ବାଲିଆପାଳ,୩୧।୭(ସ୍ବ.ପ୍ର.): ବାରମ୍ବାର ଦାବି ସତ୍ତ୍ୱେ ରାସ୍ତା ମରାମତି ଓ ପ୍ରଶସ୍ତୀକରଣ ନ ହେବାରୁ ବୁଧବାର ପୂର୍ବାହ୍ନରୁ ବାଲେଶ୍ୱର ଜିଲା ବାଲିଆପାଳ ବ୍ଲକ ମାନ୍ଧାତା ପଞ୍ଚୁପାଲି ରାସ୍ତାର ପଞ୍ଚୁପାଲି ଛକ ନିକଟରେ ଗ୍ରାମବାସୀ ରାସ୍ତାରୋକୋ ଆନ୍ଦୋଳନ କରିଥିଲେ। ଏହି ରାସ୍ତାଟି ଜଳସେଚନ ବିଭାଗ ଅଧୀନରେ ଥିଲେ ବି ରକ୍ଷଣାବେକ୍ଷଣ ଓ ମରାମତି ନ ହେବାରୁ ଏକପ୍ରକାର ମରଣଯନ୍ତା ପାଲଟିଛି। ପ୍ରତିଦିନ ଛୋଟବଡ଼ ଦୁର୍ଘଟଣା ଘଟି ଲୋକେ ମୃତ୍ୟୁମୁଖରେ ପଡୁଥିଲେ ବି ପ୍ରଶାସନର ନିଦ ଭାଙ୍ଗୁନି। ରାସ୍ତା ସମ୍ପୂର୍ଣ୍ଣ ଖାଲଖମାରେ ପୂରି ଥିବାରୁ ୫କି.ମି. ଦୂର ଅତିକ୍ରମ କରିବାକୁ ଯାନବାହନକୁ ପ୍ରାୟ ଅଧଘଣ୍ଟାରୁ ଅଧିକ ସମୟ ଲାଗୁଛି। ଏହା ଏ ଅଞ୍ଚଳର ଏକ ମୁଖ୍ୟ ରାସ୍ତା ହୋଇଥିବାରୁ ପ୍ରତ୍ୟେକ ଦିନ ଶହଶହ ଗାଡ଼ିମୋଟର, ବସ୍, ଆମ୍ବୁଲାନ୍ସ, ଦମକଳଗାଡ଼ି ସମେତ ସ୍କୁଲକଲେଜ ଛାତ୍ରୀଛାତ୍ର ଯିବା ଆସିବା କରୁଛନ୍ତି। ରାସ୍ତାର ଦୁରବସ୍ଥା ସମ୍ପର୍କରେ ଅଞ୍ଚଳବାସୀ ସ୍ଥାନୀୟ ନେତା ଓ ପ୍ରଶାସନକୁ ବାରମ୍ବାର ଜଣାଇବା ପରେ ଲୋକ ଦେଖାଣିଆ ମାଟି ମିଶା ମୋରମ ପକାଇ ପ୍ରଶାସନ ଦାୟିତ୍ୱ ସାରି ଦେଉଛି। ଏଭଳି ତାଳିପକା ଓ ଅସ୍ଥାୟୀ କାମକୁ ଅଞ୍ଚଳବାସୀ ବିରୋଧ କରି ଏହାକୁ ସ୍ଥାୟୀ ଓ ପ୍ରଶସ୍ତ ପକ୍କା ରାସ୍ତାରେ ପରିଣତ କରାଯାଉ ବୋଲି ଦାବି କରିଆସୁଛନ୍ତି। ବୁଧବାର ରାସ୍ତାରୋକୋ ଆନ୍ଦୋଳନ କରିଥିବା ଲୋକେ ଏହି ଦାବି ନେଇ ଜିଦ୍ରେ ଅଡିବସିଥିଲେ। ବିଭାଗୀୟ ଜେଇ ଜୟକୃଷ୍ଣ ବେହେରା ଘଟଣାସ୍ଥଳକୁ ଆସି ଲୋକଙ୍କ ଠାରୁ ଦାବିପତ୍ର ଗ୍ରହଣ କରିବା ସହିତ ଏହାକୁ ସ୍ଥାୟୀ ପକ୍କା ରାସ୍ତା କରିବା ଲାଗି ଉଚ୍ଚପଦସ୍ଥ ବିଭାଗୀୟ ଅଫିସରଙ୍କ ସହିତ ଆଲୋଚନା କରିବେ ବୋଲି ପ୍ରତିଶ୍ରୁତି ଦେବାରୁ ଆନ୍ଦୋଳନ ପ୍ରତ୍ୟାହୃତ ହୋଇଥିଲା। ଗ୍ରାମରୁ ଏକ ପ୍ରତିିନିଧିଦଳ ଇରିଗେସନ ବିଭାଗୀୟ ଯନ୍ତ୍ରୀଙ୍କୁ ଦେଖା କରି ଆଲୋଚନା କରିବା ସକାଶେ ବେହେରା ପରାମଶ ର୍ଦେଇଥିଲେ। ସୁବଳ ଚନ୍ଦ୍ର ଦାସ, ଶାରଦା ଗିରି, ଗୋପାଳ ଚନ୍ଦ୍ର ଦାସଙ୍କ ତତ୍ତ୍ୱାବଧାନରେ ମାନ୍ଧାତା ଓ ପଞ୍ଚୁପାଲି ଅଞ୍ଚଳର ଗ୍ରାମବାସୀ ଆନ୍ଦୋଳନ କରିଥିଲେ।