ଛତ୍ରପୁର,୨୭।୭(ଡି.ଏନ୍.ଏ): ଗଞ୍ଜାମ ଜିଲା ଗୋପାଳପୁର ପୋର୍ଟ ପରିସରରେ ଥିବା ମତ୍ସ୍ୟଜେଟିର ମୁହାଣ ଖନନ ଦାବିରେ ଶନିବାର ମତ୍ସ୍ୟଜୀବୀଙ୍କ ପକ୍ଷରୁ ଧାରଣା ଦିଆଯିବା ସହ ଆନ୍ଦୋଳନ ଆରମ୍ଭ ହୋଇଛି। ଗୋପାଳପୁର ପୋର୍ଟ ପରିସରରେ ଥିବା ଫିସେରି ଜେଟି ମୁହାଣ ବାଲି ଦ୍ୱାରା ପୋତି ହୋଇଯାଇଛି। ଫଳରେ ସ୍ଥାନୀୟ ଅଞ୍ଚଳର ମତ୍ସ୍ୟଜୀବୀମାନଙ୍କର ଡଙ୍ଗାଗୁଡ଼ିକ ସମୁଦ୍ରକୁ ଯିବା ଆସିବାରେ ବହୁ ଅସୁବିଧା ହେଉଛି। ଡଙ୍ଗାଗୁଡିକ ପଥର ଉପରେ ବାଡେଇ ହୋଇ ଭାଙ୍ଗିଯିବା ସହ ଜାଲ ଓ ଇଂଜିନ୍ଗୁଡିକ ନଷ୍ଟ ହେଉଥିବା ମତ୍ସ୍ୟଜୀବୀମାନେ ଅଭିଯୋଗ କରିଛନ୍ତି ା ଏନେଇ ବାରମ୍ବାର ପ୍ରଶାସନର ଦୃଷ୍ଟି ଆକର୍ଷଣ କରାଯାଇଥିଲେ ହେଁ କୌଣସି ସୁଫଳ ମିଳୁ ନ ଥିବା ମତ୍ସ୍ୟଜୀବୀ କହିଛନ୍ତି।
ଚଳିତ ମାସ ୧୮ ତାରିଖରେ ଏହି ସମସ୍ୟାର ସମାଧାନ ପାଇଁ ଜିଲାପାଳଙ୍କୁ ଲିଖିତ ଭାବେ ସାନଆର୍ଯ୍ୟପଲ୍ଲୀସ୍ଥିତ ଶ୍ରୀ ମୁତ୍ୟାଲୁପୋଲାମ୍ମା ଗ୍ରାମ୍ୟ କମିଟି ପକ୍ଷରୁ ଅବଗତ କରାଯାଇଥିଲା। ୭ ଦିନ ମଧ୍ୟରେ ଏହାର ସମାଧାନ ନ ହେଲେ ମତ୍ସ୍ୟଜୀବୀମାନଙ୍କ ପକ୍ଷରୁ ଗଣଆନ୍ଦୋଳନ କରାଯିବ ବୋଲି ଲିଖିତ ଅଭିଯୋଗ ମାଧ୍ୟମରେ ଜଣାଇ ଦିଆଯାଇଥିଲା। ତେବେ ସମସ୍ୟା ସମାଧାନ ନ ହେବାରୁ ଶନିବାର ପୋର୍ଟ ମୁଖ୍ୟ ଫାଟକ ସମ୍ମୁଖରେ ଧାରଣା ଦେଇ ମତ୍ସ୍ୟଜୀବୀମାନେ ଆନ୍ଦୋଳନ କରିଛନ୍ତି। ଏଥିରେ ବି ଭୀମସେନ୍, କମିଟିର ସଭାପତି ଏନ୍. ନାନେୟା, ବିଜେଡି ନେତା ଏମ୍. ଦିଲୀପ, ସମ୍ପାଦକ ଏମ୍. ଏରେୟା, ପି. ଏରେୟା, ବି. ଲାଛେୟା, କୋଷାଧ୍ୟକ୍ଷ ପି. ତାତେୟାଙ୍କ ସମେତ ବହୁ ମତ୍ସ୍ୟଜୀବୀ ସାମିଲ ଅଛନ୍ତି।