ଭୁବନେଶ୍ୱର,୧୪।୫(ବ୍ୟୁରୋ): ରାଜ୍ୟରେ କରୋନା ଆକ୍ରାନ୍ତଙ୍କ ସଂଖ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏହାର ମୁକାବିଲାକୁ ନେଇ ସରକାରଙ୍କ ପକ୍ଷରୁ ବ୍ୟାପକ ପଦକ୍ଷେପ ଗ୍ରହଣ କରାଯାଉଛି। ଏହି କ୍ରମରେ କରୋନା ନେଇ ଗୁରୁବାର ମନ୍ତ୍ରୀସ୍ତରୀୟ ବୈଠକ ଅନୁଷ୍ଠିତ ହୋଇଛି। ଏନେଇ ସ୍ବାସ୍ଥ୍ୟମନ୍ତ୍ରୀ ନବ ଦାସ ପ୍ରତିକ୍ରିୟା ରଖିଛନ୍ତି। ସେ କହିଛନ୍ତି, ରାଜ୍ୟରେ କୋଭିଡ ଟେଷ୍ଟ ଓ ବେଡ୍ ସଂଖ୍ୟା ବୃଦ୍ଧି ପ୍ରସ୍ତାବ ଗୃହୀତ ହୋଇଛି। ପ୍ରତ୍ୟହ ୧୫ ହଜାର କୋଭିଡ୍ ନମୁନା ପରୀକ୍ଷଣ ପାଇଁ ମୁଖ୍ୟମନ୍ତ୍ରୀ ଜୋର ଦେଉଛନ୍ତି। କୋଭିଡ୍ ନମୁନା ପରୀକ୍ଷଣ ବଢ଼ାଇବାକୁ ପ୍ରାଇଭେଟ୍ ଲ୍ୟାବ୍କୁ ଆଇସିଏମ୍ଆର୍ ଅନୁମତି ଦେଇଛି। ୧୬ରୁ ବଲାଙ୍ଗୀର, ୨୩ରୁ କୋରାପୁଟ, ୩୧ରୁ ବାରିପଦାରେ କୋଭିଡ୍ ଟେଷ୍ଟ କରାଯିବ। ଟେଷ୍ଟ ଅନୁମତି ଲାଗି ଆବଶ୍ୟକ ମେଶିନ ଅଣାଯିବ। ଓଏସ୍ଏମ୍ସିଏଲ୍ ଦ୍ୱାରା ଆବଶ୍ୟକ ମେଶିନ କିଣାଯିବ। ୨୦୧୩ ଟବାକୋ ଆଇନ୍କୁ ଦୃଢ଼ ଭାବେ କାର୍ଯ୍ୟକାରୀ କରିବାକୁ ପ୍ରସ୍ତାବ ଦିଆଯାଇଛି। ସେହିଭଳି ବାହାରୁ ଆସୁଥିବା ଗର୍ଭବତୀ, ବୟସ୍କ ଓ ଶିଶୁଙ୍କର କରୋନା ଟେଷ୍ଟ ହେବ। ଏମାନଙ୍କର ଟେଷ୍ଟ ନେଗେଟିଭ୍ ଆସିଲେ ଘରେ ସଂଗରୋଧ ରହିବେ। ଆବଶ୍ୟକ ପଡ଼ିଲେ ସେମାନଙ୍କୁ ତୁରନ୍ତ ସ୍ବାସ୍ଥ୍ୟସେବା ଯୋଗାଇ ଦିଆଯିବ। ପ୍ରବାସୀ ଶ୍ରମିକଙ୍କ କୋଭିଡ ଟେଷ୍ଟ ନେଗେଟିଭ୍ ହେଲେ ଘରକୁ ପଠାଯିବ ବୋଲି ମନ୍ତ୍ରୀ କହିଛନ୍ତି।