ରାୟଗଡ଼ା ଅଫିସ,୯ା୧: ବିବାହ ପ୍ରସ୍ତାବ ବେଳେ ପୁଅଘର ଦେଇଥିବା ସୁନା ବିସ୍କୁଟକୁ ଫେରାଉ ନ ଥିଲେ ମଧ୍ୟସ୍ଥ। ଥାନାରେ ଏତଲା ପରେ ପୋଲିସ ତଦନ୍ତ କରି ମଧ୍ୟସ୍ଥଙ୍କୁ ଗିରଫ କରିବା ସହ ତାଙ୍କଠାରୁ ୧୦୦ ଗ୍ରାମ୍ର ସୁନା ବିସ୍କୁଟ ଜବତ କରିଛି।
ସୂଚନା ଅନୁଯାୟୀ, ରାୟଗଡ଼ା ଜିଲା ବିଷମକଟକ ଥାନା ଦୁର୍ଗୀ ଗ୍ରାମର ଭୁନା ତ୍ରିପତି ରାଓ (୭୨) ନିଜ ପୁଅ ବାହାଘର ପାଇଁ ପ୍ରସ୍ତାବ ଠିକ୍ କରିଥିଲେ। ଏଥିରେ ଶ୍ରୀକାକୁଲମ ଜିଲା ବାତିଲି ଗ୍ରାମର ଭୁନା ଲକ୍ଷ୍ମୀନାରାୟଣ (୫୭) ମଧ୍ୟସ୍ଥ ସାଜିଥିଲେ। ବିବାହ ସ୍ଥିର ହେବା ପରେ ପରମ୍ପରା ଅନୁସାରେ ଝିଅ ଓ ପୁଅଘର ସୁନା ଅଦଳବଦଳ କରନ୍ତି। ସେହି ଅନୁସାରେ ଅନ୍ୟମାନଙ୍କ ଉପସ୍ଥିତିରେ କନ୍ୟା ଓ ବରଘର ପକ୍ଷରୁ ମଧ୍ୟସ୍ଥ ଲକ୍ଷ୍ମୀନାରାୟଣଙ୍କୁ ୨୦୦ ଗ୍ରାମ୍ର ସୁନା ବିସ୍କୁଟ ଦିଆଯାଇଥିଲା। ପରେ କୌଣସି କାରଣରୁ ବିବାହ ଭାଙ୍ଗିଯାଇଥିଲା। ମଧ୍ୟସ୍ଥ ଲକ୍ଷ୍ମୀନାରାୟଣ ଝିଅଘରକୁ ସୁନା ବିସ୍କୁଟକୁ ଫେରାଇ ଦେଇଥିଲେ। କିନ୍ତୁ ବାରମ୍ବାର କହିବା ସତ୍ତ୍ୱେ ମଧ୍ୟ ପୁଅଘରକୁ ସୁନା ଫେରାଇ ନ ଥିଲେ ମଧ୍ୟସ୍ଥ। ଫଳରେ ୧୮ ଏପ୍ରିଲ ୨୦୧୮ରେ ଭୁନା ଲକ୍ଷ୍ମୀନାରାୟଣଙ୍କ ନାଁରେ ବିଷମକଟକ ଥାନାରେ ଏତଲା ଦେଇଥିଲେ ଭୁନା ତ୍ରିପତି ରାଓ। ପୋଲିସ ତଦନ୍ତ କରିବା ବେଳେ ଅଭିଯୁକ୍ତ ଭୁନା ଲକ୍ଷ୍ମୀନାରାୟଣ ନିଜ ଦୋଷ ସ୍ବୀକାର କରିବା ସହ ୧୦୦ ଗ୍ରାମ୍ ସୁନା ବିସ୍କୁଟ ସାକ୍ଷୀଙ୍କ ଉପସ୍ଥିତିରେ ଫେରାଇଥିଲେ। ଏନେଇ ୪୦୬, ୪୨୦, ୫୦୬ ଆଇପିସି ଅନୁଯାୟୀ କେସ୍ ନଂ ୧/୨୦ରେ ମାମଲା ରୁଜୁ କରାଯାଇ ତାଙ୍କୁ ଗିରଫ ପରେ ବୁଧବାର କୋର୍ଟ ଚାଲାଣ କରାଯାଇଛି।