ମେଲବୋର୍ନ,୫।୧(ପି.ଟି.): ଅଷ୍ଟ୍ରେଲିଆରେ ଜଙ୍ଗଲ ନିଆଁ ଭୟାବହ ଦୁର୍ବିପାକରେ ପରିଣତ ହୋଇଛି। ନ୍ୟୁ ସାଉଥ୍ଓ୍ବେଲ୍ସ, ଭିକ୍ଟୋରିଆ, ଦକ୍ଷିଣ ଅଷ୍ଟ୍ରେଲିଆରେ ଜଙ୍ଗଲ ନିଆଁ ଭୟଙ୍କର ଭାବେ ମାଡ଼ି ଚାଲିଥିବାବେଳେ ପ୍ରଧାନମନ୍ତ୍ରୀ ସ୍କଟ୍ ମୋରିସନ ସେଠାକୁ ୩୦୦୦ ସୈନ୍ୟଙ୍କ ସମେତ ବିମାନ ଓ ଜାହାଜ ପଠାଇଛନ୍ତି। ଜାନୁୟାରୀ ୧୩ରେ ମୋରିସନଙ୍କର ୪ ଦିନିଆ ଭାରତ ଗସ୍ତ ଥିବାବେଳେ ଏହାକୁ ସେ ସ୍ଥଗିତ ରଖିଛନ୍ତି। ଆଗାମୀ ମାସରେ ସେ ନୂଆଦିଲ୍ଲୀ ସହ କଥା ହୋଇ ସାନି ଗସ୍ତ କାର୍ଯ୍ୟସୂଚୀ ସ୍ଥିର କରିବେ ବୋଲି କହିଛନ୍ତି। ୧୩ ତାରିଖ ଗସ୍ତ ଅବସରରେ ମୋରିସନ ଓ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ମଧ୍ୟରେ ଅନେକ ଗୁରୁତ୍ୱପୂର୍ଣ୍ଣ ଦ୍ୱିପାକ୍ଷିକ ପ୍ରସଙ୍ଗ ଉପରେ ଆଲୋଚନା ହେବାର ଥିଲା।
ଅଧିକାଂଶ ଜଙ୍ଗଲ ଅଞ୍ଚଳରେ ନିଆଁ ବ୍ୟାପକ ଆକାର ଧାରଣ କରିବା ସହ ଅତ୍ୟଧିକ ଉତ୍ତାପ ଓ ପବନ ଯୋଗୁ ସାଧାରଣ ଜୀବନଯାତ୍ରା ଦୁର୍ବିଷହ ହୋଇପଡ଼ିଛି। ନିଆଁ ଲିଭାଇବା ପାଇଁ ପ୍ରଶାସନ ପକ୍ଷରୁ ଜୋର୍ଦାର ଉଦ୍ୟମ ଜାରି ରହିଛି। ଭିକ୍ଟୋରିଆ ଓ ନ୍ୟୁ ସାଉଥ୍ଓ୍ବେଲ୍ସରେ ଜରୁରିକାଳୀନ ସତର୍କ ସୂଚନା ଜାରି କରାଯାଇଛି। ନିଆଁଲିଭା କାର୍ଯ୍ୟରେ ହଜାର ହଜାର ଅଗ୍ନିଶମ କର୍ମଚାରୀ ନିୟୋଜିତ ଅଛନ୍ତି। ଏହା ସତ୍ତ୍ୱେ ନିଆଁ ଥମିବା ପରିବର୍ତ୍ତେ ଅନ୍ୟ ଅଞ୍ଚଳଗୁଡ଼ିକୁ ବ୍ୟାପିବାରେ ଲାଗିଛି।
