ଭୁବନେଶ୍ୱର, ୭ା୩(ବ୍ୟୁରୋ): ମଦ ନିଶାରେ ସାଙ୍ଗକୁ ହତ୍ୟା କରିଥିଲା ସାଙ୍ଗ। ନିଜ ଘରକୁ ଡାକି ମଦ ପିଆଇ ମୁଣ୍ଡକୁ ମଦ ବୋତଲରେ ପିଟି ଜୀବନ ନେଇଥିଲା। ପ୍ରମାଣ ଲୁଚାଇବା ପାଇଁ ମୃତଦେହକୁ ସ୍କୁଟିରେ ଲଦି ଇନ୍ଫୋସିଟି ଥାନା ଅଧୀନ ପଟିଆ ବିଗ୍ବଜାର ପଛପଟେ ଫିଙ୍ଗିଦେଇଥିଲା। ପୋଲିସ ପ୍ରଥମେ ଏହାକୁ ଏକ ଦୁର୍ଘଟଣାଜନିତ ମୃତ୍ୟୁ ଭାବି ଅପମୃତ୍ୟୁ ମାମଲା ରୁଜୁ କରି ବସିପଡ଼ିିଥିଲା। ହେଲେ ବ୍ୟବଚ୍ଛେଦ ରିପୋର୍ଟ ଆସିବା ପରେ ସମ୍ପୃକ୍ତ ଯୁବକଙ୍କ ମୁଣ୍ଡକୁ ପିଟିି ହତ୍ୟା କରାଯାଇଥିବା ଜଣାପଡ଼ିଥିଲା। ଫଳରେ ପୋଲିସ ତଦନ୍ତ ପ୍ରକ୍ର୍ରିୟାକୁ ତ୍ୱରାନ୍ବିତ କରିଥିଲା। ଶୁକ୍ରବାର ଅଭିଯୁକ୍ତ ସାଙ୍ଗ ସମ୍ବଲପୁରର ସୁଶାନ୍ତ ନାଥ(୪୭)ଙ୍କୁ ପୋଲିସ ଗିରଫ କରିଛି। ହତ୍ୟାରେ ବ୍ୟବହୃତ ମଦ ବୋତଲ ଏବଂ ଅନ୍ୟ ସାମଗ୍ରୀ ଜବତ କରାଯାଇଛି।
ସୂଚନା ଅନୁଯାୟୀ, ବିଜୟ ପରମାଣିକ ଶିଖରଚଣ୍ଡୀ ବସ୍ତିରେ ରହି ଘଣ୍ଟା ବେପାର କରନ୍ତି। ତାଙ୍କର ସୁଶାନ୍ତଙ୍କ ସହ ଭଲ ବନ୍ଧୁତା ଥିଲା। ସୁଶାନ୍ତଙ୍କର ପଟିଆ ଛକ ନିକଟରେ ଏକ ୩ ମହଲା କୋଠା ଅଛି। ଗତ ଫେବୃୟାରୀ ୨୯ ତାରିଖରେ ସୁଶାନ୍ତଙ୍କ ସ୍ତ୍ରୀ ଓ ପୁଅଙ୍କ ଅନୁପସ୍ଥିତିରେ ବିଜୟଙ୍କୁ ମଦ ପିଇବାକୁ ଡାକିଥିଲେ ସୁଶାନ୍ତ। ଉଭୟେ ମଦ ପିଇବା ପରେ ନିଶାଗ୍ରସ୍ତ ହୋଇଯାଇଥିଲେ। ଏହି ସମୟରେ ସେମାନଙ୍କ ମଧ୍ୟରେ କୌଣସି କଥାକୁ ନେଇ ଯୁକ୍ତିତର୍କ ହୋଇଥିଲା। ସୁଶାନ୍ତ ଉତ୍କ୍ଷିପ୍ତ ହୋଇ ଏକ ମଦ ବୋତଲରେ ବିଜୟଙ୍କ ମୁଣ୍ଡକୁ ପିଟି ଦେଇଥିଲେ। ପରେ ତାଙ୍କ ମୁଣ୍ଡକୁ ଏକ କଠିନ ପଦାର୍ଥରେ ପିଟି ହତ୍ୟା କରିଥିଲେ। ପ୍ରମାଣ ଲୁଚାଇବା ପାଇଁ ବିଜୟଙ୍କ ସ୍କୁଟିରେ ମୃତଦେହ ଲଦି ପଟିଆ ବିଗ୍ବଜାର ପଛପଟେ ଫିଙ୍ଗି ଦେଇଥିଲେ। ଏହାପରେ ଘରକୁ ଆସି ରକ୍ତକୁ ପୋଛିବା ସହ ମଦ ବୋତଲକୁ ଗୋଟାଇ ଘର ପଛ ପଟେ ଫିଙ୍ଗି ଦେଇଥିଲେ। ମାର୍ଚ୍ଚ ୧ ତାରିଖ ସକାଳୁ କିଛି ଲୋକ ମୃତଦେହ ଦେଖି ପୋଲିସକୁ ଖବର ଦେଇଥିଲେ। ପୋଲିସ ଏ ନେଇ ତଦନ୍ତ ଜାରି ରଖିଥିଲା। ବ୍ୟବଚ୍ଛେଦ ରିପୋର୍ଟ ମିଳିବା ପରେ ହତ୍ୟାକାଣ୍ଡ ବୋଲି ଜାଣିବାକୁ ପାଇ ଖୋଳତାଡ଼ କରିଥିଲା। ଉଭୟ ଘର ଲୋକଙ୍କୁ ପଚରାଉଚରା କରିବା ସହ ମାରୁତିଭିଲ୍ଲାରେ ଲାଗିଥିବା ଏକ ସିସିଟିଭି ଯାଞ୍ଚ କରିଥିଲା। ସେଥିରେ ମୃତଦେହକୁ ଏକ ସ୍କୁଟିରେ ଲଦି ସୁଶାନ୍ତ ନେଉଥିବା ଦୃଶ୍ୟ ରହିଥିଲା। ଏହାପରେ ପୋଲିସ ସୁଶାନ୍ତଙ୍କ ଘରେ ଚଢାଉ କରି ତାଙ୍କୁ ଗିରଫ କରିଛି। ମଦ ନିଶାରେ ଏହି ଘଟଣା ଘଟାଇଥିବା ପୋଲିସ ଆଗରେ ଅଭିଯୁକ୍ତ ସ୍ବୀକାର କରିଛନ୍ତି।
