ରିୟାଧ,୧୮-୧୦(ଏଏଫ୍ପି):ସୌଦି ଆରବର ମଦିନା ସହରରେ ସଡ଼କ ଦୁର୍ଘଟଣାରେ ୩୫ ବିଦେଶୀ ପ୍ରାଣ ହରାଇଛନ୍ତି। ମୃତକଙ୍କ ମଧ୍ୟରେ ଜଣେ ଭାରତୀୟ ଅଛନ୍ତି। ତାଙ୍କ ସ୍ତ୍ରୀ ମଧ୍ୟ ଆହତ ହୋଇଛନ୍ତି। ତୀର୍ଥଯାତ୍ରୀମାନଙ୍କୁ ନେଇ ଯାଉଥିବା ବସ୍କୁ ଅନ୍ୟ ଏକ ଭାରିଯାନ ଧକ୍କା ଦେଇଥିଲା। ଏଥିରେ ଅନ୍ୟ ୪ ଗୁରୁତର ଆହତ ହୋଇଛନ୍ତି। ଆରବ ଓ ଏସିଆର ତୀର୍ଥଯାତ୍ରୀମାନେ ଉକ୍ତ ବସ୍ରେ ମଦିନାରୁ ମକ୍କା ଯାଉଥିବାବେଳେ ଏହି ଦୁର୍ଘଟଣା ଘଟିଥିଲା। ଘଟଣାସ୍ଥଳରେ ବସ୍ଟି ଜଳିଯାଇଥିଲା। ଆହତମାନଙ୍କୁ ଅଲ୍ ହମ୍ନା ହସ୍ପିଟାଲକୁ ସ୍ଥାନାନ୍ତର କରାଯାଇଛି। ମର୍ମନ୍ତୁଦ ଦୁର୍ଘଟଣା ଲାଗି ଯୁବରାଜ ଫୈଜଲ ବିନ୍ ସଲମାନ, ମଦିନା ରାଜ୍ୟପାଳ ଦୁଃଖପ୍ରକାଶ କରିବା ସହ ସମବେଦନା ଜଣାଇଛନ୍ତି। ଭାରତର ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ମଧ୍ୟ ଶୋକବ୍ୟକ୍ତ କରିଛନ୍ତି। ମକ୍କାରେ ମର୍ମନ୍ତୁଦ ଦୁର୍ଘଟଣା ଖବର ଶୁଣି ମର୍ମାହତ। ମୃତକଙ୍କ ପରିବାର ସଦସ୍ୟଙ୍କ ଲାଗି ସମବେଦନା ଜଣାଇବା ସହ ଆହତମାନଙ୍କ ଆଶୁ ଆରୋଗ୍ୟ କାମନା କରୁଛି ବୋଲି ପ୍ରଧାନମନ୍ତ୍ରୀ ଟୁଇଟ୍ କରିଛନ୍ତି। ବସ୍ରେ ଅନୂ୍ୟନ ୧୦ ଜଣ ଭାରତୀୟ ଥିଲେ ବୋଲି କୁହାଯାଉଛି। ସେମାନଙ୍କ ସମ୍ପର୍କରେ ସବିଶେଷ ବିବରଣୀ ଦେବା ଲାଗି ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ ସୌଦି ପ୍ରଶାସନକୁ କୁହାଯାଇଛି। ବହିର୍ବ୍ୟାପାର ମନ୍ତ୍ରୀ ଏସ୍. ଜୟଶଙ୍କର ମଧ୍ୟ ଦୁର୍ଘଟଣାରେ ଏତେ ସଂଖ୍ୟାରେ ବିଦେଶୀଙ୍କ ମୃତ୍ୟୁକୁ ନେଇ ଦୁଃଖପ୍ରକାଶ କରିଛନ୍ତି। ସେ ମୃତକମାନଙ୍କ ପରିବାରକୁ ସମବେଦନା ଜଣାଇଛନ୍ତି।
ହଜ୍ ବେଳେ ପବିତ୍ର ସହର ମକ୍କା ଓ ମଦିନାରେ ଶ୍ରଦ୍ଧାଳୁମାନଙ୍କୁ ପରିବହନ କରିବା ଏକ ବଡ଼ ଚ୍ୟାଲେଞ୍ଜ। ସେତେବେଳେ ଦୁଇ ସହରରେ ଗାଡ଼ି ସଂଖ୍ୟା ଏତେ ବଢ଼ିଯାଇଥାଏ ଯେ, ଘଣ୍ଟା ଘଣ୍ଟା ଧରି ଟ୍ରାଫିକ୍ ଜାମ୍ ରୁହେ। ଗତବର୍ଷ ଏପ୍ରିଲରେ ବସ୍-ତେଲ ଟ୍ୟାଙ୍କର ଦୁର୍ଘଟଣାରେ ୪ ବ୍ରିଟେନ ନାଗରିକ ପ୍ରାଣ ହରାଇଥିଲେ।