ଶିମ୍ଲା/ନୂଆଦିଲ୍ଲୀ,୨୮ା୧୨: ୧୦ ବର୍ଷ ଧରି କଂଗ୍ରେସ ସରକାର ଚାଲିଥିଲା। ସୋନିଆ ମନମୋହନଙ୍କ ସରକାର ବେଳେ ପାକିସ୍ତାନରୁ ଆଲିଆ, ମାଲିଆ ଓ ଜମାଲିଆମାନେ ରୀତିମତ ଆସି ଆମ ଯବାନଙ୍କ ମୁଣ୍ଡ କାଟି ନେଇଯାଉଥିଲେ। ଦେଶର ପ୍ରଧାନମନ୍ତ୍ରୀ ସେତେବେଳେ ପଦୁଟିଏ କହୁ ନ ଥିଲେ। ସେମାନେ ସୀମାକୁ ମୁକୁଳା ଛାଡ଼ି ଚାଲିଯାଇଥିଲେ। ନରେନ୍ଦ୍ର ମୋଦି ସରକାର କ୍ଷମତାକୁ ଆସିବା ପରେ ପାକିସ୍ତାନ ଭାବିଥିଲା ସବୁକିଛି ପୂର୍ବଭଳି ଚାଲିବ। ପାକିସ୍ତାନୀମାନେ ଜାଣି ନ ଥିଲେ ଯେ, ଏହା କଂଗ୍ରେସ ସରକାର ନୁହେଁ, ଏହା ହେଉଛି ଭାଜପା ସରକାର। ନାଗରିକତ୍ୱ ଆଇନକୁ ନେଇ ଦେଶବ୍ୟାପୀ ଆନ୍ଦୋଳନକୁ କଂଗ୍ରେସ ପ୍ରସଙ୍ଗ କରିଥିବାବେଳେ ପୂର୍ବତନ ପ୍ରଧାନମନ୍ତ୍ରୀ ମନମୋହନ ସିଂଙ୍କୁ ଏଭଳି ଭାଷାରେ ବାଣ ମାରିଛନ୍ତି ଭାଜପା ରାଷ୍ଟ୍ରୀୟ ଅଧ୍ୟକ୍ଷ ଅମିତ୍ ଶାହା।
ସ୍ବରାଷ୍ଟ୍ରମନ୍ତ୍ରୀ ଶାହା ଶୁକ୍ରବାର କଂଗ୍ରେସ ବିରୋଧରେ ସାଂଘାତିକ ଅଭିଯୋଗ ଆଣିଛନ୍ତି। ହିମାଚଳପ୍ରଦେଶରେ ଭାଜପା ସରକାରର ଦୁଇବର୍ଷ ପୂର୍ତ୍ତି ଅବସରରେ ରାଜଧାନୀ ଶିମ୍ଲାସ୍ଥିତ ରିଜ୍ ମଇଦାନରେ ଆୟୋଜିତ ଏକ ସଭାରେ ଯୋଗଦେଇ ଶାହା କହିଛନ୍ତି, ସଂଶୋଧିତ ନାଗରିକତ୍ୱ ଆଇନକୁ ନେଇ କଂଗ୍ରେସ ଲୋକଙ୍କୁ ବିଭ୍ରାନ୍ତ କରୁଛି। ମୁସ୍ଲିମମାନେ ସେମାନଙ୍କ ନାଗରିକତ୍ୱ ହରାଇବେ ବୋଲି କଂଗ୍ରେସ ଏବଂ କମ୍ପାନୀ ଗୁଜବ ବିସ୍ତାର କରୁଛି। ଏହି ଆଇନ କାହାର ନାଗରିକତ୍ୱ ଛଡ଼ାଇ ନେବନାହିଁ। ଏହି ଆଇନର କୌଣସି ସ୍ଥାନରେ କାହାର ନାଗରିକତ୍ୱ ପ୍ରତ୍ୟାହାର ସମ୍ପର୍କିତ ଗୋଟିଏ ହେଲେ ଧାଡ଼ି ରହିଥିଲେ ରାହୁଲ ବାବା ତାହା ଦେଖାନ୍ତୁ। ରାହୁଲଙ୍କୁ ମୁଁ ଚ୍ୟାଲେଞ୍ଜ କରୁଛି। ସେହିପରି ମନମୋହନ ସିଂଙ୍କ ଅମଳରେ ପାକିସ୍ତାନରୁ ନିୟମିତ ଭାବେ ‘ଆଲିଆ-ମାଲିଆ-ଜମାଲିଆ’ ଭାରତରେ ଅନୁପ୍ରବେଶ କରି ଆମ ଯବାନମାନଙ୍କୁ ହତ୍ୟା କରୁଥିଲେ। ମୋଦି ସରକାର ଆସିବା ପରେ ଆମେ ତାକୁ ବନ୍ଦ କରିଦେଇଛୁ। ଧାର୍ମିକ ଓ ଅନ୍ୟ ସଂଖ୍ୟାଲଘୁ ସମ୍ପ୍ରଦାୟର ଲୋକଙ୍କ ଅଧିକାରଗୁଡ଼ିକର ସୁରକ୍ଷା ପାଇଁ ନେହେରୁ-ଲିଆକତଙ୍କ ଚୁକ୍ତିକୁ କାର୍ଯ୍ୟକାରୀ କରିବାରେ ପାକିସ୍ତାନ ବିଫଳ ହୋଇଛି। ନରେନ୍ଦ୍ର ମୋଦିଙ୍କ ନେତୃତ୍ୱାଧୀନ ଭାଜପା ସରକାର ପାର୍ଲାମେଣ୍ଟରେ ନାଗରିକତ୍ୱ ବିଲ୍କୁ ଗୃହୀତ କରାଇଛି ବୋଲି ଶାହା କହିଛନ୍ତି।