ଛତ୍ରପୁର,୨୫ା୧୨(ଡି.ଏନ୍.ଏ.)- ଭୁବନେଶ୍ୱରଠାରେ ମଙ୍ଗଳବାର ସ୍କୁଲ ଓ ଗଣଶିକ୍ଷା ବିଭାଗ ସଚିବ ଭିଡିଓ କନଫରେନ୍ସିଂ ଜରିଆରେ ଶିକ୍ଷା ସମ୍ବନ୍ଧୀୟ ସମୀକ୍ଷା କରିଛନ୍ତି। ଏହି ପରିପ୍ରେକ୍ଷୀରେ ଛତ୍ରପୁରସ୍ଥିତ ସମଗ୍ର ଶିକ୍ଷା ଅଭିଯାନ ସମ୍ମିଳନୀ ଗୃହରେ ଗଞ୍ଜାମ ଜିଲା ଶିକ୍ଷା ଅଧିକାରୀ ସନାତନ ପଣ୍ଡା, ଛତ୍ରପୁର ବ୍ଲକ ଶିକ୍ଷା ଅଧିକାରୀ ଅବିନାଶ ଶତପଥୀ, ସମଗ୍ର ଶିକ୍ଷା ଅଭିଯାନର ସଂଯୋଜକ, ବ୍ଲକ ଶିକ୍ଷା ଅଧିକାରୀ ପ୍ରମୁଖ ଉପସ୍ଥିତ ଥିଲେ। ଗଞ୍ଜାମ ଜିଲା ପକ୍ଷରୁ ପ୍ରସ୍ତୁତ ହୋଇଥିତ୍ବା ‘ମଧୁ’ ଆପ୍କୁ ସଚିବ ପ୍ରଶଂସା କରିଥିଲେ। ମୁଖ୍ୟମନ୍ତ୍ରୀ ଶୁଭାରମ୍ଭ କରିଥିବା ଏହି ଆପ୍ ଦ୍ୱାରା ଛାତ୍ରୀଛାତ୍ରମାନେ ନିଜର ପାଠ୍ୟ ଉପରେ ଥିବା ସନ୍ଦେହକୁ ଦୂର କରିପାରୁଛନ୍ତି। ପରେ ଗାରିମା ଆୱାର୍ଡ ଉପରେ ଆଲୋଚନା ହୋଇଥିଲା। ଛାତ୍ରୀଛାତ୍ରଙ୍କ ସଫଳତାକୁ ଆଧାର କରି ସ୍କୁଲଗୁଡିକୁ ବ୍ରୋଞ୍ଜ ଆୱାର୍ଡ ମିଳିବ। ପରେ ସିଲଭର ଓ ଗୋଲ୍ଡ ଆୱାର୍ଡ ମିଳିବା ନିୟମ ରହିଛି। ବ୍ରୋଞ୍ଜ ଆୱାର୍ଡ ମିଳିଲେ ସ୍କୁଲ କାନ୍ଥରେ ୩ଟି ଷ୍ଟାର ଲଗାଯିବ। ଏହାର କିଭଳି ସଫଳ ରୂପାୟନ ହେବ ତାହା ଉପରେ ସଚିବ ଗୁରୁତ୍ୱାରୋପ କରିଛନ୍ତି। ନକଲି ପ୍ରମାଣପତ୍ର ଦାଖଲ କରି ନିଯୁକ୍ତି ପାଇଥିବା ଶିକ୍ଷକମାନଙ୍କର ଯାଞ୍ଚ କରି କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ କୁହାଯାଇଛି। କମ୍ ପିଲା ଥିବା ସ୍କୁଲକୁ ନିକଟବର୍ତ୍ତୀ ସ୍କୁଲ ସହ ମିଶ୍ରଣ ଓ ଅନଲାଇନ୍ରେ ଟ୍ରାନ୍ସଫର ହୋଇଥିବା ଶିକ୍ଷକ ପ୍ରସଙ୍ଗ ଉପରେ ଆଲୋଚନା କରାଯାଇଥିଲା। ଭିଡିଓ କନଫରେନ୍ସିଂ ପରେ ଜିଲା ଶିକ୍ଷା ଅଧିକାରୀ ପଣ୍ଡା ସମୀକ୍ଷା କରିଥିଲେ। ଗାରିମା, ମଧୁ ଆପ୍ ଉପରେ ଅଧିକ ଧ୍ୟାନ ଦେବାକୁ ସେ ଗୁରୁତ୍ୱାରୋପ କରିଥିଲେ।