ବନ୍ତଳା,୬ା୧(ଡି.ଏନ.ଏ.)- ଧାନମଣ୍ଡି ଖୋଲାଯିବାରେ ବିଳମ୍ବ ପ୍ରତିବାଦରେ ଅନୁଗୋଳ ବ୍ଲକ ମାଟିଆସାହି ପଞ୍ଚାୟତ ପୁରୁଣାଗଡ଼ରେ ଥିବା ସେବା ସମବାୟ ସମିତି ସମ୍ମୁଖରେ ସୋମବାର ୫୦ରୁ ଊଦ୍ଧର୍ବ ଚାଷୀ ଧାରଣା ଦେଇଥିଲେ। ଚାଷୀମାନେ ଅଭିଯୋଗ କରିଛନ୍ତି ଯେ, ଜିଲାର ବିଭିନ୍ନ ସମବାୟ ସମିତିରେ ଧାନମଣ୍ଡି ଖୋଲାଗଲାଣି। ସେଠାରେ ଅନେକ ଚାଷୀ ସେମାନଙ୍କ ଧାନ ବିକ୍ରି କରି ଟଙ୍କା ପାଇଲେଣି। ହେଲେ ମାଟିଆସାହି ପଞ୍ଚାୟତ ଅଧୀନରେ ଥିବା କରମଙ୍ଗା ସାହି (ପୁରୁଣାଗଡ଼) ସେବା ସମବାୟ ସମିତିରେ ଏଯାଏ ମଣ୍ଡି ଖୋଲାଯାଇ ନାହିଁ। ଫଳରେ ଧାନ ଅମଳ କରିଥିଲେ ବି ସ୍ଥାନୀୟ ଅଞ୍ଚଳର ଚାଷୀମାନେ ହାତବାନ୍ଧି ବସିଛନ୍ତି। ଏହି ସେବା ସମବାୟ ସମିତି ଉପରେ ମାଣିକଯୋଡି ଓ ଶରଧାପୁର ଅଞ୍ଚଳର ସମସ୍ତ ଚାଷୀ ନିର୍ଭର କରନ୍ତି। ତେଣୁ ଧାନମଣ୍ଡି ଖୋଲିବାରେ ବିଳମ୍ବ ହେଉଥିବା ପ୍ରତିବାଦରେ ସ୍ଥାନୀୟ ଅଞ୍ଚଳର ଚାଷୀମାନେ କରମଙ୍ଗାସାହି ସେବା ସମବାୟ ସମିତି ଆଗରେ ଧାରଣା ଦେବା ସହିତ ଜିଲାପାଳଙ୍କ ଉଦ୍ଦେଶ୍ୟରେ ସମିତି ସେକ୍ରେଟାରି ଶଙ୍କର ବେହେରାଙ୍କୁ ଦାବିପତ୍ର ପ୍ରଦାନ କରିଥିଲେ। ଚାଷୀ ପୂର୍ଣ୍ଣଚନ୍ଦ୍ର ଭୂତିଆ, ଶେଷଦେ ଡାଙ୍ଗ, ପ୍ରଭାକର ପତି, ରଞ୍ଜନ ମହାକୁଡ଼, ପ୍ରମାଦ କୁମାର ମହାନ୍ତି, ବିଶେଶ୍ୱର ଭୂତିଆ, କୁମୁଦ ଚନ୍ଦ୍ର ପଣ୍ଡା, ଅନ୍ତର୍ଯ୍ୟାମୀ ବାରିକ ପ୍ରମୁଖ ଧାରଣାରେ ବସିଥିବା ପ୍ରକାଶ କରିଛନ୍ତି। ଏ ସମ୍ପର୍କରେ କରମଙ୍ଗାସାହି ସେବା ସମବାୟ ସମିତିର ସେକ୍ରେଟାରି ଶଙ୍କର ବେହେରା କୁହନ୍ତି, କିଛି ଅସୁବିଧା ଥିବାରୁ ମଣ୍ଡି ଖୋଲାଯିବାରେ ବିଳମ୍ବ ହେଉଛି। ଚାଷୀମାନଙ୍କୁ ହଇରାଣ କରିବା ଆମର ଉଦ୍ଦେଶ୍ୟ ନୁହେଁ। ଉପରିସ୍ଥ ଅଧିକାରୀଙ୍କ ସହିତ ଅଲୋଚନା କରି ସମସ୍ୟାର ସମାଧାନ କରାଯିବ। ଶୀଘ୍ର ଧାନ ମଣ୍ଡି ଖୋଲିବ ବୋଲି ବେହେରା ପ୍ରକାଶ କରିଛନ୍ତି।