ବଅଁରପାଳ, ୭।୭ (ଡି.ଏନ୍.ଏ) – ହିନ୍ଦୋଳ ମଦଭାଟି ମ୍ୟାନେଜର ସୌରଭ ଯାଦବଙ୍କଠାରୁ ୫ଲକ୍ଷ ଟଙ୍କା ଲୁଟ୍ ଘଟଣାରେ ସମ୍ପୃକ୍ତ ଡକାୟତି ଗ୍ୟାଙ୍ଗର ମାଷ୍ଟର ମାଇଣ୍ଡ୍ଙ୍କ ସମେତ ୪ଜଣଙ୍କୁ ପୋଲିସ ଗିରଫ କରିଛି। ସେମାନେ ହେଲେ ମୋଟଙ୍ଗା ଥାନା ଅଞ୍ଚଳର ଗଗନ ନାୟକ (୨୫), ହିନ୍ଦୋଳ ଥାନା ଟାଙ୍ଗିଶାଳର ସଞ୍ଜୟ ସାମଲ (୨୫), ବାଲିମୀ ଥାନା ଅଞ୍ଚଳର ଭରତ ନାଏକ (୨୪) ଏବଂ ସୌମ୍ୟରଞ୍ଜନ ପ୍ରଧାନ (୧୯)। ଅଭିଯୁକ୍ତଙ୍କ ନିକଟରୁ ୨ ବାଇକ୍, ସ୍କୁଟି, କାର୍ ଜବତ କରାଯାଇଛି। ଏଥିରେ ସାମିଲ ଥିବା ଅନ୍ୟ ୩ ଜଣ ଫେରାର ଅଛନ୍ତି। ଅନ୍ୟଜଣେ ଆପରାଧିକ ମାମଲାରେ ଗିରଫ ହୋଇ ତାଳଚେର ଜେଲରେ ଅଛନ୍ତି। ବଅଁରପାଳ ଥାନାରେ ଶନିବାର ଆୟୋଜିତ ଖବରଦାତା ସମ୍ମିଳନୀରେ ଅନୁଗୋଳ ଏସ୍ଡିପିଓ ଅଶ୍ୱିନୀ କୁମାର ସାହୁ ଏବଂ ଥାନାଧିକାରୀ ସୁନୀଲ କୁମାର କର ଡକାୟତି ଗ୍ୟାଙ୍ଗର କଳାକାରନାମା ଉପରୁ ପରଦା ଉଠାଇଛନ୍ତି।
ଅନୁଗୋଳ ଅଞ୍ଚଳର ସୌରଭ ହିନ୍ଦୋଳ ମଦଭାଟି ମ୍ୟାନେଜର ଭାବେ କାର୍ଯ୍ୟ କରନ୍ତି। ଗତ ଜୁନ୍ ୧୪ ଅପରାହ୍ନରେ ସେ ହିନ୍ଦୋଳ, ମହୀଧରପୁର, ତଳମୂଳ, ଫୁଲପଡ଼ା ଅଞ୍ଚଳର ଲାଇସେନ୍ସପ୍ରାପ୍ତ ଦେଶୀ ଓ ବିଦେଶୀ ମଦ ଦୋକାନରୁ ଟଙ୍କା ସଂଗ୍ରହ କରି ଅନୁଗୋଳ ଫେରୁଥିଲେ। ଏହି ସମୟରେ ଫୁଲପଡ଼ା ନିକଟରେ ୩ଟି ବାଇକ୍ରେ ୮ଜଣ ଯୁବକ ତାଙ୍କୁ ଅଟକାଇଥିଲେ। ଅଭିଯୁକ୍ତମାନେ ଭୁଜାଲିରେ ଆକ୍ରମଣ କରିବା ସହ ସ୍କୁଟି ଏବଂ ସ୍କୁଟିରେ ଥିବା ୫ଲକ୍ଷ ୬ ହଜାର ଟଙ୍କା ଲୁଟି ନେଇଥିଲେ। ଲୁଟ୍ର ଶିକାର ହୋଇଥିବା ସୌରଭ ଏ ନେଇ ବଅଁରପାଳ ଥାନାରେ ଲିଖିତ ଅଭିଯୋଗ କରିଥିଲେ। ଛାନ୍ଭିନ୍ ବେଳେ ପୋଲିସ ସ୍କାନରକୁ ଆସିଥିଲେ ଘଟଣାର ମାଷ୍ଟର ମାଇଣ୍ଡ ସଞ୍ଜୟ ସାମଲ ଓରଫ୍ ଗେତୁ (୨୫)।
ପୋଲିସ ସୂଚନା ଅନୁଯାୟୀ, ସଞ୍ଜୟଙ୍କ ସାତମାଇଲରେ ଏକ ଢାବା ଅଛି। ହିନ୍ଦୋଳରେ ଥିବା ମଦ କାଉଣ୍ଟରରୁ ସେ ମଦ ଆଣନ୍ତି। ମଦ କାରବାର ବେଳେ ଉକ୍ତ କାଉଣ୍ଟରର ବ୍ୟବସାୟ ଏବଂ ଆଦାୟ ହେଉଥିବା ଟଙ୍କା ବିଷୟରେ ଜାଣିପାରିଥିଲେ। ଏହାପରେ ମ୍ୟାନେଜରଙ୍କୁ ଲୁଟ୍ କରିବାକୁ ପ୍ରସ୍ତୁତ କରିଥିଲେ ବ୍ଲୁପ୍ରିଣ୍ଟ। ଏଥିପାଇଁ ସେ ସହଯୋଗୀଙ୍କ ସହାୟତା ନେଇଥିଲେ। ସଞ୍ଜୟ ଧରାପଡ଼ିବା ପରେ ପୋଲିସ ଡକାୟତି ଗ୍ୟାଙ୍ଗ୍ର ଅନ୍ୟ ସଦସ୍ୟଙ୍କ ବିଷୟରେ ସୂଚନା ପାଇଥିଲା। ସମସ୍ତଙ୍କୁ ଧରିବାକୁ ଜାଲ ବିଛାଇଥିଲା ଅନୁଗୋଳ ସ୍ପେଶାଲ ସ୍କ୍ବାଡ୍ ଏବଂ ବଅଁରପାଳ ପୋଲିସ। ବାଲିମି, ହିନ୍ଦୋଳ, ବନ୍ତଳା, ମୋଟଙ୍ଗା ପୋଲିସ ସହାୟତାରେ ବିଭିନ୍ନ ସ୍ଥାନରେ ଚଢ଼ାଉ କରି ଅଭିଯୁକ୍ତଙ୍କୁ ଗିରଫ କରାଯାଇଥିବା ଏସ୍ଡିପିଓ ସୂଚନା ଦେଇଛନ୍ତି।