ପରଜଙ୍ଗ, ୧୬ା୭(ଡି.ଏନ.ଏ)ଢେଙ୍କାନାଳ ଜିଲା ପରଜଙ୍ଗ ବ୍ଲକ କୁଳେଇ ଉଚ୍ଚ ପ୍ରାଥମିକ ବିଦ୍ୟାଳୟରେ ଗତ ଶନିବାର ମଧ୍ୟାହ୍ନଭୋଜନରେ ବୁଢିଆଣୀ ପଡିବା ଓ ଏହାକୁ ଖାଇ ୩୦ରୁ ଊଦ୍ଧର୍ବ ଛାତ୍ରୀଛାତ୍ର ଅସୁସ୍ଥ ହେବା ଘଟଣାରେ ଅଭିଭାବକମାନେ ସୋମବାର ସ୍କୁଲରେ ତାଲା ପକାଇ ପ୍ରତିବାଦ କରିଛନ୍ତି। ଘଟଣାର ତଦନ୍ତ ସହ ସମ୍ପୃକ୍ତ ରୋଷେୟା ଓ ସହାୟିକାଙ୍କୁ ବାହାର କରି ନୂତନ ରୋଷେୟା ନିଯୁକ୍ତି ପାଇଁ ସେମାନେ ଦାବି କରିଛନ୍ତି। ଅଭିଭାବକମାନେ ଏକତ୍ରିତ ହୋଇ ବିଦ୍ୟାଳୟରେ ତାଲା ପକାଇ ଏକ ବୈଠକ କରିଥିଲେ। ଅନ୍ୟପକ୍ଷରେ ଏହାକୁ ନେଇ ବିଦ୍ୟାଳୟରେ ଏକ ଜରୁରିକାଳୀନ ବୈଠକ ବସିଥିଲା। ଆଗକୁ କିପରି ଏମିତି ନ ହେବ ସେ ଉପରେ ଆଲୋଚନା ହେଉଛି ବୋଲି ଭାରପ୍ରାପ୍ତ ପ୍ରଧାନ ଶିକ୍ଷକ ପ୍ରମୋଦ କୁମାର ବେହେରା କହିଛନ୍ତି। ଏବିଇଓ ସଞ୍ଜୟ କୁମାର ମିଶ୍ର, ସିଆରସିସି ସୁନୀଲ ବର୍ମା, ଶିକ୍ଷାକମିଟି କର୍ମକର୍ତ୍ତା ପ୍ରମୁଖ ବୈଠକରେ ଆଲୋଚନା କରିଥିଲେ ମଧ୍ୟ କୌଣସି ସମାଧାନ ବାହାରି ନ ପାରିବାରୁ ମଙ୍ଗଳବାର ପୁନର୍ବାର ଆଲୋଚନା ହେବ ବୋଲି ଜଣାପଡ଼ିଛି। ଏ ବିଷୟରେ ଏବିଇଓ ମିଶ୍ର କୁହନ୍ତି, ଘଟଣାର ତଦନ୍ତ ପାଇଁ ଯାଇଥିଲି। ତଦନ୍ତ ରିପୋର୍ଟ ବିଇଓଙ୍କୁ ପ୍ରଦାନ କରିବି। ସେ ଯାହା ନିଷ୍ପତ୍ତି ନେବେ।