ପାରାଦୀପ,୧୦ା୧୨(ସ୍ବ.ପ୍ର.): ସ୍ଥାନୀୟ ନେହେରୁ ବଙ୍ଗଳାସ୍ଥ ମାଛଧରା ବନ୍ଦର ପରିସରରେ ସୋମବାର ମତ୍ସ୍ୟଜୀବୀଙ୍କ ପାଇଁ ଦିନିକିଆ ତାଲିମ ଶିବିର ଅନୁଷ୍ଠିତ ହୋଇଯାଇଛି। ଏମ୍ପିଇଡିଏ (ମେରାଇନ ପ୍ରଡକ୍ଟ ଏକ୍ସପୋର୍ଟ ଡେଭଲେପମେଣ୍ଟ ଅଥରିଟି) ନେଟଫିସ୍ ଓ ମତ୍ସ୍ୟବିଭାଗ ପକ୍ଷରୁ ଆୟୋଜିତ ଶିବିରରେ ମତ୍ସ୍ୟଜୀବୀଙ୍କୁ ମତ୍ସ୍ୟ ଉତ୍ପାଦନ, ସଂରକ୍ଷଣ, ମାନ ଓ ଗୁଣବତ୍ତା ସମ୍ପର୍କରେ ତାଲିମ ପ୍ରଦାନ କରାଯାଇଥିଲା। ପାରାଦୀପ ବନ୍ଦର ସିଏସ୍ଆର ଅର୍ଥରେ ଆୟୋଜିତ ଏହି ଶିବିରକୁ ବନ୍ଦର ଅଧ୍ୟକ୍ଷ ରିଙ୍କେଶ ରାୟ ଉଦ୍ଘାଟନ କରିଥିଲେ। ଅନ୍ୟମାନଙ୍କ ମଧ୍ୟରେ ଏମ୍ପିଇଡିଏର ସହକାରୀ ନିର୍ଦ୍ଦେଶକ ରନତ୍ାକର ନାୟକ, ଉପନିର୍ଦ୍ଦେଶକ ୟୁ.ସି. ମହାପାତ୍ର, ଜିଲା ମତ୍ସ୍ୟ ଅଧିକାରୀ ସୁବ୍ରତ କୁମାର ଦାଶ, ଓମ୍ଫା ସଭାପତି ସୁମନ୍ତ କୁମାର ବିଶ୍ୱାଳ, ଜିଲା ମତ୍ସ୍ୟ ଅଧିକାରୀ (ସାମୁଦ୍ରିକ) ମାନସ ରଞ୍ଜନ ସାହୁ ପ୍ରମୁଖ ଉପସ୍ଥିତ ଥିଲେ।
ଅଧ୍ୟକ୍ଷ ରାୟ କହିଥିଲେ, କେନ୍ଦ୍ର ସରକାରଙ୍କ ସାଗରମାଳା ପ୍ରକଳ୍ପରେ ୪ ପ୍ରସଙ୍ଗ ଉପରେ ଗୁରୁତ୍ୱ ଦିଆଯାଇଛି। ସେଗୁଡିକ ହେଲା ବନ୍ଦରଗୁଡିକର ବୈଷୟିକ ସମ୍ପ୍ରସାରଣ, ରେଳପଥ ଓ ରାଜପଥର ସଂଯୋଗୀକରଣ, ବନ୍ଦର ପାର୍ଶ୍ୱବର୍ତ୍ତୀ ଅଞ୍ଚଳରେ ଶିଳ୍ପାୟନ ଓ ଗୋଷ୍ଠୀ ବିକାଶ (କମୁନିଟି ଡେଭଲେପମେଣ୍ଟ)। ଏହି ଗୋଷ୍ଠୀ ମଧ୍ୟରେ ପାରାଦୀପର ୫୦ ହଜାର ମତ୍ସ୍ୟଜୀବୀ ଅଛନ୍ତି। ସେମାନଙ୍କ ପାଇଁ ପାରାଦୀପ ବନ୍ଦର ସମସ୍ତ ପ୍ରକାର ସହାୟତା ଯୋଗାଇଦେବ। ଯେମିତି ଗତ ୫ ବର୍ଷରେ ଅଠରବାଙ୍କିରୁ ମାଛଧରା ବନ୍ଦର ପର୍ଯ୍ୟନ୍ତ ରାସ୍ତାକୁ ୨ କୋଟି ଟଙ୍କା ଖର୍ଚ୍ଚ କରି କଂକ୍ରିଟ୍ କରିବା ସହ ଆଲୋକୀକରଣ କରିଛି। ଏବେ ମହାନଦୀ ମୁହାଣ ଖୋଳାଯିବ। ଏହାକୁ ଏକ କର୍ତ୍ତବ୍ୟ ବୋଲି ସେ କହିଥିଲେ। ପରେ ଅନ୍ୟମାନେ ମାଛର ଗୁଣବତ୍ତା, ଧରିବାବେଳେ ସ୍ବଚ୍ଛତା ବଜାୟ ରଖିବା, ମାଛ ଜାଲରେ ପରିବର୍ତ୍ତନ (ଫାଶୀ ଜାଲ ବଦଳରେ ବର୍ଗାକାର ଜାଲ) ବ୍ୟବହାର କରିବା ସମ୍ପର୍କରେ କହିଥିଲେ। ଶିବିରକୁ ନେଟ୍ଫିସର ସଂଯୋଜକ ଗୟାଧର ଜେନା, ମତ୍ସ୍ୟ ଅଧିକାରୀ ମଧୁମୟ ସାମଲ ପ୍ରମୁଖ ସଂଚାଳନ କରିଥିଲେ।