କୋଲକାତା,୧୯ା୬(ପି.ଟି.): ମଡେଲରୁ ଅଭିନେତ୍ରୀ ପାଲଟିଥିବା ଉଷଶୀ ସେନଗୁପ୍ତାଙ୍କୁ ଅସଦାଚରଣ କରିବା ଅଭିଯୋଗରେ ୭ ଯୁବକଙ୍କୁ କୋଲକାତା ପୋଲିସ ଗିରଫ କରିଛି। ପୂର୍ବତନ ମିସ୍ ଇଣ୍ଡିଆ ୟୁନିଭର୍ସ ଉଷଶୀ ସୋମବାର ରାତି ୧୧ଟା ୪୦ରେ ଜଣେ ସହକର୍ମୀଙ୍କ ସହିତ କର୍ମସ୍ଥଳରୁ ଘରକୁ ଫେରୁଥିବାବେଳେ କୋଲକାତାସ୍ଥିତ ଜବାହରଲାଲ ରୋଡ୍ କ୍ରସିଂ ନିକଟରେ ବାଇକ୍ରେ ୧୫ ଜଣ ଦୁର୍ବୃତ୍ତ ତାଙ୍କ କ୍ୟାବ୍କୁ ଧକ୍କା ଦେଇଥିଲେ। ସେମାନେ ଡ୍ରାଇଭରଙ୍କୁ ଗାଡ଼ିରୁ ବାହାରକୁ ଟାଣିନେଇ ମାଡ଼ ମାରିଥିଲେ। ଉଶଷୀ ଏହାର ପ୍ରତିବାଦ କରିଥିଲେ। ସେ ସହାୟତା ପାଇଁ ବଡ଼ପାଟିରେ ପୋଲିସକୁ ଡାକିବା ସହ ଘଟଣାର ଭିଡିଓ ନେଇଥିଲେ। ବାରମ୍ବାର ଅନୁରୋଧ ସତ୍ତ୍ୱେ ନିକଟସ୍ଥ ମଇଦାନ ଥାନାର ଅଧିକାରୀମାନେ ଆସିବାରେ ବିଳମ୍ବ କରିଥିଲେ। ପରେ ଲେକ୍ ଗାର୍ଡେନ୍ସ ଅଞ୍ଚଳରେ ୩ଟି ବାଇକ୍ରେ ଥିବା ୬ ଜଣ ଯୁବକ ତାଙ୍କୁ ବାହରକୁ ଘୋଷାଡ଼ି ନେଇଥିଲେ। ସେମାନେ ଭିଡିଓ ଡିଲିଟ୍ କରିବା ପାଇଁ ତାଙ୍କର ଫୋନ୍ ଭାଙ୍ଗିବାକୁ ଉଦ୍ୟମ କରିଥିଲେ। ଏନେଇ ସେ ଚାରୁ ଥାନାରେ ଏତଲା ଦେବାକୁ ଯାଇଥିଲେ। ହେଲେ ଥାନାରେ ଅଭିଯୋଗ ଗ୍ରହଣ କରିବାକୁ ମନାକରିବା ସହ ଭବାନୀପୁର ଥାନାକୁ ପଠାଇଦେଇଥିଲେ। ସେମାନେ ଅନେକ ପ୍ରଶ୍ନ ପଚାରିବା ପରେ ଡ୍ରାଇଭରଙ୍କ ଅଭିଯୋଗ ଗ୍ରହଣ କରିବାକୁ ମନାକରିଥିଲେ। ଶେଷରେ ସେ ବାଧ୍ୟ ହୋଇ ଫେସ୍ବୁକ୍ରେ ଉକ୍ତ ଭିଡିଓ ପୋଷ୍ଟ କରିଥିବା ଉଷଶୀ କହିଛନ୍ତି। ଉଷଶୀଙ୍କ ଭିଡିଓ ଏବଂ ସିସିଟିଭି ଫୁଟେଜ୍ ଆଧାରରେ ପୋଲିସ ୭ ଅଭିଯୁକ୍ତଙ୍କୁ ଗିରଫ କରିଥିବା କହିଛି।