ଢେଙ୍କାନାଳ ଅଫିସ, ୮।୧୨ – ଇଂଲିଶ ଶିକ୍ଷାର ଆବଶ୍ୟକତାକୁ ଦୃଷ୍ଟିରେ ରଖି ୧୯୬୯ରେ ପ୍ରତିଷ୍ଠା ହୋଇଥିଲା ମଣ୍ଟଫୋର୍ଟ ସ୍କୁଲ। ଏହାକୁ ପ୍ରତିଷ୍ଠା କରିବାରେ ତତ୍କାଳୀନ ସମୟରେ ବହୁ ଦୂରଦୃଷ୍ଟିସମ୍ପନ୍ନ ବ୍ୟକ୍ତିଙ୍କ ଉଦ୍ୟମ ପ୍ରଶଂସନୀୟ। ଆଜିର ସମୟରେ ସଂସ୍କୃତି ଏବଂ ଭାଷାକୁ ବଜାୟ ରଖିବା ସମସ୍ତଙ୍କ ପାଇଁ ଜରୁରୀ। ଶୃଙ୍ଖଳିତ ହୋଇ ଅପସଂସ୍କୃତିଠାରୁ ଦୂରରେ ରହିଲେ ଜାତି ଆଗକୁ ଯିବ ବୋଲି କହିଛନ୍ତି ଏମ୍ପି ମହେଶ ସାହୁ। ଢେଙ୍କାନାଳ ମଣ୍ଟଫୋର୍ଟ ସ୍କୁଲରେ ଦୁଇଦିନ ବ୍ୟାପୀ ଚାଲିଥିବା ସୁବର୍ଣ୍ଣ ଜୟନ୍ତୀ ସମାରୋହର ଶନିବାର ଅନୁଷ୍ଠିତ ଉଦ୍ଯାପନୀ ସମାରୋହରେ ମୁଖ୍ୟଅତିଥି ଭାବେ ଯୋଗଦେଇ ସେ ଏହା କହିଥିଲେ।
ମୁଖ୍ୟବକ୍ତା ଭାବେ ଯୋଗଦେଇ କିଟ୍ ଇଣ୍ଟରନ୍ୟାଶନାଲର ଡିଜି ଡ. ଦେବରାଜ ପ୍ରଧାନ କହିଲେ, ଶିକ୍ଷାକ୍ଷେତ୍ରରେ ସମଗ୍ର ରାଜ୍ୟରେ ସ୍ବତନ୍ତ୍ର ପରିଚୟ ହାସଲ କରିଛି ଢେଙ୍କାନାଳ। ଏହି ମାଟିରୁ ଗୌରବମୟ ଇତିହାସ ସୃଷ୍ଟି ହୋଇଛି। ବହୁ ପ୍ରତିଭାଧାରୀ ଅଞ୍ଚଳର ଟେକ ରଖିଛନ୍ତି। ଏହାକୁ ଆଗକୁ ନେବାକୁ ସେ ଛାତ୍ରୀଛାତ୍ରଙ୍କୁ ପରାମର୍ଶ ଦେଇଥିଲେ। ସମ୍ମାନିତ ଅତିଥି ଏସ୍ପି ଅନୁପମା ଜେମ୍ସ କହିଲେ, କେବଳ ପାଠପଢି ପରୀକ୍ଷାରେ ନମ୍ବର ରଖିଲେ ଜଣେ ସଫଳ ଛାତ୍ର ହୋଇପାରେ ନାହିଁ। ସବୁ ବିଷୟ ପ୍ରତି ଆଗ୍ରହ ପ୍ରକାଶ କରି ଜ୍ଞାନ ଆହରଣ କଲେ ଶିକ୍ଷା ଜୀବନ ପୂର୍ଣ୍ଣାଙ୍ଗ ହୋଇଥାଏ। ଏହି ଅବସରରେ ସମ୍ବଲପୁରରୁ ଆସିଥିବା ଅନୁଷ୍ଠାନର ଫାଦର ବାର୍ଥଲୋମିଉ ବିଲୁଙ୍ଗ୍ ଅତିଥିଙ୍କୁ ସମ୍ବର୍ଦ୍ଧିତ କରିଥିବାବେଳେ ପ୍ରିନ୍ସିପାଲ ଫାଦର ଫିଲିପ ବିବରଣୀ ପାଠ କରିଥିଲେ। ବିଭିନ୍ନ କ୍ଷେତ୍ରରେ ଅନୁଷ୍ଠାନ ପାଇଁ ଗୌରବ ଆଣିଥିବା ମେଧାବୀ ଛାତ୍ରୀଛାତ୍ରଙ୍କୁ ସମ୍ବର୍ଦ୍ଧିତ କରାଯାଇଥିଲା। ଶେଷରେ ଛାତ୍ରୀଛାତ୍ରଙ୍କ ଦ୍ୱାରା ସାଂସ୍କୃତିକ କାର୍ଯ୍ୟକ୍ରମ ଆୟୋଜିତ ହୋଇଥିଲା।