ରାଉରକେଲା ଅଫିସ,୯ା୧: ବୁଧବାର ବନ୍ଦ ପାଳନ ସମୟରେ ଏକ ମାଛ ବୋଝେଇ ପିକ୍ଅପ୍ ଭ୍ୟାନ ଷ୍ଟିଲ ସିଟିର ବିର୍ସା ଛକରେ ଓଲଟି ପଡ଼ିବାରୁ ଅଭାବନୀୟ ପରିସ୍ଥିତି ସୃଷ୍ଟି ହୋଇଥିଲା। ଏଥିରେ ଜିଅନ୍ତା ମାଛ ଭର୍ତ୍ତି ଥିଲା। ମାଛସବୁ ରାସ୍ତାରେ ପଡ଼ି ଛଟପଟ ହେବା ଦେଖାଯାଇଥିଲା। ଘଟଣାସ୍ଥଳରେ ଉପସ୍ଥିତ ଲୋକେ ମାଛ ଗୋଟାଇବାକୁ ଉଦ୍ୟମ କରି ବିଫଳ ହୋଇଥିଲେ। କାରଣ ପୋଲିସ ଓ ବନ୍ଦପାଳନକାରୀ ଏନେଇ ଲୋକଙ୍କୁ ନିବୃତ୍ତ ରହିବାକୁ ପରାମର୍ଶ ଦେଇଥିଲେ। ଗାଡ଼ି ଡ୍ରାଇଭର ଓ ହେଲ୍ପର ସାମାନ୍ୟ ଆହତ ହୋଇଥିବା ଖବର ମିଳିଛି। ଆନ୍ଦୋଳନ ଯୋଗୁ ମାଛ ଗାଡ଼ିଟି ଅତି ଦ୍ରୁତ ଗତିରେ ଆସୁଥିଲା। ଆନ୍ଦୋଳନକାରୀଙ୍କୁ ଦେଖି ଗାଡ଼ିର ବେଗ ବଢ଼ାଇ ଦେବାରୁ ଏଭଳି ଅଘଟଣ ଘଟିଥିବା କୁହାଯାଇଛି। ବୁଧବାର ଆମିଷବାର ଥିବାରୁ ଲୁଚାଚୋରାରେ ଖୁଚୁରା ବେପାରୀଙ୍କୁ ମାଛ ଦେବାକୁ ଗାଡ଼ିଟି ବନ୍ଧମୁଣ୍ଡା ଦିଗରୁ ଆସୁଥିଲା। ଗାଡ଼ିର ବିଶେଷ କ୍ଷୟକ୍ଷତି ହୋଇ ନ ଥିବା ଜଣାଯାଇଛି।