି।
