ବିନିକା,୧୮ା୩ (ଡି.ଏନ୍.ଏ.)-
ଚାଷ୍ ଆର ଚାଷୀର ବିକାଶ ଲାଗି କେନ୍ଦ୍ର ଆର ରାଏଜ୍ ଉଭଏ ସରକାର ଜଲ୍ସେଚନର ବେବସ୍ତା କରୁଛନ୍। ଚାଷୀର ଖେତ୍କେ ପାଏନ୍ ପୁହୁଁଚାବାର ଲାଗି କେନାଲ କୁଡ଼ବାର ଲାଗି କୋଟି କୋଟି ଟଁକା ଖରଚ୍ କରୁଛନ୍। ସେନ୍ତା କେନାଲର ଦେଖ୍ଭାଲ, ମରାମତି ଲାଗି ବି ଫିବଛର କୋଟି କୋଟି ଟଁକା ଖରଚ୍ ହେଉଛେ। ହେଲେ ଅନେକ ଜାଗାରେ ବିଭାଗୀୟ ଅଧ୍କାରୀମାନକର ଖାମଖିଆଲି ମନଭାବ ଲାଗି ସରକାର, ଚାଷୀର କ୍ଷତି ହେଉଛେ। ଏନ୍ତା ଗୁଟେ ଉଦାହରନ୍ ଦେଖ୍ବାକେ ମିଲିଛେ ରାମପୁର କେନାଲ ବିଭାଗ ଅଧୀନ ସିଂଘିଯୁବାରେ।
ସୂଚନା ଅନ୍ସାରେ ରାମପୁର-ସିଂଘିଯୁବା ହାଇସ୍କୁଲ ଛକ୍ ମୁଖିଆ ରାସ୍ତାରେ ରହିଛେ କେନାଲ ବିଭାଗର ଗୁଟେ ମାଇନର ପୁଲିଆ। ଆଏଜ୍କେ ୫ ବଛର ତଲେ ଇ ପୁଲିଆ ପାଇପ୍ ଖରାପ ହେଇଯାଇଥିଲା। ଥାନୀଅ ଲୋକ ଆର ଚାଷୀ ଅଭିଯୋଗ କଲାରୁ ବିଡବ୍ଲୁଡି ବିଭାଗ ତରଫୁ ତାର ମରାମତି କରାଯାଇଥିଲା। ହେଲେ ପୁଲିଆ ମରାମତି ବେଲେ ଲଗାଯାଇଥିବାର ଦୁଇଟା ସିମେଟ ପାଇପ୍ ଠିକ୍ ହିସାବେ ଖଁଜା ନାଇଁ ହେଇ। ଯେନ୍ଥିରଲାଗି ଗୁଟେ ଫାଲୁ ଆରଗୁଟେ ଫାଲକେ ପାଏନ୍ ଠିକ୍ ହିସାବେ ନାଇଁ ଯାଇପାରୁଥାଇ। ଏନ୍ତାଥି ମାସକେତେ ହେଲା କେନାଲ ପାଏନ୍ ରାସ୍ତା ଉପରେ ଯାଉଛେ। ଯେନ୍ଥିରଲାଗି ଥାନୀଅ ଅଂଚଲବାସୀ, ହାଇସ୍କୁଲର ଛାତ୍ରୀଛାତ୍ର, ଛକେ ଥିବାର ଦୁକାନୀ, ଗାଡ଼ିମଟରବାଲେ ଗଲାଆଏଲା ବେଲେ ବହୁତ୍ ହଇରାନ ହରକତ ହେଉଛନ୍। ସେନ୍ତା କେନାଲ ପାଏନ୍ ଚାଷୀର ଖେତ୍କେ ଯିବାର ଜାଗାରେ ରାସ୍ତାରେ ବୁହି ନାଲ୍ ନଲିଆକେ ଯାଉଛେ। ବିଭାଗୀୟ କତୁରପକ୍ଷ ଇ ଦିଗେ ଦୁରୁଷ୍ଟି ଦେଇ ପୁଲିଆର ମରାମତି କରବାକେ ଅଂଚଲବାସୀ ଆର ଚାଷୀ ଦାବି କରିଛନ୍।