ଦିଗପହଣ୍ଡି,୧୦ା୬(ଡି.ଏନ୍.ଏ.)- ଦିଗପହଣ୍ଡି ସ୍ଥିତ ରାଧାମୋହନ ଏବଂ ରାଧା ଦାମୋଦରଙ୍କ ମନ୍ଦିର ଜମିକୁ ବେଆଇନ ଭାବେ ବିକ୍ରି କରାଯାଇଥିବା ଅଭିଯୋଗ ହୋଇଛି। ପ୍ରତିବାଦରେ ବୁଧବାର ବହୁ ଭାଗଚାଷୀ ଆଇନଜୀବୀ କୁରେଶୁ ପଣ୍ଡାଙ୍କ ଉପସ୍ଥିତିରେ ଦିଗପହଣ୍ଡି ତହସିଲଦାର ଅଦ୍ୱୈତ କୁମାର ସ୍ବାଇଁଙ୍କୁ ଭେଟି ମୁଖ୍ୟମନ୍ତ୍ରୀଙ୍କ ଉଦ୍ଦେଶ୍ୟରେ ସ୍ମାରକପତ୍ର ପ୍ରଦାନ କରିଛନ୍ତି। ଦିଗପହଣ୍ଡି ମୌଜା ଖାତା ନଂ.୧୨୭ରେ ଥିବା ଦେବୋତ୍ତର ବିଭାଗ ଅଧୀନ ୫ ଏକର ୯୩୩ ଡିସିମିଲ ଚାଷ ଜମିକୁ ଗତ ମେ’ ୨୭ରେ ଦିଗପହଣ୍ଡି ସବ୍ରେଜିଷ୍ଟ୍ରାରଙ୍କ କାର୍ଯ୍ୟାଳୟରେ ଦଲିଲ ନଂ.୧୩୭୬/୨୦ଅନୁଯାୟୀ ବିକ୍ରି କରାଯାଇଛି। ଯାହାକି ହିନ୍ଦୁ ଦେବୋତ୍ତର ଆଇନ ସମେତ ଓ ରାଜ୍ୟ ଭୂସଂସ୍କାର ଆଇନ ବିରୋଧ ବୋଲି ସ୍ମାରକପତ୍ରରେ ଉଲ୍ଲେଖ ରହିଛି। ପୁରୁଷାନୁକ୍ରମେ ଉକ୍ତ ଜମିକୁ ଭାଗ ଚାଷ କରି ମହାସୁଲ ପୈଠ କରୁଥିବା ଭାଗଚାଷୀଙ୍କୁ ଜମିରୁ ବେଦଖଲ ନକରି କିମ୍ବା ବିକ୍ରି ବାବଦରେ ସୂଚନା ନ ଦେଇ ବିକ୍ରି କରାଯାଇଥିବା ଅଭିଯୋଗ କରିଛନ୍ତି। ବିକ୍ରି ଦଲିଲ ରଦ୍ଦ କରିବାକୁ ସ୍ମାରକପତ୍ରରେ ଉଲ୍ଲେଖ ରହିଛି।