ମୁମ୍ବାଇ: ବଲିଉଡ୍ ଭାଇଜାନ ସଲମାନ ଖାଁଙ୍କର ଅନ୍ୟମାନଙ୍କ ସହ ଥିବା ସମ୍ପର୍କ ବେଳେ ବେଳେ ଆସେ ଚର୍ଚ୍ଚାକୁ। ଏବେ ବୋନି କପୁରଙ୍କ ସହ ତାଙ୍କ ସମ୍ପର୍କକୁ ନେଇ ଚର୍ଚ୍ଚା ଜୋର ଧରିଛି। ଶୁଣିବାକୁ ମିଳିଛି କି ସଲମାଙ୍କ ସହ ଏବେ ବୋନିଙ୍କର ସମ୍ପର୍କ ଭଲ ନାହିଁ। ତେବେ ୨୦୦୯ରେ ‘ଓ୍ବାଣ୍ଟେଡ’ ଫିଲ୍ମ ପରେ ଆଉ ବୋନି କପୁର ଓ ସଲମାନ ଖାଁଙ୍କୁ ଏକାଠି ଦେଖିବାକୁ ମିଳିନାହିଁ। ଏମାନଙ୍କ ସମ୍ପର୍କକୁ ନେଇ ସେବେଠରୁ ଚର୍ଚ୍ଚା ହେଉଥିବା ବେଳେ ଏମାନେ କିନ୍ତୁ ଏ ସମ୍ପର୍କରେ କେବେ କିଛି କଥା ହୋଇ ନ ଥିଲେ। ନିକଟରେ ଏକ ସାକ୍ଷାତ୍କାରରେ ବୋନି ପରୋକ୍ଷରେ ସଲମାନଙ୍କ ସହ ତାଙ୍କର ମନୋମାଳିନ୍ୟକୁ ନେଇ କଥା ହୋଇଛନ୍ତି। ବୋନି ଯଦିଓ ଏହା ସିଧା ସିଧା କହି ନାହାନ୍ତି। ତେବେ ତାଙ୍କ କଥାରୁ ଯାହା ଲାଗିଛି ଅର୍ଜୁନ କପୁର ଓ ମଲାଇକାଙ୍କ ସମ୍ପର୍କକୁ ନେଇ କୁଆଡେ ସଲମାନଙ୍କ ସହ ତାଙ୍କର ସମ୍ପର୍କ ଖରାପ ହୋଇଛି। କୁହାଯାଏ ଅର୍ଜୁନଙ୍କ ସହ ଯେତେବେଳେ ମଲାଇକାଙ୍କ ସହ ସମ୍ପର୍କ ଥିବା ଜଣାପଡିଲା ସେତେବେଳେ ସଲମାନଙ୍କ ଭାଇ ଅରବାଜ ଖାଁ ଓ ମଲାଇକାଙ୍କ ଦାମ୍ପତ୍ୟ ଜୀବନରେ ଫାଟ ସୃଷ୍ଟି ହେଲା। ଆଉ ଅର୍ଜୁନ ବଡ ପରଦାକୁ ଆସିବାରେ ସଲମାନଙ୍କର ହାତ ଥିବାରୁ ଅର୍ଜୁନଙ୍କର ମଲାଇକାଙ୍କ ସହ ସମ୍ପର୍କ କୁଆଡେ ସଲମାନଙ୍କ ପସନ୍ଦ ଆସି ନ ଥିଲା। ଫଳରେ ଅର୍ଜୁନଙ୍କ ପିତା ବୋନିଙ୍କ ସହ ସଲମାନଙ୍କ ସମ୍ପର୍କ ଖରାପ ହୋଇ ଯାଇଥିଲା ବୋଲି ଆଲୋଚନା ହୁଏ।