ନୂଆଦିଲ୍ଲୀ, ୨୩ା୬: ମନମୋହନ ସିଂଙ୍କ ନେତୃତ୍ୱାଧୀନ ୟୁପିଏ ସରକାର ସମୟରେ ଚାଇନାକୁ ନିର୍ବିରୋଧରେ ଭାରତୀୟ ଭୂଖଣ୍ଡର ୪୩ ହଜାର କି.ମି. ସମର୍ପଣ କରାଯାଇଥିଲା ବୋଲି ଭାଜପା ଅଧ୍ୟକ୍ଷ ଜେ. ପି. ନଡ୍ଡା ଅଭିଯୋଗ କରିଛନ୍ତି। ଦେଶର ସୁରକ୍ଷା ଓ ଆଞ୍ଚଳିକ ସଂହତିକୁ ନେଇ କଂଗ୍ରେସ ଏଭଳି ଖେଳ ଖେଳିବା ବନ୍ଦ କରୁ ବୋଲି ସେ ସମାଲୋଚନା କରି କହିଛନ୍ତି। ପ୍ରକାଶଥାଉ କି, ଲଦାଖର ଗଲ୍ଓ୍ବାନ୍ ଉପତ୍ୟକାରେ ଭାରତ-ଚାଇନା ସେନା ମଧ୍ୟରେ ରକ୍ତାକ୍ତ ସଂଘର୍ଷ ଘଟି ୨୦ ଯବାନ ଶହୀଦ ହେବା ଓ ଏଭଳି ସ୍ଥିତି ଲାଗି ଚାଇନା ଭାରତକୁ ଦୋଷଦେଇ ଗଲ୍ଓ୍ବାନ୍କୁ ନିଜର ବୋଲି ଦାବି କରିଆସୁଛି। ପ୍ରଧାନମନ୍ତ୍ରୀ ମୋଦି ଇଞ୍ଚେ ଜାଗା ଛଡ଼ାଯିବ ନାହିଁ ବୋଲି କହିବା ପରେ ମନମୋହନ ପ୍ରତିକ୍ରିୟାରେ ୨୦ ଯବାନ ପ୍ରାଣ ହରାଇବା ନେଇ ପ୍ରଧାନମନ୍ତ୍ରୀଙ୍କ କାର୍ଯ୍ୟଧାରାକୁ ସମାଲୋଚନା କରିଥିଲେ। ଚାଇନାର ଅନୁପ୍ରବେଶ ସମ୍ପର୍କରେ ସୂଚନା ଦିଆ ନ ଯିବା କେବଳ ବିଫଳ କୂଟନୀତି କିମ୍ବା ନେତୃତ୍ୱକୁ ନେଇ ପ୍ରଶ୍ନ ଉଠାଉନି ବରଂ ଏହା ଶହୀଦ ଯବାନଙ୍କ ପ୍ରତି ବିଶ୍ୱାସଘାତକତା ବୋଲି ମନମୋହନ କହିଥିଲେ। ମୋଦି ନିଜେ ଦେଇଥିବା କଥା ରଖନ୍ତୁ ବୋଲି ମନମୋହନ କହିଥିଲେ।
ନଡ୍ଡା ଏହାପରେ ୨୦୧୦ରୁ ୨୦୧୩ ମଧ୍ୟରେ ମନମୋହନଙ୍କ ନେତୃତ୍ୱ ବେଳେ ଚାଇନା ୬୦୦ ଥର ଅନୁପ୍ରବେଶ କରିଥିଲା ବୋଲି ସମାଲୋଚନା କରି କହିଛନ୍ତି। କଂଗ୍ରେସ ଏଭଳି ମୁହୂର୍ତ୍ତରେ ରାଜନୀତି କରିବା ଠିକ୍ନୁହେଁ। ଏହା ସେନାର ମନୋବଳକୁ ଆଘାତ ପହଞ୍ଚାଇବ ବୋଲି ନଡ୍ଡା ପ୍ରକାଶ କରିଛନ୍ତି। ପୂର୍ବରୁ ୨୦୧୯ରେ ବାଲାକୋଟ, ୨୦୧୭ରେ ଉରି ଏୟାରଷ୍ଟ୍ରାଇକ୍ ସମ୍ପର୍କରେ କଂଗ୍ରେସ ପ୍ରମାଣ ମାଗି ପରିସ୍ଥିତିକୁ ଗୋଳମାଳିକା କରିବାକୁ ଚେଷ୍ଟା କରିଥିଲା ବୋଲି ସେ ଅଭିଯୋଗ କରି କହିଛନ୍ତି।
ନଡ୍ଡାଙ୍କ ଏଭଳି ମନ୍ତବ୍ୟ ପରେ କଂଗ୍ରେସର ମୁଖପାତ୍ର ରଣଦୀପ ସିଂ ସୁର୍ଜଓ୍ବୋଲା ଜାତୀୟ ସୁରକ୍ଷା ସହ ସାଲିସ୍ କରିବା ବନ୍ଦ ହେଉ ଓ ଶହୀଦ ଯବାନଙ୍କ ବଳିଦାନ ବେକାର ନ ଯାଉ ବୋଲି ଭାଜପାକୁ ସମାଲୋଚନା କରି କହିଛନ୍ତି। ଆମେ ସରକାରଙ୍କ ସହ ରହିଛୁ, ଚାଇନାକୁ ମୁହଁତୋଡ଼ ଜବାବ ଦିଆଯାଉ ବୋଲି ସେ ପ୍ରକାଶ କରିଛନ୍ତି।