ସଜନାଗଡ଼, ୪।୧୨(ଡି.ଏନ.ଏ.)-ରାଜ୍ୟ ସରକାର ୧ମରୁ ୮ମ ଶ୍ରେଣୀ ପର୍ଯ୍ୟନ୍ତ ଛାତ୍ରୀଛାତ୍ରମାନଙ୍କ ଲାଗି ମଧ୍ୟାହ୍ନଭୋଜନ ବ୍ୟବସ୍ଥା କରିଛନ୍ତି। ଏପରିକି ବିଦ୍ୟାଳୟର ରୋଷେଇ ହେଲେ ଶିକ୍ଷାଦାନରେ ବାଧା ଉପୁଜିବା ଆଶଙ୍କା କରି ଏକ ମାସ ହେବ ବାହାରୁ ରନ୍ଧା ଖାଦ୍ୟ ଯୋଗାଇ ଦିଆଯାଉଛି। ଏହି ପରିପ୍ରେକ୍ଷୀରେ ବାଲେଶ୍ୱର ଜିଲା ନୀଳଗିରି ଏନ୍ଏସିରେ ୧୮ଗୋଟି ବିଦ୍ୟାଳୟକୁ ସେରଗଡ଼ସ୍ଥିତ କିଚେନ ସେଣ୍ଟରରୁ ରନ୍ଧାଖାଦ୍ୟ ଯୋଗାଇ ଦିଆଯାଉଛି। ମାତ୍ର ସରକାରଙ୍କର ଏହି ଯୋଜନା ଦିଗହରା ହେଉଥିବାର ଦେଖିବାକୁ ମିଳିଛି। ମଧ୍ୟାହ୍ନ ଭୋଜନରେ ଭାତ ବଦଳରେ ପୂର୍ବରୁ ମୁଢ଼ି ମିଳୁଥିବାର ଅଭିଯୋଗ ହେଉଥିଲା ବେଳେ ମଙ୍ଗଳବାର ଛାତ୍ରୀଛାତ୍ରମାନେ ବିସ୍କୁଟ ଖାଇଥିବା ନଜରକୁ ଆସିଛି।
ନୀଳଗିରି ଏନ୍ଏସି ୯ନଂ. ୱାର୍ଡ଼ରେ କାହାଳିଆ ଗ୍ରାମର ବଂଶୀଧର ନୋଡ଼ାଲ ସ୍କୁଲରେ କିଛିଦିନ ପୂର୍ବରୁ ତରକାରୀ ବହୁ ବିଳମ୍ବରେ ଆସିବାରୁ ଛାତ୍ରୀଛାତ୍ରମାନେ ଲୁଣ ଲଗାଇ ଭାତ ଖାଇଥିଲେ। ଏହି ଘଟଣା ମନରୁ ନ ଯାଉଣୁ ମଙ୍ଗଳବାର ନୀଳଗିରି ଏନ୍ଏସି ୧୦ନଂ. ୱାର୍ଡ଼ର ଥିବା ତଳକାହାଳିଆ ପ୍ରାଥମିକ ବିଦ୍ୟାଳୟର ଛାତ୍ରୀଛାତ୍ରମାନେ ଭାତ ବଦଳରେ ବିସ୍କୁଟ ଖାଇଥିବା ଜଣାପଡିଛି। ସୋମବାର ସମ୍ପୃକ୍ତ ବିଦ୍ୟାଳୟର ପ୍ରଧାନଶିକ୍ଷକ ଭାସ୍କର ପଣ୍ଡା ୫୦ଜଣ ଛାତ୍ରୀଛାତ୍ରଙ୍କ ମଧ୍ୟାହ୍ନଭୋଜନ ପାଇଁ ଏସ୍ଏମଏସ୍ ପଠାଇଥିଲେ। ମଙ୍ଗଳବାର ସମ୍ପୃକ୍ତ ଭେଣ୍ଡର ୧୦ ଜଣ ପିଲାଙ୍କ ପାଇଁ ମଧ୍ୟାହ୍ନଭୋଜନ ଆଣିଥିବା ବେଳେ ଅବଶିଷ୍ଟ ୪୦ଜଣ ଛାତ୍ରୀଛାତ୍ର ଉପାସରେ ରହିବା ନେଇ ପ୍ରଧାନଶିକ୍ଷକ ସଙ୍ଗେ ସଙ୍ଗେ ସ୍କୁଲର ଚେୟାରମ୍ୟାନଙ୍କୁ ଡକାଇଥିଲେ। ପରେ ବହୁ ଅଭିଭାବକ ସ୍କୁଲରେ ପହଞ୍ଚତ୍ ଏପରି ଅବ୍ୟବସ୍ଥାକୁ ନିନ୍ଦା କରିବା ସହିତ ଉକ୍ତ ରନ୍ଧାଖାଦ୍ୟ ଯୋଜନା ସମ୍ପୂର୍ଣ୍ଣ ଦିଗହରା ଯୋଜନା ବୋଲି ପ୍ରକାଶ କରିଥିଲେ। ପରେ ଭେଣ୍ଡରଜଣକ ୫ଟଙ୍କିଆ ବିସ୍କୁଟ ପିଲାଙ୍କୁ ଦେଇଥିବା ଦେଖିବାକୁ ମିଳିଛି। ଜିଲାପାଳ କେ. ସୁଦର୍ଶନ ଚକ୍ରବର୍ତ୍ତୀ ଏହି ଘଟଣା ଜାଣିବା ପରେ ଜିଲା ଶିକ୍ଷାଧିକାରୀ ପ୍ରମୋଦ କୁମାର ଷଡ଼ଙ୍ଗୀଙ୍କୁ ତଦନ୍ତ ନିର୍ଦ୍ଦେଶ ଦେଇଥିଲେ। ନୀଳଗିରି ବିଇଓ ଭଗୀରଥ ଗିରି ଘଟଣାର ତଦନ୍ତ କରି ରିପୋର୍ଟ ବାଲେଶ୍ୱର ଶିକ୍ଷାଧିକାରୀଙ୍କୁ ପ୍ରଦାନ କରିଥିବାର ସୂଚନା ମିଳିଛି।