ସମ୍ବଲପୁର, ୯।୪ (ବ୍ୟୁରୋ): କରୋନା କଟକଣା ଓ ଲକ୍ ଡାଉନ ଘୋଷଣା ପରେ ଲୋକମାନଙ୍କ ଜୀବନ ଶୈଳୀରେ ପରିବର୍ତ୍ତନ ହୋଇଛି। ଶ୍ରମିକ, ଦିନ ମଜୁରିଆଙ୍କଠାରୁ ଆରମ୍ଭ କରି ସମସ୍ତ ଶ୍ରେଣୀର ପରିବାର ଉପରେ ଏହାର ପ୍ରଭାବ ପଡିଛି। ଏଥିରୁ ବାଦ୍ ପଡିନାହାନ୍ତି ହୀରାକୁଦ ଜଳଭଣ୍ଡାରରେ ନିର୍ଭର କରୁଥିବା ମତ୍ସ୍ୟଜୀବୀ ପରିବାର। ସେମାନେ ସାମାଜିକ ଦୂରତା ପାଳନ କରି ଜଳ ଭଣ୍ଡାରରୁ ମାଛ ମାରିବା ପାଇଁ ଯାଉନାହାନ୍ତି । କେତେକ ପରିବାର ଦୁଇଓଳା ଖାଇବା ପାଇଁ ମାଛ ମାରିବାକୁ ବାଧ୍ୟ ହେଉଛନ୍ତି। ତେଣୁ ଜଳ ଭଣ୍ଡାରରେ ୫୦ ପ୍ରତିଶତ ମାଛ ଉତ୍ପାଦନ ହ୍ରାସ ପାଇଛି।
ହୀରାକୁଦ ଜଳଭଣ୍ଡାର ପାର୍ଶ୍ୱରେ ବସବାସ କରୁଥିବା ସମ୍ବଲପୁର ଜିଲା ସମେତ ବରଗଡ ଓ ଝାରସୁଗୁଡା ଜିଲାର ୪ ହଜାର ୯୩୩ ମତ୍ସ୍ୟଜୀବୀ ତାଲିକା ଭୁକ୍ତ ହୋଇଛନ୍ତି। ସେମାନଙ୍କ ମଧ୍ୟରୁ ଅଧିକାଂଶଙ୍କ ଜୀବିକା ପ୍ରଭାବିତ ହୋଇଛି। କରୋନା କଟକଣା ଓ ଲକ୍ ଡାଉନ ଘୋଷଣା ଯୋଗୁଁ ୨୨ ତାରିଖରେ ସମସ୍ତ ଟ୍ରେନ ଚଳାଚଳ ବନ୍ଦ ରହିଛି । ତେଣୁ ରାଜ୍ୟ ବାହାରକୁ ଉତ୍ପାଦିତ ମାଛ ଯାଇ ପାରୁନାହିଁ । ଅନ୍ୟପଟେ ଟ୍ରକ ଗୁଡିକରେ ମଧ୍ୟ ରପ୍ତାନି ହୋଇପାରୁନାହିଁ । ହୀରାକୁଦ ଜଳଭଣ୍ଡାର ମତ୍ସ୍ୟଜୀବୀଙ୍କ ମୁଖ୍ୟ ଜୀବିକା କେନ୍ଦ୍ର ଅଟେ। ଏଠାରେ ପ୍ରାୟ ୪୯ ପ୍ରଜାତିର ମାଛ ଦେଖାଦେଇଥିବା ବେଳେ ୧୮ ପ୍ରଜାତିର ମାଛ ଖାଦ୍ୟ ପାଇଁ ଉପଯୋଗୀ । ତେଣୁ ବଜାରରେ ଏସବୁ ଉପଲବ୍ଧ ରହିଥାଏ । ଏହି ସମୟ ମାଛ ଧରିବା ପାଇଁ ଉପଯୁକ୍ତ ଅଟେ। ପ୍ରତିଦିନ ହାରାହାରି ୧୦ ମେଟ୍ରିକ ଟନ୍ ମାଛ ଧରାଯାଇଥାଏ । ରାଜ୍ୟ ତଥା ଜିଲା ବାହାର ବ୍ୟବସାୟୀମାନେ ମତ୍ସ୍ୟଜୀବୀଙ୍କ ଠାରୁ ମାଛ କିଣି ନେଇଥାନ୍ତି । ହେଲେ ଏବେ ସେମାନଙ୍କ ମଧ୍ୟ ଦେଖା ମିଳୁନାହିଁ। ରାଜ୍ୟ ବାହାର ପଶ୍ଚିମବଙ୍ଗ, ତଥା ରାଜ୍ୟର କଟକ, ଭୁବନେଶ୍ୱର, ବାଲେଶ୍ୱର ଆଦି ଜିଲାକୁ ଏଠାରୁ ମାଛ ପଠାଯାଏ । ଲକ୍ ଡାଉନ ଯୋଗୁ ତାହା ସମ୍ଭବ ହୋଇପାରୁନାହିଁ । ସ୍ଥାନୀୟ ବଜାରରେ ଭରସା କରି ରହିଛୁଁ । ହେଲେ ବଜାରରେ ଚାହିଦା କମ୍ ଥିବାରୁ ଉତ୍ପାଦନ ମଧ୍ୟ କରାଯାଉ ନାହିଁ । ଉତ୍ପାଦନ ୪ରୁ ୫ ମେଟ୍ରିକ ଟନ୍କୁ ଖସି ଆସିଛି । ଏବେ କଟକଣା ଅବଧି ରାଜ୍ୟ ସରକାର ଏପ୍ରିଲ ୩୦ ପର୍ଯ୍ୟନ୍ତ ବୃଦ୍ଧି କରିଛନ୍ତି । ଏଥିଯୋଗୁ ଆମର ସମସ୍ୟା ଆହୁରି ବଢିଯିବ ବୋଲି ଜଣେ ମାଛ ଚାଷୀ କହିଛନ୍ତି ।