ସେପ୍ଟେମ୍ବର ମାସରୁ ଅଷ୍ଟ୍ରେଲିଆର ଜଙ୍ଗଲରେ ନିଆଁ ଲାଗିବା ଆରମ୍ଭ ହୋଇଥିଲା। ଅତ୍ୟଧିକ ଉତ୍ତାପ ଏବଂ ଦୀର୍ଘମାସ ଧରି ଅନାବୃଷ୍ଟି ଲାଗିରହିଥିବାରୁ ନିଆଁ ଅନ୍ୟ ଅଞ୍ଚଳକୁ ମାଡ଼ିଚାଲିଥିବାବେଳେ ଗତ ସପ୍ତାହରୁ ଏହା ବିପର୍ଯ୍ୟୟ ସ୍ଥିତି ସୃଷ୍ଟି କରିଛି। ଅନେକ ସହରକୁ ଖାଲି କରିଦିଆଗଲାଣି। ବର୍ତ୍ତମାନ ସୁଦ୍ଧା ୨୦ରୁ ଊର୍ଦ୍ଧ୍ୱ ଲୋକଙ୍କ ମୃତ୍ୟୁ ଘଟିଲାଣି। ପାଖାପାଖି ୬ ନିୟୁତ ହେକ୍ଟର ଜଙ୍ଗଲ, ପାର୍କ ପୋଡ଼ିଗଲାଣି। ନ୍ୟୁ ସାଉଥଓ୍ବେଲ୍ସ ସର୍ବାଧିକ କ୍ଷତିଗ୍ରସ୍ତ ହୋଇଛି। ସେଠାରେ ୪ ନିୟୁତ ହେକ୍ଟରରୁ ଊର୍ଦ୍ଧ୍ୱ ଜଙ୍ଗଲ ସାଙ୍ଗକୁ ୧୩୦୦ରୁ ଅଧିକ ଘର ଜଳିଯାଇଛି। ହଜାର ହଜାର ଲୋକ ବାସହରା ହୋଇ ଅନ୍ୟତ୍ର ଆଶ୍ରୟ ନେଇଛନ୍ତି। ୧୩୦ରୁ ଅଧିକ ଅଞ୍ଚଳରେ ନିଆଁ ଲାଗିଥିବା ଜଣାପଡିଛି। ସେହିପରି ଭିକ୍ଟୋରିଆରେ ଥିବା ଜଙ୍ଗଲ ଅଞ୍ଚଳରେ ନଭେମ୍ବରରୁ ନିଆଁ ଲାଗିଥିବାବେଳେ ଇତିମଧ୍ୟରେ ୮ ଲକ୍ଷ ହେକ୍ଟର ଜଳିଗଲାଣି। ମାଲାକୁଟା ସହରର ଲୋକମାନେ ଡିସେମ୍ବର ୩୧ରେ ଘର ଛାଡ଼ି ବେଳାଭୂମି ଅଞ୍ଚଳକୁ ପଳାଇଥିଲେ। ପ୍ରାୟ ୧୦୦୦ ପର୍ଯ୍ୟଟକଙ୍କୁ ନୌସେନା କର୍ମଚାରୀ ଉଦ୍ଧାର କରି ଉପକୂଳ ସହରକୁ ନେଇଯାଇଛନ୍ତି। ଆଡିଲେଡ ପାର୍ବତ୍ୟାଞ୍ଚଳରେ ଶତାଧିକ ଘର ଜଳିଯାଇଛି। ଜଙ୍ଗଲ ନିଆଁରେ ଦୁଇଟି ସବ୍ଷ୍ଟେଶନ ଜଳିଯିବା ଫଳରେ ସିଡ୍ନୀ ଓ ଅନ୍ୟ କେତେକ ସହରକୁ ବିଦ୍ୟୁତ୍ ସରବରାହ ପ୍ରଭାବିତ ହୋଇଛି। ସ୍ଥିତି ଖରାପ ହେଲେ ବିଦୁତ୍ କାଟ କରାଯିବ ବୋଲି ସରକାର ସତର୍କ କରାଇଦେଇଛନ୍ତି। ନିଆଁଲିଭା ଓ ଉଦ୍ଧାର କାର୍ଯ୍ୟରେ ଅଗ୍ନିଶମ କର୍ମଚାରୀଙ୍କ ସମେତ ସୈନ୍ୟଙ୍କୁ ନିୟୋଜିତ କରାଯାଇଛି।