ପାଟଣା,୨୪ା୪(ସ୍ବ.ପ୍ର.) : କାଳବୈଶାଖୀ ପ୍ରଭାବରେ କେନ୍ଦୁଝର ଜିଲା ସାହାରପଡ଼ା ବ୍ଲକ ମଲାରପଦା ପଞ୍ଚାୟତର ବିଭିନ୍ନ ଗ୍ରାମରେ ଗୁରୁବାର ବର୍ଷା ପବନ ସାଙ୍ଗକୁ ପ୍ରବଳ କୁଆପଥର ମାଡ଼ ହୋଇଛି। ଫଳରେ ଏହି ପଞ୍ଚାୟତ ବାଲିପଶି ଓ ମୟୁରପଙ୍ଖା ଗ୍ରାମରେ ୪୦ରୁ ଉଦ୍ଧର୍ବ ଲୋକଙ୍କ ଘରର ଆଜବେଷ୍ଟସ୍ ଭାଙ୍ଗିବା ସହ ଶତାଧିକ ଘରର ଟାଇଲ ଉଡ଼ିଯାଇଛି।
ଅନୁରୂପ ଭାବେ ବନମାଳୀପୁର ଗ୍ରାମର ହାରାମଣୀ ନାଏକଙ୍କ ପରିବାର ଲୋକେ ଘରଭିତରେ ଥିବା ବେଳେ ଏକ ଆମ୍ବଗଛ ଡାଳ ଘର ଉପରେ ପଡ଼ିଯିବାରୁ ଟାଇଲ ଛପର ଘର ଭାଙ୍ଗି ସମ୍ପୂର୍ଣ୍ଣ ନଷ୍ଟ ହୋଇଛି। ତେବେ ପରିବାର ଲୋକେ ଅଳ୍ପକେ ବର୍ତ୍ତି ଯାଇଛନ୍ତି। ଏହି ଗ୍ରାମର ଅଧିକାରୀ ନାଏକଙ୍କ ଆଜବେଷ୍ଟସ୍ ଘରର ଛପର ସମ୍ପୂର୍ଣ୍ଣ ଭାଙ୍ଗି ଯାଇଛି। କାଳ ବୈଶାଖୀ ପ୍ରଭାବରେ ବାଇକଳା ଓ ଲୁଙ୍ଗା ଗ୍ରାମରେ କୁଆପଥର ମାଡ଼ରେ ଅନେକ ଚାଷୀଙ୍କ ପନିପରିବା ଚାଷ ଉଜୁଡିଯାଇଛି। ଖବର ପାଇ ପ୍ରଭାବିତଙ୍କ ନିକଟରେ ପାଟଣା ବିଧାୟକ ଜଗନ୍ନାଥ ନାଏକ ଓ ସାହାରପଡ଼ା ତହସିଲଦାର ଲମ୍ବୋଦର ଖୁଣ୍ଟିଆ ପହଞ୍ଚି କ୍ଷୟକ୍ଷତି ଆକଳନ କରିବା ସହ କ୍ଷତିଗ୍ରସ୍ତ ଲୋକଙ୍କୁ ଖୁବ୍ଶୀଘ୍ର ସରକାରୀ ସହାୟତା ଯୋଗାଇ ଦେବାକୁ ପ୍ରତିଶ୍ରୁତି ଦେଇଛନ୍ତି। ଏନେଇ ସାହାରପଡ଼ା ତହସିଲଦାର ଲମ୍ବୋଦର ଖୁଣ୍ଟିଆଙ୍କୁ ପଚାରିବାରୁ ୩ଟି ଗ୍ରାମର ଶତାଧିକ ଘର ପ୍ରଭାବିତ ହୋଇଛି। ରାଜସ୍ବ ନିରୀକ୍ଷକ ଆକଳନ କଲାପରେ ସଠିକ୍ କ୍ଷୟକ୍ଷତି ଜଣାପଡ଼ିବ।