ଜୋହାନ୍ସବର୍ଗ, ୨୨ା୫ (ପି.ଟି.)-ଆଇସିସି ଚେୟାରମ୍ୟାନ ଶଶାଙ୍କ ମନୋହରଙ୍କ କାର୍ଯ୍ୟକାଳ ଚଳିତ ମାସରେ ଶେଷ ହେଉଥିବାବେଳେ ତାଙ୍କର ପରବର୍ତ୍ତୀ ଉତ୍ତରାଧିକାରୀ ପାଇଁ ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ) ସଭାପତି ସୌରଭ ଗାଙ୍ଗୁଲି ହିଁ ଯୋଗ୍ୟ ବ୍ୟକ୍ତି ବୋଲି କହିଛନ୍ତି କ୍ରିକେଟ ସାଉଥ୍ ଆଫ୍ରିକା (ସିଏସ୍ଏ)ର କ୍ରିକେଟ ନିର୍ଦ୍ଦେଶକ ଗ୍ରେମ୍ ସ୍ମିଥ୍। ସିଇଓ ଜ୍ୟାକ୍ସ ଫାଉଲ ସ୍ମିଥ୍ଙ୍କ ମନ୍ତବ୍ୟକୁ ସମର୍ଥନ କରିଛନ୍ତି। ଜଣେ ଭାରତୀୟ ଯଦି ପରବର୍ତ୍ତୀ ଆଇସିସି ମୁଖ୍ୟ ହୁଅନ୍ତି ଆମର କୌଣସି ଆପତ୍ତି ନାହିଁ ବୋଲି ସେ କହିଛନ୍ତି। କରୋନାଭାଇରସ୍ ଯୋଗୁ ବର୍ତ୍ତମାନ ପରିସ୍ଥିତିରେ ହୁଏତ ମନୋହରଙ୍କ କାର୍ଯ୍ୟକାଳ ୨ ମାସ ବୃଦ୍ଧି କରାଯାଇପାରେ। ଆଇସିସି ଚେୟାରମ୍ୟାନ ପଦବୀ ପାଇଁ ଏପର୍ଯ୍ୟନ୍ତ ଇଂଲଣ୍ଡ ଓ ଓ୍ବେଲ୍ସ କ୍ରିକେଟ ବୋର୍ଡ (ଇସିବି)ର ପୂର୍ବତନ ଚେୟାରମ୍ୟାନ କଲିନ୍ ଗ୍ରେଭ୍ସ ଫେଭରାଇଟ୍ ରହି ଆସିଥିବାବେଳେ ଗ୍ରେମ୍ ସ୍ମିଥ୍ଙ୍କ ମନ୍ତବ୍ୟ ଏହି ପ୍ରସଙ୍ଗରେ ନୂଆ ମୋଡ଼ ଆଣିଦେଇଛି। ସୌରଭ ଗାଙ୍ଗୁଲି ହେଉଛନ୍ତି ଜଣେ ମହାନ୍ କ୍ରିକେଟର ଓ ସମ୍ମାନସ୍ପଦ ବ୍ୟକ୍ତି। ଆଧୁନିକ କ୍ରିକେଟକୁ ସେ ଉଚିତ୍ ଦିଗ୍ଦର୍ଶନ ଦେଇ ପାରିବେ ବୋଲି ଦକ୍ଷିଣ ଆଫ୍ରିକାର ପୂର୍ବତନ ଅଧିନାୟକ ସ୍ମିଥ୍ କହିଛନ୍ତି। ଏହା ପୂର୍ବରୁ କିଛିଦିନ ତଳେ ଇଂଲଣ୍ଡର ପୂର୍ବତନ ଅଧିନାୟକ ଡେଭିଡ୍ ଗାଓ୍ବାର ଗାଙ୍ଗୁଲିଙ୍କ ସପକ୍ଷରେ ମତ ଦେଇଥିଲେ। ସ୍ମିଥ୍ କହିଛନ୍ତି, ଗାଙ୍ଗୁଲିଙ୍କର କ୍ରିକେଟ ଖେଳ ଉପରେ ପ୍ରଗାଡ଼ ଜ୍ଞାନ ରହିଛି। ବିଶ୍ୱ କ୍ରିକେଟକୁ ସେ ସଫଳ ନେତୃତ୍ୱ ଦେଇ ପାରିବେ।