ମଣ୍ଟ୍ରେଲ, ୮।୮ (ଏଏଫ୍ପି)- କାନାଡାରେ ଚାଲିଥିବା ଏଟିପି ମଣ୍ଟ୍ରେଲ ମାଷ୍ଟର୍ସ ଟେନିସ ପ୍ରତିଯୋଗିତାରେ ସ୍ପାନିଶ ତାରକା ରାଫାଲ ନାଡାଲ ଓ ଅଷ୍ଟ୍ରିଆର ଡୋମିନିକ୍ ଥିଏମ୍ ୩ୟ ରାଉଣ୍ଡରେ ପ୍ରବେଶ କରିଛନ୍ତି। ପ୍ରତିଯୋଗିତାର ଟପ୍ ସିଡ୍ ନାଡାଲ ବର୍ଷା ବାଧାପ୍ରାପ୍ତ ୨ୟ ରାଉଣ୍ଡ ମୁକାବିଲାରେ ୭-୬ (୮/୬), ୬-୪ ସେଟ୍ରେ ବ୍ରିଟେନ୍ର ଡାନିଏଲ୍ ଇଭାନ୍ସଙ୍କୁ ପରାସ୍ତ କରିଥିଲେ। ଏହି ମ୍ୟାଚ୍ ଜିତିବାକୁ ନାଡାଲଙ୍କୁ ୨ ଘଣ୍ଟା ପାଖାପାଖି ସମୟ ଲାଗିଯାଇଥିଲା। ଚଳିତ ବର୍ଷ ନାଡାଲଙ୍କ ବିଜୟ-ପରାଜୟ ବ୍ୟବଧାନ ୩୮-୬ରେ ପହଞ୍ଚତ୍ଛି। ଓ୍ବିମ୍ବେଲଡନ ସେମିଫାଇନାଲରେ ରୋଜର ଫେଡରରଙ୍କ ନିକଟରୁ ପରାସ୍ତ ହେବାପରେ ତାଙ୍କର ଏହା ପ୍ରଥମ ମୁକାବିଲା ରହିଥିଲା। ସେହିଭଳି ୨ୟ ସିଡ୍ ଥିଏମ୍ ୬-୪, ୩-୬, ୬-୩ ସେଟ୍ରେ ଘରୋଇ ପ୍ରତିଯୋଗୀ ଡେନିସ୍ ଶାପୋଭାଲଭଙ୍କୁ ହରାଇଛନ୍ତି। କାନାଡାରେ ୫ଟି ପରାଜୟବରଣ କରିବା ପରେ ଥିଏମ୍ଙ୍କ ଏହା ପ୍ରଥମ ବିଜୟ ଥିଲା। ଥିଏମ୍ ପରବର୍ତ୍ତୀ ରାଉଣ୍ଡରେ ୨୦୧୪ ୟୁଏସ୍ ଚାମ୍ପିୟନ ମାରିନ ସିଲିକଙ୍କୁ ଭେଟିବେ। ସିଲିକ୍ ୬-୩, ୬-୪ ସିଧାସଳଖ ସେଟ୍ରେ ଅଷ୍ଟ୍ରେଲିଆର ଜନ୍ ମିଲମ୍ୟାନ୍ଙ୍କୁ ହରାଇଥିଲେ। ୨୦୧୩ରେ ଏଠାରେ ଫାଇନାଲ ଖେଳିଥିବା ଘରୋଇ ଖେଳାଳି ମିଲୋସ ରାଓନିକ୍ ଆଘାତଜନିତ କାରଣ ଯୋଗୁ ସାଥୀ ପ୍ରତିଯୋଗୀ ଫେଲିକ୍ସ ଏଗୁଅର-ଅଲିସିମିଙ୍କ ବିପକ୍ଷରେ ଅଧାରୁ ଓହରି ଯାଇଥିଲେ।
