ନରାଜ,୩୦ା୬(ଡିଏନ୍ଏ): ଶନିବାର ଅପରାହ୍ନ ପ୍ରାୟ ୩.୩୦। ମର୍କତନଗର ଥାନାର ମହିଳା ଓ ଶିଶୁ କଲ୍ୟାଣ ଡେସ୍କ ପ୍ରକୋଷ୍ଠ କବାଟ ଭିତରୁ ଆଉଜା ହୋଇଥାଏ। କବାଟ ଖୋଲି ଭିତରକୁ ଯିବାବେଳକୁ ଲାଇଟ୍ ବନ୍ଦ ହୋଇଥାଏ ଓ ପଙ୍ଖା ବୁଲୁଥାଏ। ପ୍ରକୋଷ୍ଠର ଟେବୁଲ ଉପରେ ନିଘୋଡ ନିଦରେ ଶୋଇଥାନ୍ତି ଥାନାର ଜଣେ ବଡ଼ବାବୁ। ଥାନାରେ ପହଞ୍ଚୁଥିବା ଅଭିଯୋଗକାରୀମାନଙ୍କୁ ସାମୟିକ ଆଶ୍ରୟ ଦେବା ଉଦ୍ଦେଶ୍ୟରେ ହୋଇଥିବା ଏହି ପ୍ରକୋଷ୍ଠ ମର୍କତନଗର ଥାନା କର୍ମଚାରୀ ଓ ଅଧିକାରୀମାନଙ୍କ ପାଇଁ ଯେପରି ପାଲଟିଛି ବେଡ୍ରୁମ। କିଛି ବର୍ଷ ଭିତରେ ମର୍କତନଗର ଅଞ୍ଚଳରେ ଆପରାଧିକ କାର୍ଯ୍ୟକଳାପ ବଢ଼ିବାରେ ଲାଗିଛି। ଏପରି କି ଛିନତାଇ ସଂଖ୍ୟା ମଧ୍ୟ ବେଶ ବଢ଼ିଲାଣି। ତେବେ ଦିନ ଦ୍ୱିପ୍ରହରରେ ଥାନା ଭିତରେ ଏପରି ଦୃଶ୍ୟ ମର୍କତନଗର ପୋଲିସର କାର୍ଯ୍ୟଦକ୍ଷତା ଉପରେ ପ୍ରଶ୍ନବାଚୀ ସୃଷ୍ଟି କରିଛି। ମର୍କତନଗର ଥାନା ସେକ୍ଟର-୬ ଠାରୁ ସେକ୍ଟର-୯ ପର୍ଯ୍ୟନ୍ତ ଅଞ୍ଚଳକୁ ସୁରକ୍ଷା ଦେବା ଉଦ୍ଦେଶ୍ୟରେ ଗଠନ କରାଯାଇଛି। ଏହା ଭିତରେ ହଇରାଣପୁର, ପେଟାନାଳ, ଇମାମପଡ଼ା, କାଠଯୋଡ଼ି ବିହାର, ବାଇଗଣ ବସ୍ତି ଭଳି ଅଞ୍ଚଳ ମଧ୍ୟ ରହିଛି। ଅନେକ ବିଶିଷ୍ଟ ବ୍ୟକ୍ତିବିଶେଷଙ୍କ ଘର ମଧ୍ୟ ଏହି ଥାନା ଅନ୍ତର୍ଗତ ଅଞ୍ଚଳରେ। ରାତିରେ ଗାଡ଼ି କାଚ ଭାଙ୍ଗିବା, ପ୍ରାତଃଭ୍ରମଣ ବେଳେ ସୁନାଚେନ ଛିନତାଇ କରିବା ଭଳି ଘଟଣା ବିଗତ ଦିନରେ ଘଟିଛି। ହେଲେ ପୋଲିସର ନିଷ୍କ୍ରିୟତା ନେଇ ସବୁବେଳେ ସ୍ଥାନୀୟ ଲୋକ ଅଭିଯୋଗ କରନ୍ତି। ଯାହାର ଉଦାହରଣ ଧରିତ୍ରୀର ହସ୍ତଗତ ହୋଇଛି। ସୁରକ୍ଷା ଦେବାର ପ୍ରତିଶ୍ରୁତିବଦ୍ଧ ପୋଲିସ ଦିନ ଦ୍ୱିପ୍ରହରରେ ଥାନା ଟେବୁଲ ଉପରେ ଶୋଇବା ଘଟଣାକୁ ସାଧାରଣରେ ନିନ୍ଦା କରାଯାଇଛି। ଏ ସମ୍ପର୍କରେ ଏସ୍ଆଇ ଡି.ଏସ୍ ଦାସ କୁହନ୍ତି, ଉକ୍ତ ପ୍ରକୋଷ୍ଠରେ ଥାନାର ବୈଠକ ଡକାଯାଏ। ଜଣେ ମହିଳା କନେଷ୍ଟବଳ ଦାୟିତ୍ୱରେ ଥିବା ବେଳେ ସେ ଖାଇବାକୁ ଯାଇଛନ୍ତି। ହେଲେ କିଏ ଶୋଇଛି ମୁଁ ଜାଣିନାହିଁ। ତେବେ ଶୋଇଥିବା ବାବୁଜଣଙ୍କ ନିଜର ପୋଲିସ ପୋଷାକ ଖୋଲି ଗାମୁଛା ପିନ୍ଧି ଶୋଇଥିବାବେଳେ ବେକରେ ସୁନାଚେନ, ହାତରେ ଦାମୀ ଘଣ୍ଟା ପିନ୍ଧିଥିଲେ। ତାଙ୍କର ଠାଣିରୁ ସେ ଜଣେ ଉଚ୍ଚପଦସ୍ଥ ଅଧିକାରୀଭଳି ଲାଗୁଥିଲେ।